Minister di Salubridad, Asunto Social, Cuido di Adulto Mayor y Maneho di Adiccion, mr. Mervin Wyatt-Ras, a anuncia cu Gobierno di Aruba a aproba un aumento di AWG 100 pa luna di e bijstand pa personanan cu limitacion, entrante 1 di augustus 2026. Cu e aumento aki, e suma mensual di e bijstand lo bira AWG 1.180 bruto pa luna. E suma nobo lo keda adapta den e bijstand di luna di augustus 2026. E decision ta refleha e enfoke di e Ministerio pa promove bienestar y inclusion, cu enfasis riba sosten pa personanan cu limitacion. Pa mas informacion, por tuma contact cu Departamento di Asunto Social (DAS).

Minister di Finansa, Asunto Economico y Sector Primario, mr. Geoffrey Wever a indica cu Gobierno ta sigui tuma paso concreto pa fortalece e proteccion di e consumidor. Entrante 15 di augustus promixo ta cuminsa oficialmente cu e handhaving pa supermercado cu ta bende producto di e canasta basico mas caro e prijsnan maximo establece p’e productonan di canasta basico. Esaki ta otro paso concreto den e maneho di Gabinete AVP-Futuro pa fortalece e proteccion di e consumidor y pa garantisa cu famianan Arubano ta paga prijsnan husto pa productonan esencial den supermercado. DEACI ta controla diariamente prijsnan di aproximadamente 1.300 producto den e canasta basico na supermercado- y minimarketnan rond di Aruba. Te ainda, ora durante e controlnan a wordo constata cu un prijs tabata pasa e maximo permiti, e departamento por a duna solamente un advertencia p’e comerciante haci e ahustacion(nan) necesario. Cu e cambio reciente den e maneho Gobierno awor a crea e base legal pa haci handhaving efectivo. Esaki ta nifica cu si un comerciante cu, despues di e periodo pa coregi e situacion, no ta cumpli cu e prijsnan establece, por wordo sanciona cu un multa administrativo. E medida aki tin como meta principal promove cumplimiento di e reglanan y asina fortalece e proteccion legal di consumidor. E no ta un medida pa castiga comerciante, sino pa garantisa cu tur participante den mercado ta sigui mesun reglanan y cu consumidor por tin confianza cu prijsnan regula ta wordo respeta. Mayoria di supermercado ta cumpli cu e prijsnan di productonan den canasta basico, pero asina mes tin algun cu no ta haci esaki y pa evita cu esnan cu no ta cumpli sigui cu esaki dor cu Gobierno no por actua, a prepara e cambio di ley pa haci esaki posible. Gobierno ta sigui cu nan compromiso na un mercado transparente, husto y confiabel. E introduccion di handhaving p’e canasta basico ta forma parti di un serie di maneho cu Gabinete AVP-Futuro ta implementando pa modernisa e supervision economico y pone interes di e consumidor na prome lugar. Gobierno lo sigui informa comunidad tocante e implementacion di e medidanan aki y ta conta cu cooperacion di e sector comercial pa logra un sistema cu ta beneficia tanto consumidor como empresario, segun Minister Geoffrey Wever.

Siman pasa, Minister di Husticia, Integracion, Transporte Publico y Energia mr. drs. Arthur Dowers, a reuni cu e cadena di supervision di frontera pa dialoga riba e estado actual di diferente aspecto relaciona cu control di frontera, maneho migratorio y handhaving di personanan cu no tin un status legal na Aruba. E reunion a forma parti di e esfuerso continuo pa reforsa cooperacion entre tur instancia cu tin un rol den proteccion di frontera y ehecucion di ley. Durante e reunion, Minister Arthur Dowers a presenta un actualisacion di e programa Hunto pa Progreso y a comparti e prioridadnan strategico cu Gobierno a establece pa sigui modernisa y reforsa e cadena di handhaving migratorio. Representantenan di cada departamento a presenta nan pensamento, e desaroyonan actual y e retonan cu nan ta enfrentando den ehecucion di nan tarea. Minister Dowers a enfatisa cu un bon coordinacion entre e diferente partnernan ta esencial pa por mantene un sistema di supervision di frontera eficiente, moderno y efectivo. Tambe a indica cu e desaroyonan lo sigui concentra riba reforsa handhaving y bon coordinacion operativo entre e diferente instancianan cu ta forma parti di e cadena. Presente n’e reunion tabata representantenan di: Voortgangscommissie Grenstoezicht; Departamento di Asuntonan Huridico y Legislacion (DWJZ); Kustwacht Caribisch Gebied; Departamento di Integracion, Maneho y Admision di Stranhero (DIMAS); Douane Aruba; Cuerpo Policial Aruba (KPA); Inmigracion Aruba; Bureau Guarda Nos Costa (GNC); Bureau di Minister di Husticia y Bureau di Minister di Finansa. Solamente mediante cooperacion estrecho, comunicacion continuo y un vision comparti entre tur partner relevante, por sigui garantisa un frontera sigur, un sistema migratorio ordena y un ehecucion efectivo di leynan migratorio.

Manera informa anteriormente, Gobierno di Aruba a reconfirma cu frontera aereo entre Aruba y Venezuela a habri gradualmente entrante dia 1 di augustus 2026, esta for di diasabra ultimo. Den e prome fase e frontera aereo lo habri pa buelonan comercial cu lo por opera entre Aruba y Venezuela. Cada operacion mester cumpli cu aprobacion y condicionnan necesario di ambos pais. Pa loke ta trata e buelonan no-comercial (buelonan priva), Gobierno lo anuncia despues ki dia nan lo por cuminsa opera. Pa habri e categoria aki, mester tin preparacion y coordinacion adicional entre e diferente instancia concerni. Unabes cu e frontera habri, e buelonan comercial lo wordo autorisa segun e capacidadnan disponibel pa atende cu e buelonan aki debidamente. N’e manera aki ta duna contenido n’e compromiso pa habri e frontera aereo cu Venezuela dia 1 di augustus 2026, na un manera gradual y responsabel, p’asina restaura e conectividad aereo entre Venezuela y Aruba.

Financial Intelligence Unit Aruba, FIU-Aruba, ta pidi atencion di comunidad Arubano p’e asina yama ‘task-based-work y task scams’, esta, fraude cu trabao online. Den e tipo di fraude aki, personanan ta wordo acerca via WhatsApp, Telegram, SMS of media social cu un oferta atractivo pa gana placa facilmente, entre otro for di cas. E trabou cu nan ta ofrece ta parce simpel y inocente. Por ehempel, nan por pidi e victima pa sinta patras di nan computer y duna video un “like”, evalua producto, promociona tienda online of ehecuta otro tarea riba internet. Tin biaha e defraudadonan ta presenta nan mes como representante di companianan conoci of agencia di empleo. Nan por ta personanan normal tambe cu ta comparti nan experiencia y cuanto placa nan a gana cu esaki.

Con e fraude aki ta funciona? Despues di e prome contacto, e victima ta haya acceso na un website, aplicacion of cuenta online. Riba e plataforma aki, e victima ta mira cu supuestamente e ta acumula comision cu cada tarea cu e completa. Pa gana confiansa di e victima, tin biaha e defraudadonan ta paga un suma chikito na principio. Dor di esaki, e victima ta haya e impresion cu e trabou ta real y cu e plataforma ta confiabel. Despues e trampa ta cuminsa. E victima mester deposita su propio placa pa: * Haya tarea nobo of tarea cu supuestamente ta paga mas; * Completa un saldo cu a bira negativo; * subi pa un nivel mas halto; * libera un bono of comision; * of retira e placa cu supuestamente el a gana.

E sumanan cu nan ta pidi ta bira cada biaha mas grandi. Hopi biaha nan ta pidi pa e pago wordo haci via criptomoneda, pero nan por pidi tambe un transferencia bancario of pago via otro servicio di pago. E saldo y e ganashi cu ta aparece riba e plataforma no ta real. Ora e victima kier stop of retira su placa, e defraudadonan ta inventa gastonan nobo, impuesto of otro condicionnan. Finalmente, nan ta corta tur contacto y e victima ta keda cu e perdida financiero. Reconoce e senalnan di alerta Tene extra cuidou ora: * bo ricibi inesperadamente un oferta di trabou via WhatsApp, Telegram of SMS; * nan ta priminti bo hopi placa pa tareanan online masha simpel; * no tin un proceso cla pa solicita e trabou, un contrato di trabou of un empleador cu por wordo verifica; * bo mester paga bo propio placa prome cu bo por cuminsa traha; * nan ta pidi bo pa cumpra of manda criptomoneda; * nan ta pone bo bou di presion pa paga inmediatamente; * bo mester sigui haci deposito nobo pa por ricibi bo supuesto “ganashi”. Un dunado di trabao legitimo nunca ta pidi un empleado pa deposita su propio placa pa por ricibi salario of comision.

Kico bo mester haci? Para inmediatamente di haci pago y corta e contacto. No comparti documento di identidad, informacion bancario, codigo di verificacion, password, frase di recuperacion ni clave priva di un wallet di criptomoneda. Warda tur mensahe, captura di pantalla, number di telefon, adres di wallet, comprobante di pago y informacion tocante e plataforma cu a wordo uza. Tuma contacto inmediatamente cu bo banco y haci denuncia na Cuerpo Policial di Aruba (KPA). Tene cuidou tambe cu personanan cu despues ta ofrece pa recupera bo placa perdi a cambio di un pago. Esaki por ta un segundo intento di fraude. Tin varios manera cu criminalnan ta purba horta individuonan. Sea alerta pa loke inicialmente ta parse financieramente atractivo. Corda semper cu den un trabou legitimo, bo ta wordo paga. Nunca bo mester paga bo propio placa pa por ricibi bo salario of comision.

Minister di Finansa, Asunto Economico y Sector Primario mr. Geoffrey Wever a informa cu Prespuesto 2027 conforme e proceso legal a wordo entrega na Raad van Advies pa conseho. Despues cu College Aruba financieel toezicht (Caft) a duna conseho positivo riba e presupuesto 2027 y Gabinete AVP-FUTURO a tene cuenta cu recomendacionnan di CAft, e presupuesto 2027 a wordo manda pa Raad van Advies. Presupuesto 2027 ta premira un surplus p’e sector collectivo di Afl. 203 miyon florin, cu ta representa 2,3 porciento di e Producto Interno Bruto. Den e cuadro financiero 2028- 2031, Aruba ta presupuesta un surplus anual di por lo menos 1,5 porciento di e Producto Interno Bruto. Cu e normanan presenta, e “ontwerp-begroting 2027” pa awor ta cumpli cu e normanan presupuestario y reglanan di compensacion manera ancra den ley. Despues cu ricibi Raad van Advies su conseho riba e Presupuesto 2027 , Gabinete AVP-FUTURO lo traha como parti di e proceso legal e “Nader Rapport” p’asina entrega esaki oficialmente na Parlamento di Aruba manera ley ta prescribi. Minister Geoffrey Wever ta gradici Conseho di Minister, Departamento di Finansa y Departamento di Legislacion y Asunto Huridico p’e trabao realiza y cu ta wordo realiza na beneficio di pais Aruba.

Prome Minister Mike Eman, hunto cu Embahador di Reino Hulandes na Peru, Alexander Kofman, a reuni cu Presidente electo Keiko Fujimori na Palacio Torre Tagle na Lima. E audiencia a tuma lugar na bispo di e instalacion oficial di Keiko Fujimori como Presidente di Republica di Peru. Durante e encuentro, nan a papia riba e relacion entre Reino Hulandes y Peru, cu atencion special p’e lasonan entre Aruba y Peru. E delegacion a conta cu presencia tambe di Secretario General di Ministerio di Asunto General, Robert Candelaria, Director interino di Departamento di Relacionan Exterior (DBB) Juri Nicolas y Hefe di Prensa di Gabinete AVP-Futuro Marko Espinoza. Na salida di Palacio Torre Tagle, Prome Minister Eman a califica e combersacion como agradabel y productivo. “Hunto cu Embahador di Reino aki na Peru nos a bishita Presidente electo Keiko Fujimori. Tabata un combersacion agradabel. Nos a papia riba e temanan cu ta importante pa e relacion entre Reino Hulandes y Peru, y naturalmente tambe p’e relacion entre Aruba y Peru”, Mike Eman a duna di conoce. Prome Minister Eman a destaca cu Reino Hulandes ta mira hopi oportunidad pa fortalece su relacion cu Peru. Aruba por hunga un papel importante den e acercamento aki, teniendo cuenta cu su posicion den Caribe y e lazonan cu ya ta existi cu Peru. “Nos a usa e momento aki pa fortalece e relacionnan y presenta perspectiva nobo y cla pa futuro. Tabata un combersacion hopi productivo”, Mike Eman a bisa. Un di e posibilidadnan menciona durante e reunion ta establecimento di Wageningen University & Research na Aruba. Segun Prome Minister Eman, un presencia di Wageningen na Aruba eventualmente por brinda sosten tecnico na proyectonan y desaroyonan na Peru. Esaki por crea un situacion beneficioso pa Reino Hulandes, Aruba y Peru, especialmente den area relaciona cu agricultura, produccion di alimento, sostenibilidad y maneho di awa. Prome Minister Mike Eman a papia tambe riba e comunidad Peruano na Aruba y e contribucion importante cu su miembronan ta duna na desaroyo di nos pais. “Presidente electo Kiosko Fujimori ta consciente cu Aruba tin un comunidad Peruano cu ta sigui desaroyo di nos isla cu hopi atencion y cu ta contribui activamente na nos progreso. Nos a comparti e calor y simpatia cu tin entre nos, cu e deseo pa traha hunto na un futuro mihor pa nos pueblonan”, Eman a declara na Spaño. E Embahador a elogia tambe e hecho cu Prome Minister Eman a conduci e combersacion cu Keiko Fujimori na Spaño. Segun Kofman, uso di idioma a crea mas cercania y a fortalece e contacto personal durante e audiencia. Keiko Sofia Fujimori Higuchi a nace dia 25 di mei 1975 na Lima. E ta lider di partido Fuerza Popular y yiu di anterior Presidente Peruano Alberto Fujimori, kende a goberna Peru di 1990 pa 2000. Keiko Fujimori a sirbi como congresista di 2006 pa 2011 y a campaña varios biaha pa presidencia di Peru. Den eleccion presidencial di 2026, el a sali victorioso den e di dos buelta cu 50,135 porciento di e votonan valido. E autoridad electoral Peruano a proclame oficialmente como Presidente electo p’e periodo 2026-2031. Cu su huramentacion dia 28 di juli, Keiko Fujimori lo bira e prome muher eligi pa goberna Republica di Peru.

Prome Minister Mike Eman, hunto cu su delegacion, a tene un encuentro bilateral cu Presidente di Paraguay, Santiago Peña, na Lima. E reunion a tuma lugar den cuadro di e bishita oficial di Prome Minister na Peru pa instalacion di Presidente Keiko Fujimori. Durante e dialogo, ambos mandatario a expresa interes pa fortalece e relacion entre Aruba y Paraguay, cu enfasis riba conectividad aereo, comercio, turismo y exportacion di producto paraguayo pa Aruba. Un di e temanan central tabata e posibilidad pa crea mihor conexion entre Aruba y Paraguay, y mas cu e parti zuid di Sur America. Actualmente, falta di un conexion aereo ta un di e retonan principal pa desaroya e mercado Paraguayo. Apesar di e limitacion aki, Paraguay ta un mercado cu potencial pa Aruba. Un proporcion halto di bishitante Paraguayo ta escoge pa keda den hotel durante nan estadia na nos isla. E perfil aki ta haci Paraguay un mercado atractivo pa sector turistico Arubano. Presidente Santiago Peña a expresa interes pa mira Aruba como un socio comercial y como un posible entrada pa producto Paraguayo den Caribe. Entre e productonan cu Paraguay tin interes pa exporta ta carni y otro alimento. Aruba su sector hotelero, cantidad grandi di turista y necesidad pa importa producto ta crea oportunidad pa establece un relacion comercial mas directo. E bilateral a permiti ambos delegacion explora con conectividad, logistica y demanda local por wordo analisa, cu e meta di identifica oportunidad concreto pa comercio. Presidente Santiago Peña a invita Aruba pa explora un acercamento y posibel forma di uni cu MERCOSUR, un blok economico di pais den Sur America cual Paraguay ta forma parti. Un acercamento cu MERCOSUR por habri oportunidad nobo pa Aruba den comercio, inversion y relacion cu mercado di Sur America. E relacion entre ambos pais a haya un significado adicional recientemente durante e sesion internacional di programa Man and the Biosphere di UNESCO na Hernandarias, Paraguay. Durante e encuentro internacional aki, Aruba a wordo aproba oficialmente como Reserva di Biosfera di UNESCO. E reconocemento ta inclui henter teritorio di Aruba y su area maritimo como parti di Red Mundial di Reservanan di Biosfera. Aunke Prome Minister di Aruba no tabata fisicamente presente n’e sesion, nos pais a sigui y comparti e momento historico. E reconocemento ta confirma e compromiso di Aruba cu proteccion di naturalesa, sostenibilidad y un balance entre desaroyo economico y conservacion. E bilateral entre Prome Minister Mike Eman y Presidente Santiago Peña a crea un base nobo pa fortalece e relacion entre Aruba y Paraguay. Ambos pais a identifica oportunidad den conectividad, turismo, comercio y sostenibilidad, cu potencial pa genera beneficio mutuo y acerca Aruba mas na mercado di Sur America.

Mitar aña a pasa bai y te ainda no a tende nada di p.e. kende ta bira e proximo Presidente di SMAC, despues cu Darren van Ommeren a entrega su retiro di acuerdo cu statutonan di e organisacion. Mester a convoca caba un reunion cu e stakeholdernan den SMAC y eligi un Presidente nobo. Nada di esaki no a tuma lugar ainda. Dia 11 di november ta dijes “om de hoek”, esta 3 luna y mei ainda falta. Gobierno cu tambe ta duna su sosten financiero, kier mira su relato financiero di SMAC prome di dicidi di duna otro subsidio. E gruponan miembro di SMAC, aparentemente no ta interesa pa forza un reunion general y tin hasta ta di opinion cu laga Darren van Ommeren mes sigui dirigi cu organisacion, pasobra e ta haci un trabao. Esaki ta nifica cu nan mes ta violando nan statutonan, despues di a elimina SAC. T’e motibonan ey mes nan no tabata kier SAC mas y awor ta hacendo mesun errornan. Como Carnaval ta mas tempran otro aña, tin algun grupo so, cu a cuminsa prepara caba y sigur ta subi cayanan masha duro. E gruponan aki ta masha conoci, pero ta poco nan ta. Deseo di pueblo ta pa Aruba por sigui celebra Carnaval manera antes y no djies forma grupo pa baila riba caya. P’esaki mester tin organisacion y dirigentenan cu kier celebra Carnaval manera antes. Mescos por bisa cu e organisacion di musiconan. E presidente, Edwina Werleman tambe a anuncia su retiro, pero te awe no sa kende ta bira su susesor. Edwina Werleman ta wordo forza pa sigui guia e organisacion di musiconan. For di awe, faltanto un 3 luna y mei pa anuncia apertura di Carnaval, ainda tur cos ta hopi curu.

Recientemente Prome Minister Mike Eman a firma un asina yama Plan di Accion di e proyecto HART cu ta destina pa reorganisaion y transformaccion di terreno di e refineria. E grupo Hulandes aki ya ta bin ta trahando riba ki posibilidadnan tin y lo ehecuta a base di destahonan publico, unda esnan interesa lo tin cu mustra kico nan por haci y no ta cuestion di duna chens na ningun grupo. E hechonan aki tin e.o. e grupo di SNBA masha preocupa, pasobra nan no ta wordo envolvi den e proceso di maneho aki, siendo nan ta un grupo masha interesa y tin inversionistanan tambe cla pa e.o. inverti pa bin cu un planta up-graded di un refineria chiquito, cu por procesa crudo cu tin rond di nos. Errol de Freitas, Presidente di SNBA, hasta a pidi un reunion cu e Parlamentarionan cu manera el a yama nan, esnan di “Pariba di Brug” pa trata di tende ki plan tin. Errol de Freitas no mester dividi e isla chiquito aki. Tur Parlamentario eligi, ta un representante di pueblo y no di un districto. Tene esey semper den mente. Bolbiendo n’e proyecto HART, cu ta consisti di expertonan Hulandes berdad di e.o. TWO di e.o. den e marco un pakete di reforma den Landspakket lo facilitanan mes cu 3 specialista di halto nivel di e.o. Rijkswaterstaat y di Port of Ámsterdam. Pa yuda Aruba cu su expertonan kico pa haci cu facilidad y terreno di e refineria. Tur cos lo tin cu tuma lugar den fase y no pa haci tur cos liher, manera tin un dicho cos pura ta sali salu. Y aparentemente SNBA tin masha pura. Ta bon pa splica pakico. Pa maart 2027 mester tin mas claridad riba proyecto HART pa San Nicolas.

Parlamentario di AVP, Stephany Sevinger ta considera cu e resultado inicial di e programa Aruba Limpi ta confirma cu Aruba tabatin un necesidad urgente di crea un sistema organisa pa maneho di desperdicio. Sinembargo, no mester mira e iniciativa como un solucion temporal, sino como e prome stap den un vision nacional pa un Aruba mas limpi, mas saludabel y mas sostenibel. “Ora nos ta papia di desperdicio, nos no ta papia solamente di sushi, mata of matras bieu. Nos ta papia di con nos ta cuida nos pais, nos comunidad y e calidad di bida di nos pueblo,” Sevinger a declara. Segun e Parlamentario, e problema di desperdicio ilegal no a nace awe ni e ultimo añanan. Ta un reto cu durante hopi tempo a sigui crece y cu finalmente tabata pidi un accion decisivo. Sevinger a señala cu e cifranan presenta durante e debate e Parlamentario ta mustra cu e necesidad tabata real. Den solamente e prome luna di implementacion, mas cu 3.180 ciudadano a haci uzo di e facilidad, resultando den mas cu 642 ton di desperdicio recogi y 479 biahe di transporte. 642 ton no ta solamente un number. Esaki ta miles di articulo cu awor no ta contamina nos bario, nos mondi y nos paisahe. Entre e preguntanan cu Sevinger a plantea durante e debate t’e evaluacion tecnico cu a conduci n’e decision pa no laga SERLIMAR ehecuta e proyecto, e base di e presupuesto destina pa promocion di e campaña y e mecanismo cu lo preveni pago atrasa cu por genera interes innecesario pa Gobierno. Transparencia no ta obstaculisa progreso. Transparencia ta fortalece confianza den e decisionnan cu nos ta tuma. Pa Sevinger, e punto mas importante ta cu Aruba no por conforma su mes cu un contrato di solamente un aña. “Mi kier mira un vision cu ta bai mucho mas leu cu e solucion inmediato. Si den cinco aña nos ta move e mes cantidad di desperdicio, esey kiermen cu nos no a resolve e problema.” P'esey, e Parlamentario ta haci un yamada pa elabora un Plan Nacional di Maneho di Desperdicio, cu inclui metanan cla pa reduci desperdicio, fortalece reciclahe, modernisa infraestructura y amplia e rol di SERLIMAR den futuro. Un Aruba limpi no ta solamente bon p’e bishitante. Primeramente, e mester ta bon p’e mucha cu ta hunga den su bario, p’e famia cu ta biba aki y pa tur ciudadano cu kier sinti orguyo di su pais. Stephany Sevinger a expresa cu e programa Aruba Limpi mester wordo mira como un punto di salida pa un vision mas ambicioso. “Nos no mester keda contento cu djis haci Aruba limpi awe. Nos mester crea un sistema cu ta mantene Aruba limpi p’e siguiente generacionnan. Esaki t’e compromiso cu nos pueblo merece.”