Reciente mi tabata na Gdansk, Polonia pa ta testigo di un hoben Arubiano, yama T’Jay Farro, kende a dicidi di participa n’e competencia di The Iron Man Gdynia, Poland. El a inscirbi su mes pa representa Hulanda, pero de facto cu su pensamento ta Aruba e ta representa, pa cual tabatin un delegacion chiquito, encabesa pa su mayornan Glenn y Miguela Farro y un grupo di famia y amigonan di T’Jay. T’Jay tin mucha historia di conta. E tabata na varios parti di mundo, semper den naturaleza, aventuranan extrema. P.e. asina el a cuminsa na Aruba cu board-sufring na costa nort di Aruba den bruto ey. El a bula na altura di 50m+ naRio Nile River na Uganda. El a participa na mesun rio ey pa loke ta rafting. T’Jay te prome Arubiano cu a subi Mount Kilimanjaro na Tanzania, Africa y asina nos por sigui cu mas aventura di su persona. Recientemente el a dicidi di prepara su mes pa participa n’e competencia di The Iron Man Gdynia na Polonia y el a logra su meta. E no a cana e competencia, pero si a score masha halto mes for di 1200 participante. Pesey awe nos ta pone den luz positivo pa mustra Aruba cu nan tin un atleta den exterior cu ta tene nomber di Aruba masha na halto. E mes ta trahando na Hulanda y tin intencion pa sigui participa na mas deporte extrem. E biaha aki el a participa cu landamento, core biscileta pa finalisa careda na pia. T’Jay masha pabien cu bo logro y pabien na bo mayornan, bo comprometida, famia y amigonan cu a sostenebo den e competencia aki.

Den Noticia a tuma nota di un publicacion di diahuebs ultimo den 24Ora.com cu a hala nos atencion, cu merece un investigacion profundo. Ta di spera cu asina cu reces Parlamentario finalisa proximamente, cu e Parlamentarionan cuminsa haci nan trabao cu mas seriedad, Segun e publicacion, recientemente e ekipo di defensa di Refineria di Aruba (RdA), encabesa pa abogado mr. Lincoln “Dello” Gomez a entrega un keho formal na Corte Comun di Caribe Hulandes (Hof) contra e decision di Fiscal di Ministerio Publico. E keho ta relaciona cu e decision di e Fiscal di no kier investiga un fraude den un compania estatal, RdA, debi na falta di recherche.  No ta nos intencion pa publica henter e relato cu 24Ora.com a publica, pero si kier señala seriedad di e caso aki, cu no por asina no mas, Fiscal di Ministerio Publico ta sconde tras di e hecho cu pa falta di Recherche no por haci e investigacion. Consecuentemente Hof a manda pidi Procurador General pa pone riba papel dicon nan decision p’asina e tres Huesnan por pone e keho y e splicacion di Ministerio Publico banda di otro p’asina nan tuma un decision final. Procurador General a haya te 16 di september 2026 pa por presenta e motibo oficial dicon el a dicidi di no persigui e sospechosonan penalmente, pero a conseha RdA pa canalisa e caminda civil.  Kico a conduci n’e investigacion haci aki. T’asina cu recientemente a tuma lugar un investigacion interno den Refineria di Aruba (RdA) relaciona cu e transaccion di e “Pilot Boat” bao di e nomber Gutu, un boto cu ta propiedad di RdA mes. Si conta loke a bende e boto y cuanto mester a bend’e, anto por conclui claramente cu a estafa RdA por lo menos 100.000 florin. Gutu ta un Pilot Boat, propiedad di Refineria di Aruba N.V., y cu a keda den e area administra p’e compania Terminal di Energia Aruba N.V. (TDEA), un compania subsidiario di RDA. Dicho embarcacion, esta Gutu, a sali for di servicio activo na aña 2020, pero esaki a permanece den e area maritimo di RDA y tabata mara na inspeccionnan regular y supervision diario haci pa personal maritimo. Den e periodo entre aña 2020 y 2023, no tabatin ningun palabracion notula ni urgencia di parti di RDA pa bende e embarcacion (Gutu). Tampoco tabatin indicacion cu e propiedad (Gutu) lo tabata wordo considera como un caso excepcional cu ta rekeri accion inmediato. A bin sali na cla cu dia 22 di november 2023 pa 11:49 am, a drenta un email di parti di Eneomar Ollarves, uzando e email adress “[email protected].” Den e corespondencia a presenta un oferta formal pa compra di e boto piloto Gutu pa un suma di USD 30.000 (dollar Mericano). E oferta a wordo presenta den nomber di Pull Marin Services, un entidad cu a identifica su mes como un compania localisa na Panama.

Menos di un ora despues, pa ta exacto den 42 minuut, pa aproximadamente 12:31 pm, Richard R. (Ricky) Lacle Jr., kende n’e momento ey tabata ocupa e posicion di Director General Interino di Refineria di Aruba N.V., a indica cu un respuesta por medio di un email cu e oferta a keda aproba. Despues di esaki, (Ricky) a sigui na instrui e departamento financiero pa prepara e documentacion necesario pa formalisa e transaccion di e compra y benta di e Pilot Boat. Den tur esaki e departamento maritimo no a wordo consulta previamente, tampoco no tin documentacion cu a solicita un evaluacion independiente di e balor di e Pilot Boat Gutu. Tampoco tin indicacion cu e Hunta Directiva di RDA, asesornan legal of otro departamento relevante a participa den e proceso di tumamento di e decision aki. Ademas, te n’e momento ey, Pull Marine Services no tabata un compania conoci ni aproba pa RDA como un bendedor y of un proveedor. Contrario na tur esaki, pa 14 luna largo Richard R (Ricky) Lacle Jr. a keda ricibi raportahe mensual di inspeccionan haci n’e Pilot Boat Gutu. Esaki ta un indicacion cu e tabata na altura cu tur gasto cu ta regarda e Pilot Boat Gutu a keda core riba cuenta di RDA apesar di e benta cu a tuma lugar. Asina, e lunanan a pasa y e situacion operacional di Gutu a permanece practicamente sin cambio, apesar cu administrativamente e tabata figura como bendi. Tabata dia 11 di februari 2026 cu ing. Robert Henriquez, e Director General actual di Refineria di Aruba N.V. (RDA), a descubri e existencia di e transaccion di benta di e Pilot Boat Gutu. Door di esaki, Henriquez a contacta Ollarves pa demanda pagonan habri pa cu e docking di e Pilot Boat Gutu na TDEA. E descubrimento aki posteriormente a conduci na un investigacion interno en busca di mas informacion y documentacion. T’e ora a bin descubri cu nunca a busca ni traslada e boto pa ningun cumprado. Segun e evaluacion haci dor un Inspector Maritimo, e prijs di mercado di Pilot Boat Gutu n’e momento ey tabata aproximadamente USD 90.000. Cu tur e pruebanan riba mesa di con a estafa RdA, e Director actual ing. Robert Henriquez, dia 24 di februari 2026, a haci un denuncia oficial na Recherche, cu e peticion na Ministerio Publico di Aruba pa cuminsa un investigacion urgente a base di sospecho di delitonan cometi menciona den e rapport di RDA. Sinembargo, dia 27 di maart 2026, Fiscal den nomber di Ministerio Publico di Aruba ta manda un carta na RdA pa informa cu no por trata e denuncia entrega y cu no lo sigui cu un investigacion penal den esaki. Den e carta ta duna RdA e opcion y libertad di sigui cu un caso civil si ta desea esaki. Un proceso (caso) civil no por ni mag di ta un sustituto pa un proceso penal. Den carta di Ministerio Publico a duna indicacion cu RdA tin caminda pa cana y por sigui cu un proceso civil. E posibilidad ey realmente ta existi, pero e no por sustitui ni reemplasa un proceso penal. Engaño, fraude, estafa, falsificacion di documento y desvio den funcion y malversacion di servicio den relacion di trabou ta delitonan penal. No por considera cu un demanda (caso) civil contra un partido cu ta parcialmente ficticio of desconoci, por proteha e ordo legal den derecho penal.

Aruba tin mester di un rumbo duradero, prome cu ta mucho laat, asina Ivo Valdez, Presidente di OPPA a duna di conoce den un Carta Habri na Prome Minister Mike Eman y su Gabinete. Parlamento y varios otro instancia a haya copia di e carta aki tambe Aruba ta para na un punto decisivo. Nos a reuni diferente biaha caba pa papia di e problemanan cu Aruba y su ciudadanonan ta enfrenta diariamente. Pero, ta bon pa cada un participante realisa cu e pueblo di Aruba no ta spera mas palabra, nan ta spera accion.

Tur hende riba e isla aki ta sinti e presion: Den supermercado; den farmacia; cu e factura di luz y awa, y aun mas duro...; riba nan mesa na cas. E pregunta cu nos mester haci nos mes awe ta simpel: Nos lo sigui administra crisis... of nos lo tene e curashi pa cambia rumbo? Nos isla, cu durante hopi aña a florece danki na turismo, awor ta enfrentando e consecuencianan innegabel di un strategia economico unilateral y falta di un bon maneho di planificacion teritorial. Overtourism, falta di casnan, infracstructura contamina y anticua, perdida di naturalesa y desigualdad social no ta e amenasanan abstracto mas; nan a bira nos realidad di tur dia. Si nos sigui den e mesun rumbo aki, nos no solamente ta riscando perdida di nos naturalesa y calidad di bida, sino tambe di nos stabilidad economico.

A yega e momento pa un cambio fundamental di rumbo. Pa logra esey e Dialogo Social Nacional ta un mecanismo pa nos tur como ciudadano sinta hunto y bin cu e plannan necesario pa atende cu tur e retonan cu Aruba ta enfrentando. Desaroyo duradero no ta un luho; e ta un nesesidad. E desafionan ta cla: Demasiado hotel y acomodacion turistico a crea un presion ecologico, problema di trafico, sobrecarga di sushi y falta di awa. Nos infracstructura ta anticua y no ta prepara p'e volumen actual di turismo y crecemento demografico. Mercado di vivienda a bira inaccesibel pa hopi Arubiano comun, specialmente e hobennan. Mercado laboral ta depende hopi riba trahadornan temporal for di otro pais, loke ta pone mas presion riba servicionan social y ta reta integracion. Areanan natural ta wordo amenasa pa e proyectonan di construcion, tiramento ilegal di sushi y falta di proteccion.

P'esey nos ta haci e siguiente yamada cu algun recomendacion concreto: 1. Un moratorio di por lo menos 5 aña riba construccion di hotel nobo No otorga mas permiso pa desaroyo turistico te ora un estudio profundo di e impacto a wordo completa y ta comproba ku ainda tin espacio den nos infracstructura y den capacidad ecologico di nos isla. 2. Un Plan Nacional di Ordenansa Teritorial: Desaroya y implementa un plan di desaroyo teritorial cu forsa di ley, cu ta defini zona pa naturalesa, vivienda, agricultura, turismo y industria. Politica di tereno (DIP) mester bira mas transparente y orienta n'e interes general. 3. Vivienda accesibel como prioridad nacional: Tereno di Gobierno mester wordo destina pa construccion di casnan social y pa clase medio. Limita speculacion cu tereno pa no-residente. Fomenta modelonan di vivienda cooperativo y duna mas espacio na desaroyadornan local. 4. Diversificacion economico: Inverti den sectornan manera: Energia duradero (solo y biento); Agricultura y seguridad alimentario; Tecnologia di informacion (ICT) y servicio digital. Conocemento y enseñansa (Aruba como un centro di conocemento den Caribe). 5. Renobacion y sostenibilidad di infrastructura: Modernisa e planta di purificacion di awa sushi (RWZI); Introduci solucion moderno di mobilidad, manera caminda pa bicicleta, transporte publico eficiente; Fortalece maneho di sushi, reciclahe y un economia circular. 6. Proteccion di naturalesa y patrimonio: Establece zona cu proteccion legal p'e areanan vulnerabel; Haci cumpli cu ley (handhaving) contra construccion ilegal y contaminacion; Inverti den maneho di naturalesa, educacion y ecoturismo. 7. Participacion inclusivo di pueblo: Involucra e ciudadanonan, e hobennan, bario y e organisacionnan social activamente den proceso di tuma decision. Transparensia, participacion y rendicion di cuenta t'e yabi pa logra un amplio sosten di comunidad.

Nos ta kere cu un futuro diferente ta posibel. Desaroyo duradero no kier men "menos crecemento", sino un crecemento mihor, ordena, mas husto y orienta riba futuro. Aruba por bira un ehemplo p'e resto di Caribe, pero solamente si nos actua awor, cu vision, balor y sentido di responsabilidad. A bira tempo pa un politica cu ta mira mas leu cu e siguiente eleccion. A bira tempo pa Aruba scoge pa un balansa entre hende, naturalesa y economia. Nos ta cla pa un Aruba duradero.

Dialogo social no mester bira un ehercicio di palabra y frasenan bunita. Si despues di e dialogo nada no cambia, e pueblo lo perde confianza completamente. E pueblo ta wak. E pensionado ta cansa. E trahador ta sinti presion cada dia. Awor t'e momento pa liderazgo berdadero. No pa proteha interes particular, pero pa proteha Aruba. Nos ta sera cu un mensahe simpel: Nos no kier mas promesa. Nos kier decision. Decision cu ta pone hende prome. Decision cu ta duna nos isla un futuro digno. Asina Ivo Valdez, Presidente di OPPA a finalisa su Carta Habri.

Manera splica den un articulo anterior, tin un caso cu 24Ora a publica cu a haya masha atencion, sigur cu despues un grupo di abogado pa Refineria di Aruba (RDA) constata cu tin basta iregularidad a y ta tumando lugar den e refineria. Denuncia a ser haci, pero awor un Fiscal di Ministerio Publico a laga sa cu nan no por haci ningun investigacion penal, pasobra no tin suficiente Recherche pa haci e trabao. Un ponencia masha ridiculo, pasobra si no tin suficiente Polis pa haci e investigacion, por pidi colaboracion di otro miembronan den Reino Hulandes. No ta pornada e Ministernan di Husticia di Reino Hulandes ta reuni cadaa kwartaal pa mira con nan por yuda otro. N’e reunionnan ta participa den cada delegacion miembronan di Ministerio Publico, di e respectivo Hefenan di Polis di cada pais, pues nan ta debidamente na altura kico por haci. No por laba man asi no mas, y core pa nan responsabilidad y sconde cu no tin suficiente Recherche pa haci e trabao. Si t’asina ta, tur alto funcionario por wel di comete estafa, ladronicia, malversacion, etc., pasobra nan lo no wordo persigui tog. No por!!! Continuando cu e denuncia haci, cu a haya nomber di Gutu, cu ta regrada e Pilot Boat Gutu. Cu maske a ser bisa di a ser bendi, cu ta regarda e Pilot Boat Gutu a keda core riba cuenta diRDA apesar di e benta. Den esaki tampoco no a encontra algun indicacion cu un miembro di RDA y of e Hunta Directiva lo a wordo poni na altura encuanto e transaccion di e compra y benta di Gutu. Asina, e lunanan a pasa y e situacion operacional di Gutu a permanece practicamente sin cambio, apesar cu administrativamente e tabata figura como bendi. Tabata dia 11 di februari 2026 cu ing. Robert Henriquez, e Director General actual di Refineria di Aruba N.V. (RDA), a descubri e existencia di e transaccion di benta di e Pilot Boat Gutu. Dor di esaki, Henriquez a contacta Ollarves pa demanda pagonan habri pa cu e docking di e Pilot Boat Gutu na TDEA. E descubrimento aki posteriormente a conduci na un investigacion interno en busca di mas informacion y documentacion. T’e ora a bin descubri cu nunca a busca ni traslada e boto pa ningun cumprador. Segun e evaluacion haci door un Inspector Maritimo, e prijs di mercado di Pilot Boat Gutu n’e momento ey tabata aproximadamente USD 90.000. Pero kende ta Pull Marine Services, cu lo t’e compania cu a cumpra Gutu. Un investigacion posterior no a logra confirma existencia legal di e compania Pull Marine Services na Panama. Investigacion independiente haci, tambe a mustra cu e adres y informacion di contacto uza pa Pull Marine Services a genera diferente pregunta tocante su existencia y operacion legal. Ademas, a constata cu ARSPA Corporation N.V., cu ta un proveedor activo di Refineria di Aruba N.V y cu Albert Maximiliaan (Betto) Arends ta figura como unico director autorisa di dicho empresa. Segun declaracionnan obteni durante e investigacion, Albert Helder, conoci como “Buchi”, a expresa na diferente ocasion cu e Pilot Boat Gutu tabata pertenece na ARSPA Corporation N.V apesar cu e documentacion oficial di compra y benta tabata identifica Pull Marine Services como e cumprador. Eneomar Ollarves ta biba Aruba desde maart 2019 y ta un empleado di Andina Ice, cu tin e mesun accionista cu ARSPA Corporation NV, cu t’e compania en cuestion cu a haci e pago pa compra di e Pilot Boat Gutu. Ta resulta cu Pull Marine Services no ta un compania existente! Ta cuestiona e ora con e ex-Director di RdA por a firma un aprobacion den 42 minuut sin ningun cuestionamento y sin pidi aprobacion di Hunta di Supervicion di RDA. Ora a yama e number di celular cu tabata conecta na Pull Marine Services a haya Betto Arends na liña. E number di celular di Miami ta pertenece na Andrea Arends, kende t’e yiu muher di Betto Arends. Ta evidente cu aki ta papia di fraude, estafa, falsificacion di documentonan y engaño. Ollarves a induci RDA pa (intenta) transferi e Pilot Boat Gutu dor di mustra su mes como director di un entidad cu no ta existi. A uza adres y e-mail di un compania cu no ta existi. A ofrece un prijs mucho mas abao cu e balor riba mercado di boto pa beneficia su mes y of otro. Y e parti di falsifcacion ta obvio ora a manda un carta di oferta di un compania falso. Consecuentemente e acuerdo di compra ta resulta nulo, pasobra e compania ta “fantasma”. A factura na nomber di un compania no existente cu ta referi na un contract firma cu nunca a wordo contrafirma p’e compania no existente. Ricky Lacle pues, den su funcion como Director interino di RDA, a aproba e benta di un propiedad (Gutu) di RDA na un balor hopi mas abao cu e balor riba mercado for di un cumprador falso. No a pidi ni tabatin aprobacion di Hunta di Supervicion ni tampoco di accionistanan di RDA. Aki por ripara tambe e participacion coordina di Ollarves, ARSPA hunto cu Betto Arends y Buchi Helder, cada un cu un rol diferente den e eskema pa sostene otro conscientemente den rolnan ficticio pa obtene un beneficio sea propio of di otro na un forma ilegal.  Cu tur e pruebanan riba mesa di con a estafa RdA, e Director actual ing. Robert Henriquez, dia 24 di februari 2026, a haci un denuncia oficial na Recherche, cu e peticion na Ministerio Publico di Aruba pa cuminsa un investigacion urgente a base di sospecho di delitonan cometi menciona den e raport di RDA. Sinembargo, dia 27 di maart 2026, Fiscal den nomber di Ministerio Publico di Aruba ta manda un carta na RdA pa informa cu no por trata e denuncia entrega y cu no lo sigui cu un investigacion penal den esaki. Den e carta ta duna RdA e opcion y libertad di sigui cu un caso civil si ta desea esaki. Un tendencia peligroso. Falta di capacidad di Recherche den Cuerpo Policial Aruba no por stroba ordo di ley pa un proceso penal. Falta di capacidad no ta un base legal pa no sigui cu un proceso penal. Esaki no por, ni mag di stroba e ley obligatorio di un proceso penal, segun articulo 25 di nos Codigo di Procedimento Penal. Soluciona e falta di Recherche ta responsabilidad di Ministerio Publico y di Gobierno y esaki no por ta un motibo pa kita e proteccion legal di e persona cu a entrega un denuncia.  E entidad cu a presenta e beklag (keho) ta un compania estatal di Gobierno di cual su medionan ta fondonan publico. E transaccion no solamente a causa daño financiero na un persona huridico, pero tambe a afecta e fondo publico. Esaki ta aumenta e interes general p’e proceso penal sigui conforme ley ta stipula. Debi n’esaki e motibonan pa persigui ta pisa hopi mas cu e motibonan pa no persigui. Un proceso (caso) civil no por ni mag di ta un sustituto pa un proceso penal. Den carta di Ministerio Publico a duna indicacion cu RdA tin caminda pa cana y por sigui cu un proceso civil. E posibilidad ey realmente ta existi, pero e no por sustitui ni reemplasa un proceso penal. Engaño, fraude, estafa, falsificacion di documento y desvio den funcion y malversacion di servicio den relacion di trabou ta delitonan penal. No por considera cu un demanda (caso) civil contra un partido cu ta parcialmente ficticio of desconoci, por proteha e ordo legal den derecho penal.

Gobierno di Aruba a anuncia un pakete amplio di ayudo financiero social cu ta destina pa fortalece e poder di compra di nos famianan cu menos recurso y yuda nan cu e gastonan adicional cu ta bin cu e inicio di un aña scolar nobo. Durante un conferencia di prensa, Prome Minister mr. Mike Eman, hunto cu Ministro di Asuntonan Social, Salud Publico, Cuido di Adulto Mayor y Adiccion drs. Mervin Wyatt-Ras, a splica cu e decisionnan ta resultado di un evaluacion profundo di e costo real di bida y di e necesidadnan cu hopi famia ta enfrenta den comunidad. "Un aña escolar nobo semper ta trece reto financiero pa tur famia, pero specialmente pa esnan cu tin menos recurso," Prome Minister Mike Eman a bisa. Segun Eman, Gobierno, hunto cu Ministerio di Asunto Social, a haci un inventarisacion pa determina con e diferente tipo di asistencia financiero por yega mas cerca posibel n’e minimo di existencia cu un famia mester pa cubri su gastonan esencial. "Nos meta ta p’e combinacion di e diferente sosten por yega mas cerca posibel n’e prestacion minimo cu un famia mester pa por biba." Como resultado di e evaluacion ey, Gobierno ta mantene e aumento di e bijstand basico di AWG 450 pa AWG 600 pa luna. Ademas, e schooltoeslag anual a aumenta di AWG 250 pa AWG 300 pa mucha, cu un maximo di AWG 1.100 pa famia. Tambe e contribucion pa schoolgeld a subi di AWG 120 pa AWG 250 pa mucha, mientras cu e yudansa pa compra di articulonan escolar a aumenta di AWG 250 pa AWG 300 pa mucha, cu un maximo di AWG 1.000 pa famia. Segun Prome Minister Mike Eman, e aumentonan ta basa riba un inventarisacion di e costonan real cu nos mayornan ta enfrenta pa schoolgeld, material escolar y otro gasto relaciona cu e inicio di e aña escolar. Prome Minister Eman a expresa su reconocemento na Minister Wyatt-Ras, e personal di Ministerio di Asuntonan Social y Minister di Finansa mr. Geoffrey Wever p’e trabou cu a haci posibel den implementa e cambionan aki dentro di e presupuesto existente. Den mes e conferencia di prensa, Prome Minister Mike Eman a enfatisa cu e aumentonan p’e aña escolar nobo ta forma parti di un strategia mas amplio pa combati pobresa y fortalece e poder di compra. Segun Eman, durante e consultanan cu varios fundacion, organisacion social y instancia cu ta traha den bario, un di e preocupacionnan cu mas a wordo comparti tabata e aumento di pobresa den e ultimo tempo. Eman a splica cu Gobierno a pone tres grupo como prioridad. E prome grupo ta nos pensionadonan. Pa nan, Gobierno anteriormente a aumenta e AOV cu AWG 500 pa pensionadonan soltero y AWG 900 p’e pensionadonan casa. Segun Prome Minister Mike Eman, e reaccionnan di e pensionadonan a confirma cu e medida a ofrece un alivio importante den nan presupuesto mensual. E di dos grupo ta personanan cu ta depende di bijstand y nos hendenan cu un limitacion. Den e cuadro ey, Gobierno a aumenta e beneficio pa e personanan cu un limitacion cu AWG 100 pa luna, efectivo for di 1 di augustus. Ademas, Prome Minister Mike Eman a anuncia cu Gobierno ta den e etapa final di preparacion di un concepto di ley cu lo crea un beneficio financiero structural pa e famianan cu mucha cu necesidad special. Segun Eman, e concepto di ley a wordo desaroya bou di liderasgo di Minister Mervin Wyatt-Ras y, despues di un amplio proceso di consulta cu e organisacionnan y instancia cu ta traha cu e muchanan cu tin necesidad special, Gobierno a incorpora nan recomendacion den e propuesta. Actualmente e concepto ta den su ultimo fase di revision legal y Gobierno ta spera di por presenta esaki na Parlamento den algun siman. "E ley aki lo yuda miles di famia cu diariamente ta enfrenta gasto adicional pa tratamento, terapia, medicacion y otro servicio special cu nan muchanan mester," Prome Minister Mike Eman a splica. E di tres grupo cu Gobierno ta enfoca riba dje ta e trahadornan cu salario minimo. Prome Minister Mike Eman a anuncia cu un proyecto di ley ta den preparacion pa aumenta gradualmente e salario minimo cu AWG 500 den tres aña, p’e yega n’e minimo di existencia. Segun el, e aumento lo wordo implementa paso pa paso, teniendo cuenta tambe e capacidad di nos empresanan, specialmente e empresanan chikito, pa por tin capacidad pa absorba e ahustenan. Na final di e conferencia di prensa, Prome Minister Mike Eman a haci un yamada na e famianan cu por cualifica pa e diferente tipo di asistencia financiero pa acudi na Departamento di Asuntonan Social pa ricibi informacion y verifica pa cual beneficio nan ta cualifica. E ahustenan aki ta un paso importante den e esfuerso continuo di Gobierno pa fortalece e siguridad social y trece mehora den e calidad di bida di e gruponan mas vulnerabel di nos isla.

Diadomingo mainta, den un intento di pasa droga den KIA, tres persona a keda deteni. Ta trata di dos trahador di un compania cu ta entrega ijs como tambe un preso. T’asina cu dos trahador di un compania cu ta entrega ijs a keda deteni na KIA diadomingo mainta. Aki ta trata di un trahador fam Woodney di nacionalidad Haitiano y otro fam Devia di nacionalidad Colombiano. E dos hombernan aki a yega cu e truck di trabou y a bay entrega ijs. Den e proceso esun Woodney a pasa baño tambe. Eynan a base di camara di seguridad a mira su movecion. Ora a bay controla a descubri cu el a laga paki cu marihuana den baño. E intencion ta p’e preso coy e droga despues. Ambos trahador a perde nan libertad n’e sitio mes. A yama polis pa bin tuma nan over y a avisa e compania di ijs pa bin busca nan truck. Esaki ta causa un daño grandi n’e imagen y confiansa di e compania. Logicamente un situacion asina ta pone cu un di e trahadornan cu ta Woodney sigur lo perde su trabou. Un preso, cu a bay pa recoge e droga cu Woodey a laga atras, tambe lo mester duna cuenta na autoridadnan den e centro penitenciario. Pa loke t’e otro trahador, Devia, si resulta y keda proba cu e no sa nada, e ta scapa y por keda traha. Solamente kisas na KIA nan no kier mira su cara mas. Den caso cu si e cay sera, nan lo mira su cara den futuro. No ta prome biaha cu trahadornan cu trucknan di entrega ta purba pasa droga den prizon y ta keda descubri. Mescos cu droga tin intentonan pa pasa telefonnan celular. Tur dia tin diferente preso cu ta comunica pafo cu telefon celular. Esey kiermen cu eyden tin telefon ta pasa den forma clandestino tambe. Hasta famianan a yega di gara purbando di pasa droga ora di bin di bishita. E biaha aki entregando ijs a gara dos trahador. Despues cu polis a bay cu nan, a avisa pa bin coy e truck di ijs na Santo di Patia.

Parlamentario ing. Carlos Bermudez a bishita recientemente Hospital Internacional de Colombia (HIC) na Bucaramanga, Santander, pa conoce mas di cerca e tratamento, tecnologia y servicionan medico specialisa cu e institucion ta ofrece, teniendo na cuenta cu hopi ciudadano Arubiano ta wordo referi na HIC pa ricibi tratamento medico. E contacto inicial cu e institucion a surgi despues cu Bermudez a ricibi un invitacion di ProColombia pa participa n’e evento “Santander Llega a Aruba”, cu a tuma lugar dia 2 di juli ultimo na Iberostar Aruba. Durante e encuentro, e Parlamentario a sostene combersacion cu diferente representante di Hospital Internacional di Colombia. Probechando un bishita posterior na Bucaramanga, Bermudez a coordina un bishita inoficial n’e hospital pa conoce personalmente su facilidadnan y amplia su conocemento tocante e cuido cu pacientenan Arubiano ta ricibi na e institucion. E Parlamentario a ricibi un splicacion amplio tocante e diferente tratamento, examen y servicionan medico cu HIC ta ofrece. Tambe el a haya informacion tocante HIC Cardiovascular, un centro altamente specialisa den operacionnan di curason y otro procedimentonan cardiovascular. Un di e aspectonan cu mas a impresiona Bermudez tabata e informacion cu, un dia prome cu su bishita, HIC a logra realisa cu exito un operacion di curason asisti pa robot. Segun e splicacion ricibi, e ciruhano cu a dirigi e operacion tabata fisicamente na New Delhi, India, mientras cu e pashent tabata na Bucaramanga, Colombia, na un distancia di aproximadamente 15.000 kilometer. Na final di e bishita, Parlamentario ing. Carlos Bermudez a expresa cu el a keda sumamente impresiona cu e nivel di tecnologia, innovacion, infrastructura y calidad di cuido medico cu HIC ta ofrece. “Ta importante pa Aruba sigui fortalece relacionnan cu institucionnan medico di e caliber aki, teniendo na cuenta cu hopi Arubiano ta depende di tratamento specialisa den exterior. Conoce personalmente e facilidadnan y dialoga cu e profesionalnan ta yuda nos comprende mihor e experiencia y necesidadnan di nos pashentnan,” Bermudez a expresa.

Ainda nos por corda cu algun luna atras e trahadornan di DAO/DIMAS a sali afo pa motibo di mal holor cu ta penetra e edificio di DIMAS, unda tambe ta ubica esun di DAO. Relaciona cu esakiMinister di Labor, mr. Wendrick Cicilia, a duna di conoce cu ora ta trata di salud di hende, a tuma di inmediato. E mandatario a splica cu e edificio den cual DAO ta ubica actualmente, no ta cumpli cu e criterianan di salud, pa motibo di schimmel esaki por ta dañino pa salud di e personal. Sigur cu ya algun trahador a bira malo y ta na cas, mientras lo busca un solucion temporal. A dicidi di manda algun trahador pa oficinanan di MFA Noord, MFA Savaneta y pa MFA Santa Cruz y asina amplia e servicio mucho mas ainda, enbes di keda den un solo edificio. Di e forma aki ta hiba e servicio mas serca di pueblo. Si t’asina cu a muda e trahadornan cu a keda den e edificio unda tabatin Oficina di DPL, (Departamento di Progeso Laboral). Mas aleu, e mandatario a splica cu e edificio aki ta conoce su retonan y diferente trabounan a wordo haci pa purba mehora e estado di e edificio actual. Esaki no tabata efectivo pasobra cu cada bes e schimmel ta bin bek como tambe e diferente retonan, cu a bira retonan structural di e edificio di DAO ta ubica. Pero awor e mesun trahadornan a laga sa cu e mudamento pa edificio di DPL, ta peor cu unda nan tabata. Pues cu e medidanan tuma p’e mandatario no ta un solucion, segun e trahadornan a duna di conoce. Kico pa haci awor anto? No tin contesta, pero mester busca esaki tog den forma rapido. Tur e problema cu varios edificio di Gobierno ta confronta cu schimmel ta pa falta di mantenimento. Pues Gobierno mes tin falta den esaki.

Minister di Salubridad, Asunto Social, Cuido di Adulto Mayor y Maneho di Adiccion, drs. Melvin G. Wyatt-Ras, a firma siman pasa un acuerdo di cooperacion cu Stichting Brasami di Corsou. Cu e acuerdo aki, Gobierno di Aruba ta formalisa e colaboracion pa garantisa acceso continuo na tratamento residencial specialisa den e cuadro di cuido obligatorio pa personanan cu ta enfrenta problemanan serio di adiccion. E tipo di cuido aki actualmente no ta disponibel na Aruba. Tratamento residencial specialisa ta destina pa personanan cu ta enfrenta problemanan serio di adiccion y cu tin necesidad pa un ambiente terapeutico sigur y structura pa sostene nan proceso di recuperacion.

Na Aruba tin diferente servicio y partnernan cu ta brinda cuido y apoyo na personanan cu ta enfrenta adiccion. E acuerdo cu Stichting Brasami ta complementa e cadena di cuido existente pa casonan cu ta rekeri un trayecto intensivo den e cuadro di cuido obligatorio. E acuerdo aki no ta destina pa cualkier persona cu tin problema di adiccion. E tratamento ta enfoca riba un grupo specifico di personanan cu por bin na remarke pa un trayecto specialisa y intensivo di tratamento den e cuadro di cuido obligatorio. Tin un comision di indicacion pa cuido largo den exterior cu ta evalua cada caso pa determina si e persona ta cumpli cu e criterianan pa cuido obligatorio den exterior. E decision final ta den man di Hues. Minister Wyatt-Ras a indica cu e acuerdo ta forma parti di un vision mas amplio pa sigui fortalece un cadena di cuido mas structura y conecta pa maneho di adiccion na Aruba. “Cu e acuerdo aki, nos ta fortalece e cadena di cuido pa personanan cu ta enfrenta problemanan serio di adiccion. Nos kier brinda nan un oportunidad real pa recupera, rehabilita y biba un bida cu dignidad. Pasobra si bo yuda un persona cu adiccion, bo no ta yuda e persona so: Bo ta yuda su famia y bo ta yuda henter comunidad.” Representante di Stichting Brasami a expresa nan aprecio p’e cooperacion cu Gobierno di Aruba y a reafirma e compromiso comparti pa sigui brinda tratamento profesional y cuido di calidad na personanan cu tin necesidad p’e nivel di cuido aki. Cu e acuerdo aki, Gobierno di Aruba lo sigui traha hunto cu partnernan local y den region pa fortalece e cadena di cuido pa maneho di adiccion. Esaki ta contribui na un trayecto cu ta conecta tratamento specialisa cu cuido y sosten despues di e tratamento, cu enfoke riba recuperacion y reintegracion sostenibel den comunidad.

Masha bunita acuerdo, pero di acuerdo cu nos informacion, Stichting Brasami tin 30 aña di existencia, pero no por demostra cu cifra cuanto cliente a recupera y fuera di esey, hopi di esnan cu a recupera a bolbe cai despues den wega, ora cu nan a bolbe bek den nan ambiente. Pues ta manera ta wordo bisa: "Aki ta carga awa hiba laman" y esey sigur nos no kier. Ban duna Gobierno y Brasami e beneficio di duda y cu nan por logra e metanan cu tanto tur hende ta desea.

Gobierno di Reino Hulandes kier haci permanente e ley cu permiti kita nacionalidad Hulandes di personanan cu ta uni na organizacionnan terrorista den exterior. Asina curacao.nu ta duna di conoce.  E propuesta di Ley di Reino a wordo manda na Parlamentonan di Corsou, Aruba y Sint Maarten, pasobra nacionalidad Hulandes ta un asunto di Reino. E medida ta aplica pa personanan di 18 aña of mas cu ta den exterior y cu por wordo comproba cu nan a uni na un organizacion terrorista reconoci. No ta necesario un condena penal prome. Sinembargo, e persona mester tin un di dos nacionalidad, ya cu segun tratado internacional nan no por keda sin nacionalidad. Desde cu e ley temporal a drenta na vigor na 2017, e medida a wordo aplica 25 biaha. Gobierno ta sostene cu e menaza di terrorismo ainda ta presente y kier mantene e poder despues di 1 di maart 2027.

Pesey Gobierno di Reino a dicidi di bin cu un proceso di paspoort mas estricto. E propuesta pa cambia e reglanan di paspoort den Reino Hulandes por introduci un proceso mas estricto pa emiti paspoort na Aruba, Corsou y Sint Maarten. Asina e portal Curacao Chronicle a raporta. E cambio principal ta cu e aplicacion, aprobacion y entrega di un paspoort mester wordo maneha pa diferente empleado. E medida ta destina pa reforza control interno y reduci e riesgo di error of abuso, evitando cu un solo persona por maneha henter e proceso. E propuesta tambe ta inclui mas flexibilidat pa uso di equipo movil pa tuma fingerprint, actualisacion di e requisito pa warda paspoortnan y remplaso di algun formulario di papel pa servicio digital. Den caso di falta temporal di personal of pa documento di biahe di emergencia, e separacion di funcionnan no lo ta obligatorio. E propuesta a wordo manda pa consulta na Aruba, Corsou y Sint Maarten na final di 2025. Ainda no tin confirmacion oficial si e reglanan nobo a wordo aproba ni ora nan lo drenta na vigor.

Diamars ultimo Minister di Husticia, mr. drs. Arthur Dowers, hunto cu Minister di Turismo, mr. Wendrick Cicilia, a haci un bishita na RIU Palace, unda e Gerente Regional di RIU Resorts, señor Juan Blanco a yama e mandatarionan bon-bini. Durante e bishita, a presenta e resultado di e trabao amplio di renobacion cu recien a keda completa n’e hotel. E proyecto di modernisacion aki a cuminsa mas o menos dos aña pasa y a representa un inversion miyonario den e producto turistico di Aruba. RIU Palace a cambia for di su interior clasico y vintage pa un concepto completamente contemporaneo, cu un diseño moderno y colornan inspira p’e ambiente calido cu ta caracterisa nos isla cu su toke di luho. E renobacion a inclui practicamente tur area principal di e hotel. E lobby y e bar principal a haya un aparencia completamente nobo, mientras cu a renoba y amplia diferente restaurant. Ademas di esey, e hotel a expande su oferta gastronomico cu restaurantnan nobo, incluyendo un restaurant exclusivo pa huespednan elite. Tambe a transforma e kambernan den espacionan moderno pa aumenta e comodidad y experencia di e bishitantenan. Den e area na "ground level", e suitenan awor ta dispone di nan propio mini piscina priva, dunando un elemento exclusivo n’e estadia di e huesped. Minister Dowers a expresa su aprecio p’e confiansa cu RIU Resorts ta sigui duna Aruba pa medio di inversionnan di e magnitud aki. Inversionnan continuo den calidad y inovacion ta fortalece e posicion di Aruba como un destino turistico halto y ta contribui directamente na desaroyo economico di nos pais. Renobacionnan di e caliber aki ta completamente alinea cu e vision di Gobierno di Aruba pa sigui fortalece un producto turistico di calidad halto, orienta riba atrae bishitantenan cu un poder di compra halto, garantisando cu Aruba ta sigui ta un destino competitivo y atractivo den e mercado internacional.