Siman pasa Corte di Husticia a dicta un veredicto den un caso cu un ciudadano a entama contra di Island Finance pa cobranza di un tasa di interes hopi mas halto cu ta permiti. E ciudadano aki a tuma un prestamo na Island Finance na 2019 y awor a resulta cu Island Finance a cobre un interes cu a resulta mas cu 32%. For di e veredicto cu Corte a pronuncia na 2020 ta indica cu Island Finance a cobra un interes cu tabata demasiado halto y cu Island Finance tabata autorisa pa cobra 27%, cu tambe ta hopi halto. Comentario awe ta cu semper e interes cu Island Finance ta cobra ta hopi halto, pero el a ser permiti pa haci esey. Siman pasa Corte den su veredicto a duna di conoce cu e prestamo haci na 2019, e ciudadano a paga tur su debe y no tin nada mas di paga, ni tampoco e interes cu Island Finance ta demanda cu mester wordo paga. Huez a dicta cu e ciudadano no mester paga nada mas, lo contrario Island Finance mester compensa e ciudadano, loke el a paga di mas na Island Finance caba. Manera menciona e hecho aki a lanta masha comentario. Ta conoci cu institutonan cu ta presta placa, ta cobra un interes hopi halto, te cu ta wordo bisa, cu bo t haya ta paga bek 3 biaha e suma presta. Pero e pregunta cu ta wordo haci ta, kende t’esnan cu mester controla e institutonan aki? Na Aruba riba papel di un asina yama Consumenten Bond, pero nunca a funciona manera mester ta. Te awe dicho organo tin oficina y personal cu Gobierno ta paga. Elimine anto, si dicho Consumenten Bond no ta funciona. Pero tambe nos sa Banco Central di Aruba (CBA) recientemente a laga sa cu nan ta sigui fortalece su supervision riba e sector financiero dor di aplica un sistema basa riba riesgo. Segun e Financial Sector Supervision Report 2025, e metodo aki ta permiti CBA dirigi su recurso limitanan n’e institucionnan y area cu tin e mayor riesgo. Desde 2017, CBA ta uza un sistema di supervision cu no solamente ta reacciona ora problema ya a presenta, sino cu ta enfoca riba identifica y atende e causa principal di e riesgo prome cu e situacion empeora. CBA ta evalua regularmente diferente aspecto di banco, companianan di seguro y fondo di pension, incluyendo posicion financiero, gobernansa corporativo, maneho di riesgo, controlnan interno, cumplimiento di ley y riesgo relaciona cu tecnologia di informacion (IT). Segun e informe, e riesgonan mas importante identifica p’e institucionnan financiero ta gobernansa corporativo, maneho di riesgo, calidad di portafolio di inversion, controlnan interno, riesgo cibernetico, solvencia, liquidez, rentabilidad y calidad di prestamonan. Ora cu tuma nota di e publicacion aki, anto mester cuestiona CBA du papel di control. Unda e control a ser haci pa proteha e consumidor? Y no ta solamente Island Finance ta un di e institutonan cu ta duna presta, tin mas y te hasta tin negoshi cu ta duna un articulo di presta, cu facilidad di pago cu un interes halto. Pa ora di finalisa e pago, y e consumidor a paga dicho aparato dos biaha e suma pa cual el a ser bendi. Un biaha mas, kende tin cu proteha e consumidor? Y nos tin un Parlamento drumi cu no ta haci net nada pa proteha e consumidor. Lanta y ban traha pa proteha e pueblo aki.!!!~

Ombudsman Jurima Bryson den su ultimo relato,  a conclui cu SVb tabatin derecho legal pa cobra bek mas di Afl. 30.000 di AOV cu un pensionado a ricibi pa eror administrativo, pero e manera cu e proceso di recuperacion a wordo maneha tabata inapropia. Segun e investigacion, SVb no a detecta e eror na tempo, a cuminsa haci deduccion riba e pensioen prome cu emiti un decision formal y no a informa e pensionado di su derechonan pa presenta objecion of apelacion. Tambe no a coopera pa coregi e informacion fiscal di e ciudadano. Ombudsman a determina cu SVb a actua contra varios principio di bon gobernacion, incluyendo transparencia, seguridad huridico, trato respetuoso y derecho pa wordo scucha. E institucion a recomenda SVb pa mehora su controlnan interno, sigui e proceduranan administrativo corecto y tene mas cuenta cu e impacto cu erornan di Gobierno por tin riba ciudadanonan.

Entrante awe 13 te cu 17 di juli proximo, Secretario di Estado Eric van der Burg ta realisa un bishita di trabou n’e Islanan: Aruba, Bonaire y Corsou. Durante e bishita, refuerso di colaboracion den Reino, crecemento economico local y conservacion di naturalesa ta central. Pero Diabierne ultimo durante reunion di Conseho di Minister na Hulanda, Prome Minister Rob Jetten a haci un apelacion fuerte na Eric van der Burg pa den reunion cu Prome Minister Mike Eman y Minister Geofrey Wever, yega na un acuerdo riba e ley di HOFA. Un ley cu mester di aprobacion di tanto Tweede Kamer como di Parlamento di Aruba, cu manera lider di delegacion di Parlamento di Aruba ne reciente reunion di IPKO y tambe lider di MEP, Evelyn Wever Croes ta haya cu Aruba mester negocia e ley di HOFA totalmente di nobo. BONEIRO Secretario di Estado lo bay den combersacion cu Bestuurscollege di Bonaire tocante e reciente desaroyonan gubernamental. Tambe lo papia, entre otro, tocante progreso den e centro di procesa desperdicio Selibon Lagún y planificacion rond di introduccion di transporte publico riba e isla. Na Sorobon e lo haci un recorido dor di e mangrovenan. Esaki ta tuma lugar bou di direccion di e organisacion di naturalesa STINAPA. E retonan riba tereno di conservacion di naturalesa, clima y medio ambiente ta central den esaki. Tambe señor van der Burg kier obtene un bista di e Regiodeal. P'esey e ta bishita un cantidad di localidad caminda ta inverti den mehoracion di e logistica, infrastructura y sostenibilidad na Bonaire. En total, Reino ta inverti 13 miyon Euro den bienestar amplio na Boneiro. Mas aleu, e lo ricibi un recorido na WEB Bonaire pa haya un bista den e gran tareanan den produccion di awa di bebe y electricidad. ARUBA Diamars 14 di juli, Eric van der Burg ta yega Aruba. Riba agenda tin combersacion gubernamental cu Gobernador Alfonso Boekhoudt, Minister-President Mike Eman y Minister di Relacion den Reino, Enseñansa, Hubentud, Inovacion y Deporte, Gerlien Croes. Na Universidad di Aruba, señor van der Burg lo ricibi un presentacion tocante e Kingdom Start Up Program. Dentro di e programa aki, studiante di Aruba, Corsou y Sint Maarten ta traha hunto riba desaroyo di habilidad empresarial. Pa motibo di e reciente temblornan na Venezuela, Secretario di Estado ta bishita Crisis Management Office. For di ey a coordina asistencia for di Aruba pa Venezuela. Aki nan e lo papia, e.o., cu miembro di e ekipo di auxilio di Cruz Cora Aruba cu a bay Venezuela. Pa haya un impresion di e problematica di desperdicio na Aruba, Secretario di Estado ta bishita compania di procesamento di desperdicio y reciclahe Ecotech. Den cuadro di desaroyo economico, e ta bishita Vaper Trading. Esaki t’e prome compania na Aruba cu a uza e Borgstelling MKB-kredieten Aruba, Curaçao en Sint Maarten (BMKB ACS). E areglo aki ta specialmente pa empresario na Aruba, Corsou y Sint Maarten. Asina nan por presta placa mas facil pa inverti den nan compania. CORSOU Secretario di Estado van der Burg ta yega na Corsou diahuebs 16 di juli. E ta bishita Gobernador di Corsou, Mauritsz de Kort y tin un encuentro di introduccion mas profundo cu Premier Gilmar Pisas. Tambe e ta bishita Hof Comun di Husticia, Corte di Husticia di mas halto p’e paisnan y islanan Caribense dentro di Reino. Pa haya bista riba desaroyo sostenibel di haf di Corsou, señor van der Burg lo ricibi un recorido dor di haf den presencia di Minister di Desaroyo Economico Roderick Middelhof. Tambe Secretario di Estado ta bishita Blue Nap Americas. E centro di data aki ta maneha e datanan di mayoria di e instancianan gubernamental na Corsou.

Cinco marinier di ARUMIL a huramenta durante un ceremonia cu a tuma lugar na Marinierskazerne Savaneta. Durante e ceremonia tambe a tuma lugar diferente promocion, reconociendo e desaroyo profesional di varios otro miembro di ARUMIL. Durante e ceremonia a combersa cu Capitan Lourenço Teixeira, Comandante interino di ARUMIL, kende a splica cu e ceremonia tabata principalmente p’e 5 mariniernan cu a completa cu exito e mariniersopleiding. “Cinco marinier di ARUMIL a pasa cu exito e mariniersopleiding y awe nan a haci e eed of belofte. Ademas di esey, 4 marinier a ricibi promocion for di marinier di segunda clase pa prome clase. Tambe tin dos marinier cu a wordo promovi pa corporal den e grupo di seguridad di Marinierskazerne Savaneta,” segun Capitan Lourenço Teixeira. Entre e invitadonan special presente tabata Gobernador di Aruba, Alfonso Boekhoudt, Prome Minister Mike Eman, Comandante di Zeestrijdkrachten den Caribe, Walter Hansen, y e famianan di e militarnan cu a participa den e ceremonia. Capitan Lourenço Teixeira a indica cu e ultimo grupo di ARUMIL tambe ta marca un momento historico, paso pa prome biaha e unidad ta conta cu dos militar femenino. “Esey ta un paso importante pa ARUMIL. Pa prome biaha nos tin militar femenino den nos unidad,” el a señala. Reclutamento ta sigui ARUMIL ta sigui trahando activamente pa fortalece su organisacion. Segun Capitan Lourenço Teixeira, e campaña di reclutamento mas intensivo di e ultimo periodonan a trece resultado positivo. “Nos a intensifica nos reclutamento, tambe den comunidad. Awor nos tin un grupo cu lo cuminsa mariniersopleiding dia 30 di augustus, cu parcialmente lo tuma lugar na Corsou.” Despues di zomervakantie, ARUMIL lo lansa un plan nobo pa recluta mas hoben. Durante luna di augustus lo habri e siguiente vacatura pa mariniers y cu esey lo cuminsa e proceso di seleccion pa un siguiente grupo di candidato.

Sra. Gerlien Croes di Ministerio di Relacionnan den Reino, Educacion, Hubentud, Innovacion y Deporte a informa tocante e continuacion di e maneho pa reduci e tamaño di klas den enseñansa preparatorio (kleuter), basico y secundario (voortgezet) p’e aña escolar 2026-2027. E maneho aki, cu a keda introduci oficialmente desde e aña escolar anterior (2025-2026), tin como obhetivo principal pa garantisa un educacion di calidad halto y percura p’e bienestar integral di tanto e alumno como e docentenan. Den transcurso di e ultimo añanan, a nota un aumento continuo den e presion laboral riba e maestronan di scol, locual por pone e atencion individual cu cada alumno merece den peliger. Pa combati e desafio aki di forma directo, Ministerio ta keda pone enfasis riba su esfuerso pa stimula y mantene gruponan mas chikito y balansa. Cu continuacion di e norma aki ta premira pa logra e algun beneficio clave. E maestronan lo conta cu mas espacio y tempo pa responde n’e necesidadnan specifico y e ritmo di desaroyo di cada alumno. Tambe cu e implementacion aki kier hisa e satisfaccion laboral. Un reduccion directo den e carga di trabou di nos personal educativo, locual por contribui grandemente na nan motivacion y salud ocupacional. Por ultimo, e maneho aki lo por trece mihor rendimento academico: Grupo mas chikito, specialmente den e añanan crucial di formacion y desaroyo inicial, tin un impacto positivo riba e resultadonan di siñamento.

Di otro banda, Ministerio ta mantene e grandura minimo manera stipula den ley. Un klas mester consisti di un minimo di 16 alumno. E condicion aki ta keda primordial pa por garantisa e eficiencia den e maneho di recurso y pa fomenta un dinamica social sano, constructivo y participativo entre e alumnonan den e grupo.

Consciente di e desafionan logistico y organisatorio cu e stipulacionnan aki por trece cune p’e planificacion y formacion di personal, Minister ta extende un yamada na tur directiva di scol pa aplica e norma di 24 alumno mas exacto posibel, semper considerando e capacidad di e edificionan escolar y e personal disponibel. Den caso cu pa motibo di forsa mayor of circumstancianan excepcional un scol ta coriendo risico di sali fuera di e margen stipula (entre 16 y 24 alumno), Ministerio ta totalmente habri pa drenta den dialogo directo y busca solucion den forma coordina. Ministerio di Educacion ta reafirma su compromiso pa traha conhuntamente cu e directivanan di scol, Directie Onderwijs, y Dienst Inspectie van het Onderwijs p’asina percura pa un ambiente escolar mas saludabel y un structura di cuido educativo solido p’e futuro di Aruba.

Apesar cu Hof a tuma tempo extra (5 siman) pa yega na un decision den caso Diamante di Allan Howell, na final nan a yega practicamente na mesun sentencia cu Corte di Prome Instancia a dicta. E unico difrencia ta, cu Howell a haya un luna menos di castigo. Esaki ta loke cu e politico a scucha durante lesamento di e sentencia diarazon den oranan despues di merdia. E sentencia a tuma lugar na Corsou, unda abogado mr. Herrera tabata presente, mientras cu aki na Aruba Allan Howell a sigui e audiencia via di un video call den edificio di Corte. E lesamento di e sentencia tabata hopi breve di cual un parti ta bisa kico e caso ta, cu a yega n’e mesun decision cu Corte di Prome Instancia. Cu a tuma mas tempo pa yega na un decision, pa dicidi riba un verweer cu e abogado a trece dilanti. E hecho aki a crea tog un speranza cu e veredicto lo ta diferente, pero esaki no tabata e caso. Solamente e sentencia tabata un tiki diferente p’e simpel motibo cu a tarda hopi tempo, 5 siman. SI den prome instancia el a haya 24 luna di cual 6 ta condicional, 3 aña di prueba y un boet di 35 mil florin cu e mester paga, awor Allan Howell a haya e mesun castigo cu excepcion di e 24 luna cu a bira 23 luna. Pues un reduccion di un luna. Howell den un declaracion haci pafor di Cortea indica cu nan ta bai Corte di Casacion y lo haci esaki ya adelanta. Howell tabata trankil y a spera e veredicto aki. E no a pensa cu nan lo laga Ministerio Publico na caya. Pesey a cuminsa prepara pa Casacion. Kier men caso Diamante ta keda pendiente pa algun tempo mas.

Minister di Finansa, Geoffrey Wever, den compania di director di Departamento di Finansas Derrick Werleman, a entrega e Cuenta Anual 2025 di Pais Aruba na Algemene Rekenkamer. Entrega di e Cuenta Annual 2025 ta parti di e proceso legislativo pa responsabilisa entrada y gasto di Pais Aruba y ta representa un paso importante den fortalecemento di transparencia, disciplina y control den finansa publico. E aña aki t’e prome biaha cu a entrega e Cuenta Anual di pais Aruba asina tempran. Durante hopi aña Pais Aruba tabatin un atraso considerable den preparacion y entrega di su cuentanan anual. Den 2025, bou di liderazgo di Minister Geoffrey Wever hunto cu Departamento di Finansa y Centrale Accountantsdienst, Gobierno a realisa un recuperacion intensivo y a entrega e Cuentanan Anual 2021, 2022, 2023 y 2024. Cu entrega di e Cuenta Anual 2025, Pais Aruba a logra elimina e atraso historico y pone e proceso di rendicion di cuenta completamente al dia. Esaki ta nifica cu preparacion y entrega di e cuentanan anual no ta wordo trata mas como un ehercicio incidental pa recupera atraso, pero como un parti structural di un administracion financiero ordena. Di e forma aki Gobierno AVP-FUTURO ta fortalece e ciclo presupuestario y ta sigura cu entrada y gasto di Pais Aruba por wordo controla, evalua y hustifica na un forma transparente. Algemene Rekenkamer ta encarga, conforme Constitucion di Aruba, cu control riba legitimidad, efectividad y eficiencia di entrada y gasto di Pais Aruba. Algemene Rekenkamer lo controla si e cuentanan di 2025 ta completo, si nan a keda redacta conforme e proceduranan legal y presupuestario y si e recursonan publico a wordo uza pa logra e obhetivonan stipula. Gabinete AVP-FUTURO ta considera entrega di e Cuenta Anual 2025 como un resultado importante den e proceso pa pone finansa publico di Aruba permanentemente na ordo. “Stap pa stap, cu disciplina y colaboracion, nos a elimina e atraso y a restablece e proceso normal di rendicion di cuenta. Aruba mester tin un administracion financiero cu ta completo, transparente y confiabel. Esaki no ta solamente un obligacion legal; e ta un condicion esencial pa bon gobernacion y pa confiansa den maneho di fondonan publico,” Minister Wever a declara.

Como Presidente di Comision Permanente di Asunto di Reino y Relacion Exterior di Parlamento di Aruba, Parlamentario Jennifer Arends-Reyes a presidi un reunion importante cu e comision di experto cu actualmente ta investiga e asina yama “deficit democratico” den Reino Hulandes. Durante e reunion, miembronan di Parlamento di Aruba a sostene un dialogo habri y constructivo cu e expertonan tocante e posicion constitucional di Aruba, Corsou y St. Maarten den e structura di tuma di decision riba nivel di Reino. A duna atencion special n’e necesidad pa fortalece e participacion di e paisnan Caribeño den decisionnan cu ta afecta nan pueblo directamente. Segun Arends-Reyes, e reunion a brinda un oportunidad valioso pa comparti experiencia, preocupacion y sugerencianan practico tocante e funcionamento di Reino. Entre e temanan trata tabata e necesidad di mas consulta previo cu e paisnan Caribense, mehoracion di e proceso legislativo di Reino y fortalecemento di e rol di Parlamentonan local den asunto cu ta toca Reino. “Cooperacion den Reino mester basa riba respet mutuo, igualdad y reconocemento di e responsabilidadnan comparti cu nos tin. Ora tin decisionnan cu ta afecta nos comunidadnan directamente, ta importante cu nos paisnan por participa di un manera significativo den e proceso,” Jennifer Arends-Reyes a declara. E Parlamentario a enfatisa cu e deficit democratico no ta solamente un cuestion huridico of institucional, sino un asunto cu tin impacto real riba e confianza di ciudadano den democracia y den e relacion entre e paisnan di Reino. Segun Arends-Reyes, un Reino moderno y resistente mester sigui evoluciona pa sigura cu tur pais ta sinti cu nan voz ta wordo scucha y tuma na serio. Arends-Reyes a expresa su aprecio pa e trabou cu e comision di expertonan ta realizando y a indica cu e ta spera cu e investigacion lo resulta den recomendacionnan concreto y ehecutabel cu por contribui na un Reino mas democratico, transparente y balansa. Dialogo ta esencial, pero eventualmente nos mester traduci palabra den accion. E obhetivo final mester ta un Reino unda tur pais ta sinti cu nan voz ta conta y cu nan interesnan ta wordo considera cu e mesun respet y seriedad, Arends-Reyes a conclui.

Mr. Reinoud H. den Haan a asumi e cargo di Fiscal Mayor nobo di Aruba dia prome di juli 2026. El a wordo proponi pa Minister di Husticia mr. drs. Arthur Dowers, y siguientemente nombra pa Conseho di Minister pa un periodo di 4 aña. Señor den Haan (51 aña) ta bin di Ministerio Publico na Hulanda. Como Fiscal, el a adkiri experiencia amplio na varios di e fiscalianan na Hulanda y recientemente, di 2019 te 2022, el a sirbi como Abogado-General na Philipsburg, St. Maarten. El a ocupa diferente funcion di liderazgo na nivel senior den Ministerio Publico na Hulanda. Cu su experiencia y profesionalismo, e lo dedica e añanan benidero na sigui fortalece Ministerio Publico di Aruba.

Minister di Finansa, Geoffrey Wever a informa cu Gobiernoa entrega e Ontwerp Begroting 2027 na College Aruba financieel toezicht (CAft) pa conseho, conforme e proseso legal. Despues di ricibi e conseho di CAft, Gobierno lo entrega e presupuesto na Raad van Advies, acompaña cu su reaccion riba e conseho recibi. Meta ta pa Parlamento ricibi e presupuesto dentro di e termino legal prescribi. Presupuesto 2027 ta mas cu solamente un obligacion constitucional, e ta representa un paso importante den modernisacion di maneho financiero di Aruba. Pa prome biaha, e presupuesto ta wordo construi gradualmente riba e principio di policy-based budgeting, un sistema nobo caminda maneho, presupuesto y resultadonan ta wordo conecta directamente. Esaki significa cu e recursonan publico ta wordo alinea di forma mas directo cu e prioridadnan di maneho di Gobierno y cu e resultadonan cu Gobierno kier logra pa pueblo. E sistema nobo tambe ta fortalece transparencia, rendicion di cuenta y e posicion di Parlamento pa evalua y controla con recurso publico ta wordo inverti. Presupuesto 2027 ta sigui e rumbo fiha den programa di Gobernacion AVP-FUTURO 2025-2028. E ta enfoca riba finansas publico duradero como fundamento pa fortifica poder di compra, stimula actividad economico, diversifica nos economia y aumenta bienestar di pueblo. E presupuesto ta crea e balansa entre disciplina financiero y inversionnan strategico, permitiendo pa Gobierno sigui construi un economia mas resiliente y cu ta crea mas oportunidad pa futuro. Como parti di e structura nobo di e presupuesto, pa prome biaha ta introduci un clasificacion mas transparente di gasto y entradanan publico . Esaki ta distingui claramente entre gastonan operacional, gastonan di maneho y gastonan di financiamento, loke ta facilita un mihor comprondemento di con recurso publico ta wordo distribui y utilisa. Ademas, e Memorie van Toelichting ta brinda un bista mas amplio di prioridadnan di cada ministerio, cu informacion financiero y di maneho integra pa fortalece e proceso di decision y supervision democratico. E presupuesto ta basa riba un perspectiva economico positivo pa Aruba. E pronosticonan indica un crecemento nominal di economia di 4.1% pa 2027 y un saldo positivo di 1%, manteniendo conformidad cu e normanan di sostenibilidad financiero. E resultadonan aki ta confirma cu disciplina presupuestario y maneho financiero responsabel ta crea espacio pa sigui inverti den prioridadnan nacional sin compromete stabilidad financiero di Aruba. Un presupuesto no ta simplemente un coleccion di cifra. T’e instrumento principal cu Gobierno tin pa converti maneho den resultado concreto pa nos pueblo. Cu Presupuesto 2027 nos ta haci un paso importante pa conecta cada florin cu un objetivo cla, un prioridad di maneho y un beneficio pa comunidad. Asina nos ta sigui construi un Gobierno cu ta mas transparente, mas responsabel y cu ta maneha recurso publico cu vision pa futuro, Minister Geoffrey Wever a declara.

Durante un lectura cu Arsobispo Charles Jason Gordon mey-mey di diferente lider religioso y participante, Prome Minister Mike Eman a expresa su gratitud cu e Arsobispo a acepta e invitacion pa comparti e reflexion moral di Iglesia Catolico tocante Inteligencia Artificial. Den su introduccion, Eman a bisa cu e mundo ta busca sentido y direccion den un tempo unda tecnologia ta avansa rapidamente. Segun e Prome Minister, hustamente den e contexto aki ta importante pa tin un compas moral cu por guia e decisionnan cu nos ta tuma como sociedad. E charla a tuma lugar siman pasa diabierna mainta na Cas Veneranda. Eman a explica cu e reflexion moral di Iglesia riba e tema aki no ta algo nobo, sino cu tin su origen den e Rerum Novarum di Papa Leo XIII, cu a responde n’e cambionan grandi cu Revolucion Industrial a trece. Aunke e revolucion ey a crea progreso economico, tambe el a trece problema serio, manera trabou infantil, condicionnan di trabou inhumano y falta di respet pa dignidad humano. Pa motibo ey, Iglesia y Gobiernonan a cuminsa formula principionan etico pa proteha hende. Durante su discurso, Eman a referi n’e filosofo Martin Buber y su concepto di “I and It”, caminda un relacion por keda solamente funcional y transaccional. Como ehempel, el a menciona e relacion entre un turista y un taxista, cu por evoluciona for di un simple servicio di transporte pa un amistad berdadero ora personanan conoce otro, comprende otro y crea un conexion humano. Tambe el a menciona e filosofo Emmanuel Levinas y su concepto di “The Other”, enfatisando cu un sociedad sano mester mira e otro persona como algo cu tin dignidad, deseo y aspiracion propio. Segun Eman, tecnologia no por haci cu nos ta perde e capacidad pa comprende otro hende ni pone distancia entre e personanan. E Prome Minister a señala cu precisamente pa motibo di e desaroyonan tecnologico rapido, Gobierno di Aruba a adopta e bienestar comun (the common good) como un di e principionan cu ta guia su politica publico. El a indica cu e concepto aki no por sobrebiba sin un fundacion moral fuerte, construyi pa famia, comunidad, iglesia y otro institucionnan social. Na final di su introduccion, Mike Eman a conta con e encuentro cu Arsobispo Gordon anteriormente a resulta den un dialogo tocante e bienestar comun. Ora el a lesa e enciclica nobo riba Inteligencia Artificial, el a mira e oportunidad perfecto pa invita e Arsobispo Aruba y comparti e reflexion aki cu lidernan y representante di diferente sector den nos comunidad. El a gradici Arsobispo Gordon pa su presencia, y tambe e personanan cu a yuda haci e encuentro posibel, expresando su speransa cu e lectura lo contribui na un dialogo profundo tocante con tecnologia por sigui sirbi humanidad, respetando semper dignidad humano y e bienestar comun.

Parlamentario di AVP, Otami Thomasia, ta considera cu Aruba a yega na un punto decisivo den su desaroyo sostenibel. Segun e Parlamentario, despues di e paso importante cu pais a tuma pa reduci e uzo di plastic di un solo uso, ta tempo pa sigui avansa cu un sistema nacional di reciclahe moderno y cu un vision di largo plazo. Otami Thomasia a recorda cu e prohibicion riba saco di plastic, caha di foam y diferente utensilio desechabel a mustra cu Aruba ta capaz di tuma decisionnan balente ora tin un vision cla pa proteha medio ambiente. “E decisionnan ey a mustra cu, aunke algun medida no tabata popular na principio, nan a contribui na un Aruba mas limpi y a crea mas consenshi ambiental. Awor nos mester sigui cu e mesun determinacion,” Thomasia a declara. Segun e Parlamentario, un di e pasonan mas importante ta reforma Serlimar pa responde n’e necesidadnan moderno di maneho di deshecho. Serlimar no mester limita su funcion solamente na recoge y deposita sushi. E instituto mester evoluciona pa bira un centro nacional di reciclahe, recuperacion di recurso y inovacion den sostenibilidad. E ta propone p’e transformacion aki inclui inversion den facilidadnan moderno pa separa material reciclabel, desaroyo di instalacionnan pa compostahe di desperdicio organico, cooperacion cu sector priva y partnernan internacional, y creacion di trabounan berde cu ta fortalece economia circular di Aruba. Thomasia a conclui cu Aruba no por perde e momentum crea dor di e medidanan ambiental cu ya a wordo implementa. E ta haci un yamada pa sigui avansa cu vision, liderazgo y decisionnan estructural cu prepara pais p’e retonan ambiental di futuro. E decisionnan cu nos ta tuma awe lo determina e Aruba cu nos muchanan y e siguiente generacionnan lo hereda mañan. Ta tempo pa tuma e siguiente paso.

Aruba a marca un otro paso importante den e fortalecemento di su conectividad regional cu e inauguracion oficial di e ruta directo nobo di Wingo entre Barranquilla y Aruba. Durante e celebracion na Aeropuerto Internacional Reina Beatrix, tambe a reconoce e lansamento reciente di e ruta entre Bucaramanga y Aruba, ampliando ainda mas e aceso entre Aruba y Colombia. E ceremonia a reuni Minister Wendrick Cicilia , representantenan di Wingo, ehecutivonan di Aruba Airport Authority (AAA), Aruba Tourism Authority (A.T.A.) y diferente stakeholder den e industria di turismo pa celebra e logro importante aki den expansion di e conectividad aereo di Aruba. Wendrick Cicilia, a destaca cu e rutanan nobo aki ta resultado di un vision cla pa diversifica nos mercado, fortalece conectividad y crea oportunidadnan nobo pa pueblo di Aruba. Cada ruta nobo cu nos logra atrae ta habri porta pa mas oportunidad. E conexionnan cu Barranquilla y Bucaramanga no solamente ta impulsa turismo, pero tambe ta facilita comercio, inversion, cuido medico, reunificacion familiar y intercambio cultural. Nos ta sigui traha pa un Aruba mas conecta, competitivo y cu mas oportunidad pa nos comunidad. E resultado di e prome buelo ta confirma e potencial fuerte di e ruta nobo aki. E buelo inaugural for di Barranquilla a yega na Aruba cu un ocupacion di mas cu 90%, mientras cu e buelo di regreso ta sali cu un ocupacion di 98%, reflehando e demanda fuerte pa conectividad entre tur dos destinacion. Cu e logro di Barranquilla, Wingo awor ta conecta Aruba directamente cu 5 ciudad na Colombia, fortaleciendo ainda mas e relacion entre tur dos pais y ampliando e oportunidadnan pa turismo, reunion familiar, cuido medico y intercambio comercial.

Prome Minister Mike Eman a participa na apertura oficial di e exposicion “Letra y Consenshi: Balor Humano di un Pueblo” na Biblioteca Nacional San Nicolas. E exposicion ta invita comunidad pa reflexiona riba historia di sclavitud na Aruba y e balor di dignidad humano, precisamente na bispo di Dia Nacional di Conmemoracion pa Abolicion di Sclavitud. E ceremonia a cuminsa cu palabra di bon-bini di Ichmarah Kock di Biblioteca Nacional Aruba, sigui pa un mensahe di Directora Astrid Britten. Prome Minister Mike Eman a dirigi palabra n’esnan presente, despues di cual e programa a continua cu un presentacion poetico di Tasho the Poet, un presentacion di Marushka Tromp tocante UNESCO Memory of the World, un mensahe graba di Memory of the World Nederland, un presentacion di Raymond Hernandez, kende ta Director di Archivo Nacional Aruba tocante e documentonan relaciona cu sclavitud, un dramatisacion artistico, palabra di Jefka Alberto cu a representa e Comite di Conmemoracion Pasado di Sclavitud y un introduccion oficial di e exposicion dor di Renwick Heronimo. Den su discurso, Prome Minister Eman a destaca cu ta importante pa comunidad mira e periodo di sclavitud, reconoce e hechonan cu a tuma lugar y acepta cu tabatin un epoca den cual humanidad no tabata trata tur hende cu igualdad y dignidad. El a señala cu solamente ora nos ta dispuesto pa reconoce e pasado, nos por sigui corigi loke a sosode y traha pa evita cu circunstancianan similar no ripiti nunca mas. Den e contexto ey, el a menciona tambe e disculpa oficial cu anteriormente a wordo expresa na nomber di Reino Hulandes y a indica cu cada generacion tin responsabilidad pa carga e balornan di respeto, igualdad y dignidad humano. Prome Minister Eman tambe a comparti un reflexion personal tocante su propio historia familiar. Durante un bishita na Archivo Nacional Aruba, el a siña cu su tatarawelo Cornelis Eman a casa cu un señora Capriles, kende su tata tabata un mucha cu a nace for di un mama cu tabata sclavisa. Segun el, e descubrimento aki a mustra con hopi famia Arubiano ta carga diferente parti di e historia aki y con e pasado di Aruba ta comparti pa hopi generacion. Durante su discurso, el a enfatisa cu e historia di sclavitud no ta solamente trata di pasado, sino tambe di e responsabilidad continuo pa proteha e balornan cu ta sostene nos sociedad. El a señala cu e conflicto y e gueranan cu mundo ta enfrenta awe ta recorda con civilisacion ta fragil y con rapidamente humanidad por perde e balornan di respeto y dignidad si nan no ta wordo cuida. Un di e documentonan central di e exposicion t’e asina yama “Carta Capriles”, un carta scirbi na 1857 dor di Juan Bautista Capriles y otro ciudadano Arubiano, den cual nan a informa e Gezaghebber di e tempo tocante maltrato contra e personanan sclavisa. E documento ta mustra cu ainda prome cu emancipacion na 1863 tabatin e hendenan na Aruba cu a hisa nan bos pa defende dignidad humano. E Carta Capriles ta forma parti di e coleccion di documentonan historico cu na 2025 a wordo inscribi den UNESCO su Registro Memoria di Mundo, reconociendo nan importancia pa patrimonio documental mundial. Na final di su discurso, Prome Minister Eman a expresa su aprecio na Archivo Nacional Aruba, Biblioteca Nacional Aruba, UNESCO y tur e expertonan cu durante hopi aña a dedica nan mes na investiga, preserva y digitalisa e documentonan historico aki. El a destaca cu nan esfuerso ta sigura cu e historia di Aruba keda accesibel pa futuro generacion y cu conocemento ta un instrumento importante pa evita cu e paginanan scur di historia no ripiti nunca mas.

Huez di Corte di Prome Instancia a bai di acuerdo cu demanda di Ministerio Publico, cu a exigi 13 aña di prison contra Israel Paesch (40), acusa di a tira mata su primo Rene Paesch dia 23 di augustus 2025 na Coba Lodo. E exigencia a wordo presenta den Corte di Husticia durante un audiencia largo caminda a trata e circunstancianan cu a conduci n’e tiramento fatal ampliamente. Segun Fiscal, e investigacion a mustra cu Israel y Rene tabatin un conflicto cu a dura varios aña, relaciona cu un asalto arma y disputanan financiero cu data for di 2018. Ministerio Publico ta di opinion cu Israel a busca confrontacion cu Rene y a provoca e situacion cu finalmente a resulta den e muerte di su primo. Durante tratamento di e caso, a sali na cla cu Rene a sufri tres herida di bala, incluyendo dos den pecho. Investigacion forense tambe a indica cu e victima a wordo golpia na cabez cu e pistool, mientras ainda tabata na bida. Rene finalmente a perde su bida dor di hemoragia interno. Israel a declara cu el a actua for di miedo, alegando cu Rene tabata menaza constantemente y cu el a pensa cu su bida tabata den peligro.  Raportnan di un psychiater y psycologo presenta den Corte a mustra cu Israel ta parcialmente menos responsabel pa su actonan dor di problema mental y uso di alcohol y marihuana. Apesar di esey, e expertonan a conclui cu el por wordo considera criminalmente responsabel. Ademas di e caso di homicidio, Polis tambe a haya 465 gram di cocaina den un apartamento propiedad unda Israel ta biba. El a nenga cu e droga tabata di dje, pero Fiscal a bisa cu e splicacion presenta no ta creibel. Familia di e victima a presenta un demanda civil pa compensacion financiero relaciona cu gastonan di entierro, daño emocional y gastonan legal. Mester bisa cu Gilberto Paesch, tata di e acusado Israel Paesch, kende algun luna pasa a asesina su primo Rene Paesch