Cuminsando 1 di augustus 2026, consumidor na Aruba lo beneficia di un proteccion importante nobo: un porcentahe maximo di 25% riba credito di consumidor otorga desde 1 augustus 2026. Cu esaki, pa prome biaha ta existi un limite legal riba e interes y costonan cu por wordo cobra riba credito; credito di placa, credito di bienes of ora di empeña articulonan. E regulacion aki ta wordo introduci door di e entrada na vigor di articulo 5 di e Landsverordening Regeling Consumentenkrediet (LCK). E articulo aki ta forma e base legal pa regula e costo di credito y pa preveni situacionnan unda consumidornan por wordo confronta cu carganan financiero excesivo. Prome cu e regulacion aki, Aruba no tabatin un limite legal riba e costo di credito di consumidor. E entrada na vigor di e regulacion aki ta marca un milestone importante den un proceso cu a cuminsa durante e gabinete anterior, ora Minister Geoffrey Wever tabata Minister di Asunto Economico. Durante e periodo ey, a wordo inicia e preparacionnan, investigacionnan y dialogonan cu stakeholdernan. Awo, despues di e trabou preparatorio, e regulacion finalmente ta drenta na vigor y ta bira un realidad pa consumidor na Aruba. E porcentahe maximo di interes riba credito di consumidor stipula na 25% ta e elemento central di e prome fase di implementacion di e Landsverordening Regeling Consumentenkrediet (LCK). Cu e limite legal aki, gobierno ta establece claramente te unda e interes y costonan di credito por yega, duna consumidor mas seguridad y mas proteccion den mercado financiero. “Cu e introduccion di e maximo di 25%, nos ta pone un limite cla pa proteha consumidor. Esaki ta un paso historico den fortalecemento di derechonan di consumidor na Aruba. E ta tambe un milestone importante den un proseso cu nos a inicia durante e gabinete anterior y cu awo finalmente ta drenta na vigor pa beneficio di tur consumidor,” segun Minister di Finansa, Asunto Economico y Sector Primario, mr. Geoffrey Wever. E reglamentacion ministerial basa riba articulo 5 ta establece tambe reglanan pa ora di haci pago riba pagonan atrasa (vertragingsvergoeding), ora haci pago anticipa di prestamo (vervroegde aflossing) y ora di gastonan di incasso extrahudicial (buitengerechtelijke incassokosten). Segun Minister Wever, e introduccion di e maximo di 25% ta crea un mihor balansa entre proteccion di consumidor y disponibilidad di credito. “Nos ta reconoce cu hopi famia y individuo ta depende riba acceso na credito. Pa motibo ey nos no kier limita acceso na financiamiento, pero si nos kier evita cu consumidornan paga costonan excesivo. E maximo di 25% ta crea e balansa entre proteccion y acceso.” Minister Wever a enfatisa cu e entrada na vigor di articulo 5 no ta significa cu henter e Landsverordening Regeling Consumentenkrediet (LCK) ta drenta na vigor inmediatamente. E otro componentenan importante di e ley lo wordo implementa den un fase posterior. Demas componente di e Landsverordening Regeling Consumentenkrediet (LCK) cu lo ser implementa mas despues ta obligacionnan di informacion mas amplio pa proveedornan di credito, normanan pa otorgacion responsabel di credito, introduccion di un registro di credito, instrumentonan di supervision y cumplimiento. “Nos ta cuminsa cu e componente cu tin e impacto mas directo pa consumidor: e limite maximo di 25% riba e costo di credito. Ta cuminsa cu e limite aki pa e periodo 1 augustus 2026 te cu fin di december 2027. Despues lo sigui e otro componentenan importante cu ta forma parti di e Landsverordening Regeling Consumentenkrediet (LCK),” Minister Wever a declara. “Nos a scoge pa implementa e regulacion aki cuidadosamente pa mantene un balansa entre proteccion di consumidor y stabilidad di mercado. Nos kier proteha e consumidor y na mes momento nos ta reconoce e importancia di e negoshinan cu ta ofrece credito pa hopi famia y individuo. Pa e motibo ey, nos lo sigui monitorea e impacto di e regulacion y evalua cuidadosamente e efectonan.” Pa e momento aki, e introduccion di e maximo legal di 25% tin principalmente un efecto di derecho civil. Esaki ta nifica cu consumidornan por invoca e norma legal nobo dilanti huez ora un proveedor di credito no ta cumpli cu e limite estableci. Cu e implementacion gradual di e otro disposicionnan di e Landsverordening Regeling Consumentenkrediet (LCK), incluyendo supervision, autoridadnan competente lo por supervisa cumplimiento di e ley y ora ta necesario, interveni directamente contra incumplimentonan. Cu e introduccion di e maximo legal di 25%, Gabinete AVP-Futuro ta duna consumidor un proteccion concreto y inmediato y ta stimula un ‘level playing field’ den e segmento di mercado aki, mientras cu Aruba ta sigui traha riba implementacion gradual di e otro componentenan importante di e Landsverordening Regeling Consumentenkrediet. Minister Geoffrey Wever ta jama danki na Centrale Bank van Aruba y Directie Wetgeving en Jurisdische Zaken pa e trabounan haci.

Durante e prome dos ora di e accion nacional di haci nos isla limpi, a colecta casi 43 ton di sushi. Pa 11 or di mainta e conteo tabata na 74.04 ton di sushi y pa 12 or di merdia a surpasa e meta di 101.20 ton di sushi colecta. Esaki ta un total di mas cu 61 baki (container) completo di sushi. Na un total di 26 punto rond isla, baki pa sushi a wordo poni. Varios di nan a yena completamente den poco tempo. Ekiponan tabata bezig basha e bakinan pa despues pone nan bek na disposicion di comunidad. Gobierno ta haci un yamada na comunidad pa separa sushi debidamente. Tin baki apart pa mata y blachi, palo y palet, carton, tire, metal y resto di construccion manera tegel y beton. Asbestos no ta permiti den e bakinan. Comunidad tambe por entrega desperdicio na Zona di Desperidicio Barcadera, na Watertoren di San Nicolas y na e area di Harbor Arena, entrada banda di ex-Bushiri Hotel. Diferente instancia y compania a contribui na e organisacion y transmision di e actividad, entre nan Setar, Aruba Ports Authority, WEB Aruba, Post Aruba y CEDE Aruba. E medionan di comunicacion a move nan teamnan pa informa comunidad durante henter e dia.

E Red di Hubentud di Paisnan y Teritorionan di Ultramar (OCT Youth Network) ta ofrece hobennan un oportunidad di un aña pa explora e aliansa entre e paisnan y Teritorionan den Caribe Hulandes y Union Europeo siña tocante e institucionnan europeo, y conecta cu otro hobennan di e teritorionan aki. Kico e Red di Hubentud di OCT ta? E Red di Hubentud di OCT ta un grupo di 25 hoben (di 20 te cu 28 aña di edad) procedente di tur e 13 teritorionan asocia cu Union Europeo, entre otro Aruba, Boneiro, Corsou, Polinesia Frances, Greenland, Saba, San Bartolomeo, San Pedro y Miquelon, Sint Eustatius, y Sint Maarten. Cada edicion ta reuni un grupo di hoben diverso pa un trayecto di intercambio di un aña. E miembronan ta conecta cu otro y cu e institucionnan di Union Europeo, cual ta yudanan desaroya un miho comprension di e Aliansa OCT-UE. Adicionalmente, e hobennan ta haya un oportunidad pa participa na un bishita di estudio na Brussels y un serie di actividad online, y ta aporta cu un perspectiva hubenil na e aliansa, mediante participacion den eventonan di nivel halto manera e Forum OCTs-EU. E Red ta refleha e diversidad di e teritorionan di Caribe Hulandes, reuniendo hobennan cu un amplio variedad di perfil, experencia, perspectiva, area di interes y conocemento socioeconomico. Lansa pa prome biaha na 2022, e Red tin como meta pa fortalece e lasonan entre e hobennan cu ta biba den e teritorionan aki y Union Europeo, ademas di mehora e dominio y e involucramento di e hubentud den e Aliansa OCT-UE. E obhetivonan di e red ta pa: Conecta hobennan di e 13 teritorionan cu otro, como tambe cu e institucionnan y e lidernan di Union Europeo. Aporta un perspectiva hubenil na e Aliansa OCT-UE. Profundisa e comprension tocante Union Europeo den e teritorionan di Caribe Hulandes. Crea lasonan cu otro iniciativa pa hubentud na nivel regional y nacional, incluyendo Union Europeo y su Estadonan Miembro. Kico e red ta haci? Miembronan di e Red di Hubentud di OCT ta participa den un trayecto di aprendisahe di un aña cu ta inclui: Un bishita di estudio di un siman na Brussels pa explora e funcionamento di e institucionnan europeo. Webinar online pa profundisa nan conocemento y competencianan. Eventonan di networking cu otro hobennan y actornan clave. Sesion di dialogo facilita cu lidernan politico di UE. Tambe nan ta tuma parti den eventonan internacional di gran importancia, manera e Forum OCTs-EU, pa amplifica e bos di e hubentud di e teritorionan di ultramar. Durante e periodo aki, e miembronan tin e oportunidad di descubri e aliansa OCT-UE y interactua cu actornan clave tanto di Union Europeo como di e teritorionan. Nan ta topa y conecta cu un gran variedad di hoben y lidernan di UE, ampliando nan red y horizonte personal y profesional. Ademas, nan ta contribui activamente na e desaroyo di e Red door di participa na e actividadnan y yuda selecciona e prioridadnan y topiconan cu lo wordo trata. Den corto, e miembronan di e Red di Hubentud di OCT ta siña, debati, compromete, participa y co-dirigi actividadnan, treciendo un perspectiva fresco di hubentud na e aliansa. Minister di Relacionnan den Reino, Hubentud y Educacion ta invita y motiva hobennan den comunidad di Aruba cu ta interesa den e oportunidad unico aki pa tuma un stap pa participa y enrikece nan conocemento. Por aplica via e siguiente link: https://international-partnerships.ec.europa.eu/policies/youth/overseas-countries-and-territories-youth-network_en of tuma contacto cu Ministerio di Relacionnan den Reino,Educacion, Hubentud, Innovacion y Deporte pa mas guia y informacion.

Tabata diarazon ultimo cu un otro hoben di 16 anja, Rayson E. Kelly a bira victima di un rama di candela. Kico te causa no ta conoci ainda. Si t’asina cu tin 3 sospechoso deteni, kendenan ta W.R.D.T di 23 anja, A.K.M di 23 anja y e muher J.M.L.G. di 31 anja. Tur 3 naci na Aruba. E hecho aki a tuma lugar riba parkeerplaats di Stadion Nadi Croes/Crismo Angela. Mester bisa cu e detencion a tuma lugar hopi liher, maske sin sa causa di e tiramento fatal aki, cu a cobra bida di Rayson E. Kelly, naci na Aruba dia 1 di october 2009. (16 anja) Cu e hecho aki ta keda confirma cu tin masha arma di candela keto bai den circulacion, apesar di un di tanto reciente campanja pa entrega armanan di candela sin tin di ser persigui penalmente. E campanja aki, cu a tuma lugar n’e islanan CAS, no a duna e resultado desea. Nos a tuma nota di un peticion di ex Prome Minister Evelyn Wever Croes, kende ta demanda un solucion a corto plazo. Si nos bi evalua cu Gobierno a parti un cantidad di vergunning pa arma bao di su hendenan, t meramente MEP. cuminsando tempo cu Minister di Husticia, Rudy Croes, te hasta un di su colaboradornan a tira auto di Rudy Croes pe por a haya proteccion 24/7. E tempo ey tambe Siki Koolman a haya arma di candela, te cu awor a keda descubri di tin un arsenal di arma y municion, pa cual e ta sinta castigo, banda di ta pedofiel. Mesun Siki Koolman aki tabata chofer y bodyguard di Evelyn Wever Croes. E mester di tanto arma den cas pa protea su Prome Minister? Gabinetenan di AVP, nan Minister di Husticia a duna vergunning, pero e Ministernan manera Eddy Croes, Watty Vos a nenga di carga arma di candela. Maske algun hende rond di nan si tabatin arma di candela. Lo ta bon pa demanda pa pueblo sa cua Gobierno a parti mas permiso di candela y na kende(nan). Ora cu nan a baha, a devolve e permisonan aki?

Minister di Husticia, Integracion y Transporte Publico, mr. drs. Arthur Dowers, recientemente a haci un bishita di trabao na e edificio cu pa varios aña tabata oficina di Departamento di Asuntonan di Casino, pa inspecciona e progreso di e trabaonan di renobacion cu ta den fase final. Na momento cu a muda DAC temporalmente pa MFA Paradera, a cuminsa cu un proyecto di renobacion di e edificio. E local tabata den un estado hopi deplorabel y tabata rekeri trabao structural y di mantencion. Durante di e proyecto, a mehora e infrastructura di e edificio, drecha diferente defecto cu a afecta e funcionalidad di e oficina durante e ultimo ocho añanan. E resultado ta un edificio den bon estado cu lo ofrece un ambiente di trabao digno, sigur y funcional. E trabao di renobacion ta den su ultimo fase y dentro di poco lo instala e mobiliarionan di oficina. Despues di esaki, Departamento di Recurso Humano (DRH) lo ocupa e edificio pa ehecuta tareanan specifico den cuadro di e Tijdelijke Werkorganisatie TWO na beneficio di servicio publico. Durante su bishita, Minister Dowers a expresa su satisfaccion cu e progreso di e trabaonan di renobacion. Minister Dowers ta sigui haci inversion den mehora infrastructura gubernamental, pa crea un ambiente di trabao digno y eficiente tanto pa empleadonan como pa e comunidad cu nan ta sirbi.

Tabata diabierna mainta cu Polis a organisa un entrada hudicial na un cas na Caya Juancho Kock na Dakota. Aki nan a detene dos persona, esta e homber di 50 anja, Jair Valentijn, naci na Aruba y su yiu Jurgen Valentijn di 19 anja, tambe naci na Aruba. Durante e entrada hudicial aki, autoridadnan judicial a bin haya un cantidad considerable di droga, pero tambe arma di candela y municion di varios caliber. KPA ta haci apelacion n’esnan cu por sa algo pa yama polis na tipline 11141. Bo ta keda anonimo. Aki por mira y confirma, unda tin trafico di droga, tin arma di candela.

Hues-comisario a suspende e detencion di e homber L.S.H., sospechoso di a maltrata un persona di 79 aña di edad na un cas di cuido den anochi di 16 pa 17 di juli ultimo. Ta trata di un caso serio, den cual un adulto mayor a sufri lesionnan grave. Hues-comisario a duna ordo pa suspension di detencion di e sospechoso H. despues cu a keda constata cu e homber aki no ta apto pa sigui deteni, o sea, ta incompatible cu detencion. El a wordo manda cas cu condicionnan.

Un sospechoso ta wordo considera incompatibel cu detencion ora su estado fisico of mental no ta permiti pa e keda deteni na un manera sigur y responsabel. Den e caso aki, e sospechoso H. ta depende di cuido 24/7, cu ta algo cu no por wordo suministra ni na Warda di Polis, ni tampoco na Huis van Bewaring. Ademas na Aruba no ta existi otro facilidadnan adecua pa detene un sospechoso den e condicion medico cu e persona aki ta den. Den situacionnan asina, hues-comisario por dicidi pa suspende detencion y impone condicionnan.

Hues-comisario a impone cierto condicionnan riba e sospechoso en cuestion. E mester keda disponibel pa Husticia, mientras Ministerio Publico ta investiga e posibilidadnan pa bolbe detene. Pa yega na un solucion ta bay tuma tempo, pasobra Aruba ta depende di Hulanda pa gana H. den un facilidad di detencion apropia, y un translado asina no por wordo regla den corto plazo. N’e mes momento, manera indica anteriormente, Warda di Polis no ta un lugar adecua pa detene e persona aki.

Pesey Ministerio Publico, cu hopi disgusto, a laga e sospechoso L.S.H. bay pa awor, pero lo sigui traha pa haya un lugar di detencion pe, di modo cu e por wordo deteni di nobo.

Recientemente, Minister di Husticia, Integracion, Transporte Publico y Energia, mr. drs. Arthur Dowers, a bishita Academia di Polis Edgar Joaquin ‘Watty’ Vos na San Nicolas pa inspecciona e progreso di e trabaonan di renobacion cu ta tumando luga den e periodo di vakantie. Durante su bishita, Minister Dowers a ricibi un actualisacion tocante e diferente trabaonan cu ta den ehecucion, cu tin como meta pa mehora e facilidadnan pa studiante y personal di Scol di Polis. E renobacionnan ta forma parti di e esfuersonan continuo di Minister Dowers pa crea un ambiente moderno, funcional y apropia pa preparacion di futuro miembro di Cuerpo Policial Aruba. Segun e planificacion actual, e trabaonan lo ta completamente cla prome cu fin di e periodo di vakantie escolar. Esaki lo permiti cu e siguiente periodo di les por cuminsa den un facilidad renoba, brindando un ambiente mas sigur, moderno y funcional pa e futuro polisnan cu lo sirbi comunidad di Aruba. Cu e inversion aki, Minister Dowers ta reafirma su compromiso cu fortalecemento di e institucionnan di siguridad y ta ofrece e miho condicionnan posibel pa formacion di e hombernan y muhernan cu lo dedica nan mes na sirbi y proteha nos comunidad.

Banco Central di Aruba (BCA) ta publica su ‘Operational Report 2025’ y su ‘Condensed Financial Statements 2025’. E ‘Condensed Financial Statements 2025’ ta duna un resumen di e prestacion financiero y e posicion financiero di BCA pa aña 2025. E ‘Operational Report 2025’ ta pone enfasis riba prestacion financiero y tambe desaroyo y logronan importante relaciona cu cuater di e responsabilidadnan principal di BCA, esta maneho monetario, maneho di reserva, sistema di pago y consehero di Minister di Finansas. E ta refleha tambe riba estadisticanan di personal y ta enfatisa e prestacion operacional, actividadnan strategico realisa na aña 2025 y su enfoke pa aña 2026. Ademas, e ta resumi con BCA ta wordo dirigi y con e riesgonan clave ta ser maneha. Manera menciona den e ‘Operational Report 2025’ e economia di Aruba a sigui demostra resilencia na 2025, registrando crecemento apesar di e actividad economico cu a modera despues di varios aña di expansion fuerte. Turismo a keda e motor principal di e economia sosteniendo consumo, entradanan di gobierno y reservanan di divisa, mientras cu e presion di inflacion a baha. Na aña 2025, BCA a raporta un bon resultado financiero y operacional fuerte sosteni pa resultadonan di inversion solido, maneho efectivo di gastonan y progreso continuo den ehecucion di iniciativanan strategico. Cu mira pa futuro, BCA ta spera cu e economia di Aruba lo sigui expande den 2026 aunke na un paso mas modera meymey di un continuacion di e incertidumbre global. E di cinco responsabilidad principal di BCA, esta supervision y regulacion di e sector financiero di Aruba ta wordo cubri den e ‘Financial Sector Supervision Report’ (FSSR) cu a keda publica 30 di juni 2026 y ta disponibel riba e website di BCA. E ‘Operational Report 2025’ y e ‘Condensed Financial Statements 2025’ ta riba BCA su website entrante awe ta mantene su posicion financiero fuerte, meymey di un crecemento economico modera

Awe Banco Central di Aruba (BCA) ta publica su ‘Operational Report 2025’ y su ‘Condensed Financial Statements 2025’. E ‘Condensed Financial Statements 2025’ ta duna un resumen di e prestacion financiero y e posicion financiero di BCA pa aña 2025. E ‘Operational Report 2025’ ta pone enfasis riba prestacion financiero y tambe desaroyo y logronan importante relaciona cu cuater di e responsabilidadnan principal di BCA, esta maneho monetario, maneho di reserva, sistema di pago y consehero di Minister di Finansas. E ta refleha tambe riba estadisticanan di personal y ta enfatisa e prestacion operacional, actividadnan strategico realisa na aña 2025 y su enfoke pa aña 2026. Ademas, e ta resumi con BCA ta wordo dirigi y con e riesgonan clave ta ser maneha. Manera menciona den e ‘Operational Report 2025’ e economia di Aruba a sigui demostra resilencia na 2025, registrando crecemento apesar di e actividad economico cu a modera despues di varios aña di expansion fuerte. Turismo a keda e motor principal di e economia sosteniendo consumo, entradanan di gobierno y reservanan di divisa, mientras cu e presion di inflacion a baha. Na aña 2025, BCA a raporta un bon resultado financiero y operacional fuerte sosteni pa resultadonan di inversion solido, maneho efectivo di gastonan y progreso continuo den ehecucion di iniciativanan strategico. Cu mira pa futuro, BCA ta spera cu e economia di Aruba lo sigui expande den 2026 aunke na un paso mas modera meymey di un continuacion di e incertidumbre global. E di cinco responsabilidad principal di BCA, esta supervision y regulacion di e sector financiero di Aruba ta wordo cubri den e ‘Financial Sector Supervision Report’ (FSSR) cu a keda publica 30 di juni 2026 y ta disponibel riba e website di BCA. E ‘Operational Report 2025’ y e ‘Condensed Financial Statements 2025’ ta riba BCA su website entrante awe.

Gobierno di Aruba y Gobierno di Corsou a firma un Memorandum of Understanding (MoU) pa fortalece e colaboracion strategico den transformacion digital di educacion y gobierno. E acuerdo aki, firma pa sra. mr.Gerlien Croes, Minister di Relacion den Reino, Educacion, Hubentud, Innovacion y Deporte, hunto cu sr. Sithree van Heydoorn, Minister di Enseñansa, Ciencia, Cultura y Deporte di Corsou, ta marca un paso importante pa ambos pais den Reino,

E colaboracion ta basa riba e principionan di eficiencia, reciprocidad y transparencia. Corsou lo comparti su experencia y conocemento adkiri cu e Centraal Landelijke Onderwijs Applicatie (CLOA), un sistema digital cu ta inclui dashboards, plataformanan central di educacion pa maneho, monitoreo y evaluacion di informacion den veld di educacion.

Di forma paralelo, Aruba lo comparti su avance den e trayectorianan di E-Government, interoperabilidad entre departamentonan di gobierno, y e creacion di un Shared Service Organisatie pa solidez di e sistemanan. Pilar nan clave di e cooperacion. E acuerdo ta cubri varios area di trabou pa futuro cercano: ● Sistemanan di Informacion di Educacion: Desaroyo y intercambio di plataforma di dato, registracion di studiante, y dashboards centralisa pa apoyo di maneho. ● Roadmap di Digitalisacion: Apoyo pa elaboracion di un roadmap strategico riba digitalisacion den educacion pa Aruba. ● Interoperabilidad y Gobierno Digital: Conexion entre e registracionnan sectorial di educacion y registracionnan nacional basico di gobierno. ● Innovacion Pedagogico y STEM: Intercambio di conocemento riba curriculum, didactica digital, y e fortalecemento di habilidadnan digital y educacion di STEM (Ciencia, Tecnologia, Ingenieria y Matematica). ● Proyectonan Piloto: Exploracion di proyecto conhunto den examinacion digital, learning analytics, y modelonan di siñamento hibrido (blended learning).Gobernansa y proximo pasonan E MoU aki tin un duracion di tres aña y lo wordo coordina pa medio di un punto di contacto central nacional, nombra pa ambos pais. Ademas, e acuerdo ta sirbi como un paso preliminario pa yega na un acuerdo mas formal pa medio di sesionnan di trabou intensivo. Minister Gerlien Croes ta sumamente satisfecho cu e acuerdo aki, cual lo trese innovacion y diferente posibilidad den e veld di educacion. Ademas, e cooperacion aki ta fortifica e lasonan regional ariba diferente nivel. Cu e paso aki, Ministerio di Educacion di Aruba ta reitera su compromiso cu un educacion innovativo, modernisa y prepara pa e futuro y retonan di e era digital.

Minister di Educacion, sra. mr. Gerlien Croes, cu gran orguyo y satisfaccion, ta fungi como testigo di un logro den historia di nos pais. Dialuna, 13 di juli 2026, a celebra e graduacion di e prome 20 graduadonan di SPO (Scol Practico pa Ofishi) cu a haya nan diploma riba nivel di MBO 1 (ABO 1). E logro aki ta marca un paso firme padilanti den e desaroyo educativo di Aruba.

E prome grupo di graduado aki a finalisa nan estudio exitosamente den e siguiente direccionnan structural: ● Assistent Bouwen, Wonen en Onderhoud; Assistent Dienstverlening ● Assistent Horeca.

Tur e trayectorianan aki ta cay bou di e capa di MBO Niveau 1. Minister Gerlien Croes ta extende su mas sincero y caluroso pabien na cada un di e studiantenan aki cu a demostra perseverancia, disciplina y un gran deseo di supera. Un aspecto ricamente positivo ta cu algun di e alumnonan aki lo no para aki; nan lo sigui enrikese nan conocemento y lo continua nan estudio riba nivel 2 di OABA. Esaki ta un muestra bibo cu ora nos duna e studiante e atencion rekeri, e hermentnan corecto y nos empodera nan, nan ta capaz pa logra yega semper mas cerca di nan potencial maximo.

Ministerio di Educacion, bou encargo di Minister Gerlien Croes ta enfatisa su compromiso pa sigui habri caminda pa un educacion inclusivo y di calidad, caminda tur hoben ta haya e oportunidad pa briya. Masha pabien n’e 20 graduadonan, na nan famia y na SPO. Nos ta orguyoso di e logro aki y lo sigui traha pa crea mas colaboracion y oportunidad unico p’e futuro generacion di nos isla.