Ainda nos por corda con Minister di Husticia, mr. drs. Arthur Dowers como un di su prome accion cu el a tuma tabata pa legalisa tur persona cu ta sea traha ilegalmente na Aruba y/of tambe e otro ilegalnan cu tin na Aruba. Pa por haci esaki, e illegal mester haya un dunador di trabao pa firma p'e. E tempo ey a ser bisa cu Aruba tin como 10 mil persona illegal y lo legalisa tur. Hasta esaki a crea problema e.o. na Censo, pasobra no tin suficiente personal pa registra tur, pa cual a busca un solucion. Tabata Presidente di Federacion di Trahadornan di Aruba (FTA), mr. Hose (Jomar) Figaroa, a duna un splicacion debido y profundo riba e situacion di e mercado laboral na Aruba. Figaroa a aclaria cu e medidanan pa legalisa personanan cu ta biba ilegalmente na Aruba no a soluciona e escasez di trahador, ya cu esaki simplemente a transforma puestonan cu tabata ocupa caba. Segun Figaroa, e legalisacion aki tin un efecto marginal riba e mercado laboral, pasobra e no ta yenando e cuponan bashi. "Bo no ta yenando cuponan cu ta bashi, bo ta legalisando cuponan cu tabata ocupa caba, haciendo un lugar ilegal bira legal," e dirigente sindical a splica. Por lo tanto, e escasez structural di man di obra ta keda un problema primordial. FTA a bin ta papia cu varios Gobierno den transcurso di tempo pa bin cu un maneho di admision hopi mas structura. Hose Figaroa ta enfatisa cu e cantidad di trahador local n'e momentonan aki no ta basta pa cubri e demanda actual, y mucho menos esun di futuro. Pa e motibo aki, e ta considera imperativo pa implementa un maneho organisa pa importacion di trahador. E demanda aki lo bay aumenta debi na dos factor clave: 1. Crecemento hotelero: Tin un cantidad grandi di kamber di hotel cu tin permiso aproba caba of cu ta den pleno construccion. Ora e proyectonan aki keda cla, lo bay tin mester di hopi mas hende pa ocupa e puestonan nobo ey. 2. Envehecimento di poblacion: Aruba ta enfrenta un envehecimento acelera di su poblacion. Den e proximo 10 pa 20 a–anan, un cantidad significante di trahador lo drenta e edad di pensioen y lo sali for di e mercado laboral activo. Un di e datonan mas preocupante cu e Presidente di FTA a comparti, basa riba cifranan internacional, t'e asina yama replacement value (e balor di reemplaso pa mantene e poblacion stabiel). Pa un pais mantene su nivel di poblacion, e nivel mester ta na 2.1 yiu pa cada muher. Actualmente, Aruba ta registra un cifra hopi mas abou, di apenas 1.4 yiu pa cada muher, loke ta nifica cu e poblacion ta bahando. Dado e realidad demografico aki, unda e grupo cu ta bay cu pensioen ta mas grandi cu e cantidad di hoben cu ta drenta e mercado di trabou, e unico alternativa real pa sostene e economia t'e importacion di trahador. Unico manera cu bo por bay cumpli cu e demanda di bo mercado laboral ta dor di importacion di trahador, pasobra nos no tin un otro sistema pa haci'e," Figaroa a conclui, lansando un yamada pa actua proactivamente prome cu e situacion empeora un biaha mas.

Diabierne ultimo tabatin dos caso den Corte di Prome Instancia na Aruba cu sigur a hala atencion, cu a pone Huez hasta cuestiona con e investigacionnan a tuma lugar. E critica ta bai pa tur esnan conserni cu mester haci un investigacion debido, pa Ministerio Publico ora di presenta e caso den Corte mester ta bon haci y no laga buraco habri, te cu por laga un sospechoso den libertad. P.e. den e caso di e hit & run dia 5 di januari, cu a causa 2 morto traficamente dilanti di Wind Greek Casino. Famianan di e victimanan a bin afo, despues cu famia di e sospechoso a duna e impression cu nan no por haya un abogado califica pa defende e sospechoso, Chania Fernandes-Pedra, pero cu diabierne ultimo a bin cu un famoso abogado Hulandes, Yehudi Moszkowicz, kende Huez no a permitie di papia mes, pasobra e no ta registra na Aruba. Awor 6 luna despues di e accidente fatal aki cu a costa bida di bida di Josely Vasquez González y su esposo Carlos David Diyles. Huez den e caso aki tabata masha skerpi y a cuestiona e investigacion haci, e.o. a puntra con bini te awe ainda e computer den e auto cu ta registra e velocidad cu e auto a bin cune, no a ser manda pa determina e velocidad di e madruga ey. Awor despues di 6 luna dicho aparato lo wordo manda Hulanda y tin cu spera otro largo tempo atrobe. Pa por controla progreso di e caso aki, Corte a fiha dia 20 di augustus pa un Regie Zitting, sperando cu dia 2 di October awor tur documento lo t’aden pa trata e caso. Diabierne ultimo e sospechoso a lesa un carta cu abogado Moszkoawicz a scirbi p’e, unda e ta pidi pa ser laga den libertad, te ora cu e caso ser trata den su profunidad. E.o. motibo di su peticion ta, cu e situacion den KIA a cambia su bida pa semper te cu esaki ta afecta su salud mental. Ministerio Publico a rechasa dicho peticion y despues cu Huez a analisa e peticion, tambe a bai di acuerdo cu Ministerio Publico dor di nenga peticion di e sospechoso, kende lo tin cu keda sinta den KIA te ora cu e caso bin dilanti dia 2 di October awor. Huez kier sa causa di fayecimento Otro caso cu a hala atencion tabata e caso, unda e chofer Colombiao, Oscar Duran Peña, manehando auto bao di influencia a dal dos peaton turista, mama y yiu a sigui core, lagando nan malamente herida. Despues di dos siman den hospital sra. L. Barnett bin fayece. E yiu muher M.Rodriguez si a recupera di su heridanan. Porcierto e caso aki a ser trata caba dia 12 di juni ultimo, y Diabierne ultimo Huez mester a dicta su sentencia. Aki ta unda Huez a sorprende tur hende, alegando cu e no por duna un sentencia husto, cu for di e relatonan, no por conclui kico tabata causa di morto di Bernett, pa cual Huez a pidi Ministerio Publico pa busca kico tabata exactamente causa di morto di e victima aki. Ademas mester scucha e yiu muher como testigo tambe pa sa cu precision, kico a pasa exactamente riba e nochi di e accidente. Ministerio Publico a demanda un castigo di 3 aña si prison, prohibicion di no por stuur pa 4 aña. Huez despues di Analisa tur argumento a lga sa Diabierne ultimo, OM mester cumpleta e investigacion pa despues bolbe Corte p’e tuma un decision. Mientras tanto Duran Peña ta keda sera na KIA. Ora di analisa e dos casonan aki, bo ta puntra bo mes, pakico no por haci un investigacion complete? Pakico tanto error asina, pakico tanto negligencia? Personal di Ministerio Publico bao di cual ta cai Polis (Recherche) y e Hefe en cuestion no ta haci e debido analisis di e investigacion y ta haya ta bon pa presenta un caso incompleto pa huzga un sospechoso.

Edwin Duineveld, abogado, kende ta forma parti di team di defensa di Mike de Meza y su se–ora Brigitte a duna di conoce cu finalmente, despues di presiona, a ricibi un fecha for di Ministerio Publico p'e tratamento di e caso penal contra ing. Mike de Meza. Esaki ta dia 24 di augustus awor. Manera ta conoci, a haci un oferta na Mike de Meza y su casa pa yega na un areglo p'e supuesto cos contra ley cu a haya contra nan. E oferta ta cu cada un ta paga un boet di 5 mil florin y e caso no ta bay Corte. Pero nan ta keda marca si di a comete algo contra ley. Esey ta algo cu ambos a nenga categoricamente. Un dia despues caba a informa Ministerio Publico cu nan ta prefera di bay Corte. Den e periodo di mas cu un a–a cu e asunto aki a bini dilanti, causa dor di DIMP y cu a pone cu Mike de Meza no por a bira Minister, awor ta sali na cla cu no tin nada ilegal cometi. OM a conclui cu tabatin "algun cos" cu no tabata cuadra, a dicidi di haci nan e oferta di paga un boet, cu a keda rechasa. El a keda insisti cu mester a mira e asunto aki fiscalmente y no penalmente. Tin erornan cometi dor di e accountant, kende a admiti. Y hasta e casa di Mike de Meza mester a haya placa bek. "Aparentemente tin hende no por perde cara of mester protege hende y ta bisa cu e caso mester sigui. A haci peticion na OM pa hiba e caso mas liher posibel pa Corte. Despues di a haci e peticion oficialmente, e team di defensa a manda pidi OM e acusacion (dagvaarding) contra Mike de Meza. Esaki pasobra unabes cu hay'e lo bay haci un peticion na Hof pa elimina e citacion aki y p'e caso no bay Corte pasobra no tin nada cu ta hustifica pa da–a carera di un persona di e forma aki, segun Edwin Duineveld. OM hasta a puntra nan si nan ta desea un Regiezitting durante cual por haci peticion pa scucha testigo of haci investigacion adicional. Pero de Meza a nenga y kier bay directamente p'e caso. Despues di presion a haya informacion cu lo trata e caso dia 24 di augustus awor, pero te ainda e citacion si e team di defensa no a ricibi den nan post ainda. Y tampoco Mike de Meza cu su casa. Ta sinti atrobe un tardansa, pasobra ya caba dos siman a pasa, siendo nan sa caba, pasobra e caso tin mas cu un a–a andando. Ademas e acusacion no por ta diferente di loke a trece dilanti caba den e TOM Zitting (Cita cu Fiscal). Nan kier pa Hof dicidi si tin suficiente rason pa trata e caso, aunke cu e team di defensa di de Meza sa caba cu esaki no t'e caso. Ta sinti cu simplemente tin hende tin miedo pa de Meza bira Minister. Poniendo esaki un banda, loke nan ta luchando awor ta pa caba di limpia nomber di Mike de Meza y su casa pa nan por sigui cu nan bida. Pues asina cu haya e citacion, lo haci un peticion na Hof pa declara e dagvaarding no admisibel pa cual e caso no mester bay Corte mes.

Corte Comun di Husticia a condena e sospechoso Chenet Estiverne recientemente pa un castigo di prison incondicional pa trata di hende (mensenhandel) y trafico di hende (mensensmokkel) y pa pone personanan na trabao ilegalmente. Esaki ta un caso caminda e sospechoso, kende tabata manager di dos bar na San Nicolas, a trece hende di afo pa traha den prostitucion. Hasta si tabata asina mes cu e personanan envolvi a bay di acuerdo of si nan tabata traha caba como prostituta na nan pais, e cos aki lo a keda un hecho castigabel. Chenet Estiverne ta wordo sospecha di a haci su mes culpabel di a recruta e personanan den exterior y di a trece nan Aruba, y tambe di a pone nan traha ilegalmente durante varios periodo na 2024 y 2025. Corte Comun di Husticia a enfatisa cu esakinan ta delitonan serio cu ta afecta orden publico y cu ta da–a proteccion di hendenan vulnerabel. E lucha contra trato di hende (mensenhandel) ta no solamente importante aki na Aruba mes, sino ta hunga un rol grandi den e forma con nos isla ta wordo evalua pa Departamento di Estado Mericano (U.S. Department of State) den e asina yama Raport-TIP. TIP ta para pa Trafficking in Persons. Merca ta mira trato di hende como un cuestion di seguridad mundial. Den e Raport-TIP, Merca ta evalua cuanto un pais ta haci pa evita trato di hende, cuanto investigacion e ta haci di trato di hende, con e ta persigui sospechosonan y con e ta proteha victimanan. E evaluacion aki ta wordo categorisa den un asina yama TIER. Aruba su TIER tin influencia riba e reputacion internacional di Aruba y si nos isla ta wordo mira como "di confia" of no. Merca a pone Aruba den categoria di TIER 2. Esey kier men cu Aruba ta presta bon riba varios punto, pero no ta cumpli 100% ainda cu e normanan ancla den e Ley Federal Mericano yama Trafficking Victims Protection Act (TVPA). Aruba tin espacio pa mehoracion. Kico ta trata di hende (mensenhandel)? Trato di hende ta tocante exploitacion di personanan. Ora di exploitacion laboral p.e., hende tin cu traha bao circunstancianan malo of peligroso, pa poco placa, sin dia liber y sin posibilidad pa bay. Exploitacion sexual kier men cu un persona ta wordo forsa pa sex. Exploitacion criminal ta nifica cu nan ta wordo obliga pa comete hechonan castigabel, manera transporta droga. Kico ta trafico di hende (mensensmokkel)? Mensensmokkel ta ora, intencionalmente, ta trece hende ilegalmente na Aruba, hopi biahe cu pago. Un caracteristica importante ta cu e persona mes kier bin paki. No obstante, e ta keda un hecho castigabel. Trafico di hende no ta exploitacion manera trato di hende, pero e por hinca un persona den un situacion vulnerabel si, manera p.e., dor di debe of dor cu e mester traha ilegalmente. Si bo persona sa di un caso di trata di hende, por fabor meld esaki na Polis via tiplijn 11141 of na CMMA (Cošrdinatiecentrum Mensenhandel/Mensensmokkel Aruba) via telefon 592-3231 of [email protected].

Siman pasa, Banco Central di Aruba (BCA) a publica e di diescuatro (14) edicion anual di su Financial Sector Supervision Report (FSSR), cu a coincidi cu su di 40 aniversario. Mescos cu den añanan anterior, e Financial Sector Supervision Report di BCA ta ofrece un perspectiva detaya di e ehecucion di su mandato di supervision. Tambe e ta repasa e cambionan den e cuadro di regulacion y supervision y ta crea un bista riba e desaroyonan mas importante dentro di e sector financiero Arubano. Manera ta resalta den e raport, e sector financiero a keda solido y resiliente. E reservanan cu e institucionnan bou supervision ta mantene ta suficiente halto pa por absorba shocknan economico severo. No obstante di esey, e riesgonan geopolitico y operacional cu a aumenta ta rekeri vigilancia continuo pa garantisa e stabilidad di e sistema financiero. Tambe e raport ta yama pa accion urgente pa inicia cu e preparacionnan pa e siguiente evaluacion mutuo di CFATF den 2030 unda cu Aruba su marco pa preveni y combati labamento di placa, financiamento di terorismo como tambe financiamento di armanan di destruccion masal lo wordo evalua contra e normanan aplicabel di FATF. Esaki ta encera mas fortificacion y ampliacion di e legislacion actual riba e tereno aki como tambe e ehecucion di un evaluacion nobo y amplio di e riesgonan nacional (e asina yama "National Risk Assessment" (NRA)), pa asesora e riesgonan di criminalidad financiero pa Aruba. E ehecucion di un NRA nobo ta necesario pa tuma e medidanan preventivo den cuadro di e profiel di Riesgo di Aruba y pa aplica un enfoke basa riba riesgo di peligernan identifica, unda lo aloca e recursonan limita n’e areanan di mas vulnerabel. BCA ta keda profundamente comprometi na mantene un sector financiero solido, di bon reputacion y resiliente, cu ta beneficia e crecemento economico. E Financial Sector Supervision Report 2025 ta disponibel riba e website di BCA, esta www.cbaruba.org

Ministerio Publico ta suplica tur biahero pa paga debe di boet na tempo. Personanan cu boet habri por wordo para na frontera te cu nan paga e suma cu nan debe. Na momento cu un persona pasa den control na airport, e funcionario por wak den computer cu e tin un se–al poni bandi su nomber, loke ta indica cu e debe boet. Den e caso, e persona lo wordo para y por sigui unicamente despues cu el a paga su debe. Esaki por tin como consecuencia cu e ta perde su buelo, cu e ta haye inesperadamente den gasto of cu su presupuesto di vakantie ta keda afecta... sin papia mes di e stress y desilusion cu e situacion aki lo causa. Ministerio Publico ta conseha biaheronan pa controla di antemano prome cu nan biahe si nan tin debe di boet y pa bin paga. Si bo persona no ta sigur sigur, por manda un email na [email protected]. No lubida pa menciona e nomber completo. Ciudadanonan por paga na caha di Ministerio Publico. No tin necesidad pa haci cita, yega. Ministerio Publico ta habri dialuna, diamars, diarazon y diahuebs di 8.00 pa 11.30 di mainta y di 1.00 pa 3.30 di atardi. Cu excepcion di diabierna, pasobra diabierna Ministerio Publico ta habri mainta so. Por paga cash y online (via cuenta bancario 4000905 na Aruba Bank). Ministerio Publico ta desea tur hende un feliz vakantie.

Central di Aruba (BCA). Durante e prome dia a tene reunionnan cu ehecutivonan di BCA y tambe un encuentro ameno cu empleadonan. Dia 25 di juni ultimo, Gobernador di Aruba, S.E. Alfonso Boekhoudt, a huramenta Thomas Domhoff como Presidente di BCA na Cas Ceremonial di Gobernador.

BCA ta gradici Miriam Gonzalez, kende como Presidente Interino a garantisa continuidad di liderazgo durante e periodo di transicion.

Bou di liderazgo di Thomas Domhoff, BCA lo sigui eherce su tareanan principial: mantene e stabilidad di e florin di Aruba, promove e stabilidad y integridad di e sistema financiero di Aruba y yuda mantene un sistema di pago eficiente y confiabel.

Prome Minister mr. Mike Eman a comparti su satisfaccion cu diferente ahuste cu su Gobierno a tuma pa fortalece e poder di compra di pueblo. Segun Prome Minister, e inversionnan realisa durante e ultimo periodo no solamente ta representa un sosten financiero pa miles di famia, sino tambe un momento importante pa reflexional riba e progreso cu Aruba a logra como comunidad. "E ta un preoccupacion cu mi tin," Eman a expresa. "Ora nos ta enfrenta momento importante manera esaki, nos mester para un rato y aprecia e esfuerso colectivo cu a haci esaki posibel. Gobierno, prensa y comunidad tur tin un rol pa reconoce e progreso cu nos ta logra." Prome Minister Eman a subraya cu den hopi ocasion, noticia positivo ta pasa sin hopi atencion, mientras cu e enfoke ta bira rapidamente p'e siguiente reto. Segun Prome Minister Eman, ta importante pa Aruba desaroya un sentimento di gratitud y satisfaccion p'e resultadonan cu ta logra den beneficio di pueblo. "E semper ta bon pa aspira mas, pero nos mester tambe tin gratitud pa loke nos tin y pa loke nos por logra hunto," Eman a bisa. E mandatario a destaca cu e aumentonan den inversion pa trece mehora den poder di compra si nos pueblo anuncia recientemente ta toca directamente miles di habitante. Entre nan, alrededor di 18 mil persona cu tin salario minimo y cerca di 22 mil pensionado cu a ricibi un aumento significativo den nan entrada. E ta un momento grandi pa nos hendenan. Si nos mira kico ta pasando den hopi otro pais na mundo, unda e Gobiernonan ta recorta asistencia social y reduci sosten na ciudadano, Aruba ta haci lo contrario. Nos ta aumentando pensioen, nos ta fortaleciendo asistencia social y nos ta inverti den poder di compra di pueblo. Un di e medidanan menciona t'e aumento di reparatietoeslag, cu lo beneficia trahadornan cu un entrada te cu Afl. 2.500 pa luna. E beneficio ey lo representa un aporte adicional riba nan salario y ta forma parti di e strategia di Gobierno pa sostene e grupo cu ta mas vulnerabel n'e aumento di costo di bida, segun Prome Minister Eman.

Gabinete AVP-FUTURO ta sigui tuma decisionnan strategico pa garantisa continuidad di servicio energetico, proteha e economia nacional y mantene stabilidad pa tur ciudadano. Den e contexto ey, Minister di Finansa, Asunto Economico y Sector Primario, Geoffrey Wever hunto cu Director di RdA, Robert Henriquez a formalisa un acuerdo di prestamo cu Fuels Marketing & Supply Aruba N.V. (FMSA) pa un suma di Afl. 7 miyon, destina specificamente pa elimina e towernan industrial TOSI y MHI riba tereno di Refineria di Aruba N.V. (RDA). Conseho di Minister di Gabinete AVP-FUTURO e aproba pa den presupuesto aloca e suma aki y despues Minister Wever a wordo autoriza pa Parlamento pa haci e prestamo aki. E decision aki ta bay hopi mas leu cu un inversion den infrastructura di refineria. E towernan industrial ta den un estado cu ta representa un riesgo serio p'e operacion di RDA. Si nan no wordo elimina na tempo, tin un peligro real cu nan por cay den otro, cu por obstaculisa seriamente e sistema di suministro di combustibel cu Aruba ta depende riba dje pa genera electricidad. Esaki ta haci e proyecto un asunto di seguridad energetico nacional y un condicion indispensabel pa mantene nos economia funcionando. Minister Geoffrey Wever a indica cu un Gobierno responsabel mester actua proactivamente ora interesnan esencial di e pais ta den wega. Nos no por permiti cu Aruba ta confronta un situacion unda un riesgo industrial por afecta nos suministro di combustibel y, como consecuencia, nos produccion di energia. Seguridad energetico ta un fundeshi pa nos economia y pa Calidad di bida di nos pueblo,Minister Wever a comenta. Sin intervencion di Gobierno, RdA lo mester recupera e costo di e inversion aki dor di aumenta su groothandelsmarge. Eventualmente, esaki lo a resulta den prijsnan mas halto pa gasolin y diesel pa cuidadano y comerciante, cu posteriormente lo a sinti esaki den e costo di transporte, distribucion y finalmente den prijs di productonan y servicio na Aruba. Dor di tuma e decision pa financia e proyecto, Gobierno ta evita cu e costo di e inversion wordo transferi directamente n'e consumidor. Esaki ta forma parti di e maneho consistente di Gabinete AVP-FUTURO pa proteha e poder di compra di nos ciudadanonan y limita presion inflacionario na un momento cu costo di bida internacionalmentel ta sigui bou di presion.

Gobierno di Aruba a conmemora e a–a aki e di 162 a–a di emancipacion cu un ceremonia oficial na Renaissance Festival Plaza. Durante e acto, Prome Minister Mike Eman a haci un yamado pa sigui recorda e historia di sclavitud como un parti importante di nos historia nacional y a anuncia diferente iniciativa pa mantene e memoria aki bibo pa futuro generacion. E ceremonia aki a conta cu presencia di Gobernador interino Agustin Vrolijk, Conseho di Minister, Parlamentario y representante di diferente organisacion. Den su discurso, Prome Minister mr. Mike Eman a enfatisa cu 1 di juli ta un momento pa reflexiona riba un capitulo penoso di nos pasado, pero tambe pa honra e resistencia y dignidad di esnan cu a biba den sclavitud. "Awe, 1 di juli, nos ta para keto pa nos historia, un historia penoso. T'e momento pa nos recorda esaki, pa nos acepta cu den nos historia nos tabatin e pagina penoso aki." Segun Prome Minister Eman, e conmemoracion ta un homenahe n'e perseverancia di hendenan cu, apesar di a biba bou di condicion inhumano, nunca a perde speransa. "Ta danki na nan perseverancia, na nan amor pa otro y na nan deseo di un ma–an diferente cu finalmente e dia di libertad a yega." Dia 1 di juli lo bira un dia di conmemoracion nacional annual. Un di e anuncio mas importante durante e ceremonia tabata cu Conseho di Minister a aproba unanimamente pa 1 di juli wordo conmemora tur a–a oficialmente na Aruba. Segun Eman, e decision aki ta confirma cu e historia di sclavitud y emancipacion ta ocupa un lugar permanente den historia nacional di Aruba. E monumento lo recorda futuro generacion cu libertad, igualdad y respet no por wordo considera algo evidente, sino cu mester wordo defende constantemente. Na final di su discurso, Eman a adverti cu, apesar di e progreso cu humanidad a haci, e balornan di dignidad humano ta sigui vulnerabel si sociedad no sigui cultiva nan. Hopi biaha nos ta kere cu humanidad a laga barbaridad tras di dje. Pero nos ta mira con facil e humanidad por cay bek den e mesun historia scur.