Ultimo tempo tin masha speculacion cu posicion di Mike de Meza. Sigur despues cu ultimamente e no ta vota di acuerdo cu fraccion di AVP den Staten. Manera ta conoci despues cu Ministerio Publico a trata di yega na un deal cu Mike de Meza y su señora pa acepta pa paga cada uno 5 mil florin, e caso penal lo keda anula. Dicho propisicion a keda rechasa, sin mester a pensa mucho riba dje. A resulta cu DIMP no tin pia pa para riba e denuncia haci, y cu Ministerio Publico a considera Mike de Meza como sospechoso y awor a sali na cla, cu despues cu Mike de Meza tabata dos biaha Minister caba, awor e no ta ministeriable mas. E no tin logica den e screening cu a tuma lugar, unda dos top ambtenaar a logra blokea e candidato di AVP pa bira Minister. Tempo a bai pasando, y maske cu AVP a laga sa cu Mike de Meza ta sigui ta nan candidato, te cu a tuma decision pa Rene (Baba) Herde bira Minister temporario, Mike de Meza no tabata contento y a cuminza demostra esey tambe. Te hasta den un entrevista na Enfoke di 24Ora, el a hasta laga sa di no ta interesa mas pa bira Minister pa AVP, pero no a entrega su retiro como Parlamentario di AVP. Manera menciona, ultimamente e no ta cumpli cu disciplina di partido, y a vota di acuerdo cu su consenshi, hasta vota contra di opinionnan di AVP cu a lanta masha speculacion. Mike de Meza no ta atende tur reunion di Conseho di Partido, si ta sinta den oficina di fraccion di AVP, ta discuti y ta bisa abiertamente kico e ta pensa di un of otro discusion. Mike de Meza a laga sa bon cla cu e no ta interesa di bira lider di AVP, menos ainda Prome Minister, susesor di Mike Eman. Si partido apela riba su persona pa tog asumi e funcion di Minister, sigur lo wordo considera. Un biaha mas, durante tur e tempo cu e ta bringando su caso, e no a sinti e sosten di su partido AVP manera el a spera, cu ta motibo sigur cu e no kier a sigui sostene AVP. Tambe lo e kier sa, kico Gabinete AVP-Futuro, den e caso aki Minister Wever lo haci cu e denuncia falso haci pa Director di DIMP, sosteni pa Procurador General, kende mester tabata sa mihor kico tabata pasando. E dolor y sufrimento tabata fuerte y ainda ta ser senti den famia de Meza. Apesar di tur circumstancia, Mike de Meza ta sigui ta AVP y tempo lo bisa con.

Recientemente Corte di LAR a trata un peticion haci pa fraccion di MEP encuanto e caso cu el a bula den un avioneta priva, sin di kier duna cuenta di pago haci. Corte di LAR a analisa tur punto treci dilanti y a entrega e conseho final ultimamente na Minister Gerlien Croes. Tabata siman pasa cu lider y Parlamentario di MEP, Evelyn Wever-Croes a duna di conoce cu e conseho ta cla y cu e mandatario tin esaki den su poder. Minister Gerlien Croes tin 6 siman pa duna su comentario riba e conseho di LAR y manera ta mustra, lo no duna nada mas di loke a ser publica caba. Siman pasa tabata Parlamentario di MEP, Rocco Tjon, kende a duna di conoce cu si e mandatario no reacciona, cu nan ta cla pa haci un peticion di acuerdo cu ley, riba LOB. E asunto kende a paga of no p’e biahe aki di Minister Gerlien Croes pa bai Corsou y recibi e team di Corsou ta data for di 8 luna caba. Na opinion di Minister Gerlien Croes, el a contesta tur pregunta y e no tin nada mas di papia. El a duna di conoce cu e pago a ser haci for di su propio saco, no ta aceptable pa MEP y lo sigui demanda pa sa e puro berdad.

Pa un encuentro di cortesia y pa intercambia pensamento tambe tocante colaboracion entre Gobierno di Aruba y mariniers, Prome Minister Mike Eman a recibi den su despacho e Comandante nobo di Marinierskazerne Savaneta, Luitenante-Kolonel der Mariniers, Henk Buijs. Durante e encuentro, Prome Minister a gradici e Comandante saliente, Luitenant-Kolonel der Mariniers Tim van Wijk, pa su dedicacion y servicio durante e ultimo 4 aña na Aruba, y a duna un bon bini na Luitenant-Kolonel der Mariniers Henk Buijs den su funcion nobo. Un di e temanan cu a wordo discuti tabata e iniciativa Dia pa Cuida Aruba, cu lo tuma lugar dia 25 di juli. Prome Minister a invita e Marinierskazerne Savaneta pa considera con nan por contribui n’e esfuerso nacional pa mantene Aruba limpi. Comandante Henk Buijs a indica cu e comparti e vision cu cuida Aruba ta un responsabilidad comparti. Segun e Comandante, ta importante cu tur persona y organisacion na Aruba pone man hunto pa cuida e isla y mustra cu colaboracion por haci un diferencia real. Buijs a indica cu, nan lo evalua e posibilidadnan pa participa dia 25 di juli, tambe e ta mira e iniciativa cu un vision mas amplio. “Pa mi, no ta depende solamente di 25 di juli. Lo mas importante ta locual nos por nifica pa otro den e periodonan cu ta sigui”. Como señal di aprecio durante e encuentro, Prome Minister Mike Eman a entrega ambos un copia di e buki “Volk van Veerkracht” di Luc Alofs y René Zwart. E publicacion ta relata e historia di resiliencia, perseverancia y fortalesa di pueblo Arubiano, y ta mustra con Aruba a logra desaroya su mes identidad y capacidad pa supera diferente reto durante generacionnan. E encuentro ta resalta e bon relacion entre Gobierno di Aruba y Marina Real, basa riba cooperacion, compromiso y responsabilidad comparti pa contribui na bienestar di nos comunidad y cuido di nos isla.

Gobierno di Aruba a anuncia oficialmente e iniciativa di "Dia Nacional pa Cuida Aruba", un campaña nacional cu ta busca fortalece responsabilidad comparti pa mantene Aruba limpi. E iniciativa lo culmina cu un gran accion nacional di limpiesa diasabra 25 di juli, cu participacion di ciudadano, empresa, scol, organizacion y comunidadnan rond di e isla. E anuncio a wordo haci dor di Prome Minister Mike Eman, hunto cu Minister Wendrick Cicilia, representante di Serlimar, CEDE Aruba, DOW y otro partnernan. Segun Gobierno, e campaña ta sigui riba iniciativa anteriornan manera Baki den Bario y e zonanan permanente pa entrega desperdicio. Prome Minister Eman a enfatisa cu mantene Aruba limpi no ta solamente responsabilidad di Gobierno, sino di henter comunidad. P'esey, Gobierno ta invita tur hende pa participa activamente riba 25 di juli y contribui na un isla mas limpi y atractivo. Cu e lema "P'ami. P'abo. Pa nos tur.", Gobierno ta haci un yamada pa henter comunidad uni forsa pa cuida Aruba. Cu Dia Nacional pa Cuida Aruba, Gobierno ta invita tur sector di comunidad pa participa activamente y demuestra cu, ora nos uni forsa, nos por haci un diferencia real pa preserva Aruba limpi, bunita y prepara p’e generacionnan cu ta bin despues.

Despues di a forma parti di e di Tres Cumbre Ministerial riba Etica di Inteligencia Artificial (IA) na Latino America y Caribe, cu a tuma lugar na Santo Domingo dia 25 y 26 di juni 2026, Ministerio di Relacion den Reino, Educacion, Hubentud, Innovacion y Deporte a cuminsa e proceso pa concretisa un plan integral pa desaroya y implementa un Plan Nacional Strategico pa IA. Minister Gerlien Croes tabata participe n’e cumbre, organisa pa UNESCO, Gobierno di Republica Dominicana den colaboracion cu OGTIC y Banco di Desaroyo di Latino America y Caribe, a reuni autoridadnan regional riba nivel ministerial pa balida e ruta pa Inteligencia Artificial Etico na Latino Americ y Caribe 2026-2027. Siguientemente, Aruba lo encabesa un plan strategico nacional cu ta alinea cu e logro y desaroyonan regional. E plan aki lo ta basa riba cooperacion entre sector publico, priva y academia. E maneho nacional strategico aki pa cu IA lo enfoca riba traduci e principionan etico aki den avansenan concreto, specialmente den educacion, desaroyo di capacidad, y gobernacion digital. E strategia nacional di Aruba lo alinea cu e pilarnan principal stipula den e ruta regional: ● Integra Alfabetisacion di IA den Educacion; ● Establece un Gobernacion Robusto y Diseño Regulatorio; ● Proteha Mucha, Adolescente, y Gruponan Vulnerabel; ● Fomenta Infrastructura Comparti y Innovacion Digital. Via un coordinacion mas cerca cu coleganan regional, sector publico y priva, Ministerio di Educacion hunto cu UNESCO Aruba y Academia cu ta consisti di partnernan di Universidad di Aruba y IPA tin e meta comun pa posiciona nos mes den Caribe p’e implementacion responsabel y inclusivo di IA. E maneho nacional aki lo marca un transicion definitivo for di planificacion strategico pa un implementacion activo, sigurando cu e forsa laboral y e sistemanan educativo di nos pais ta completamente prepara p’e era digital. Cu e iniciativa aki, Ministerio di Relacion den Reino, Educacion, Hubentud, Innovacion y Deporte ta sigui traha riba e compromiso pa eleva e calidad di educacion y e desaroyonan na nivel regional pa participa activamente den innovacion, creando mas oportunidad pa Aruba su comunidad.

Norwegian Cruise Line a confirma cu Aruba lo no forma parti di un di su cruceronan den Caribe na cuminsamento di 2027, despues cu e compania a informa cu e haf di Oranjestad no tabata disponibel. E cambio ta afecta e crucero Norwegian Prima, cu lo sali for di San Juan, Puerto Rico, dia 31 di januari 2027 pa un crucero di 7 anochi den Caribe. Segun e itinerario original, e bapor, cu por acomoda 3.195 pasahero, tabata programa pa yega Oranjestad dia 3 di februari. E bishita ey, sinembargo, a wordo cancela y re-emplasa cu un escala na Philipsburg, St. Maarten. Den un comunicado manda na pasaheronan, Norwegian Cruise Line a bisa cu e cambio tabata necesario despues di un actualisacion den disponibilidad di haf di Oranjestad. Como parti di nan compromiso pa entrega un experiencia fluido y di calidad, NCL a haci un ahuste den e itinerario debido na un actualisacion den disponibilidad di haf. Norwegian a bisa cu, aunke e ta coordina cu autoridadnan di haf hopi tempu di antemano, circunstancianan operacional por cambia y espacio previamente confirma por no keda disponibel. E compania no a revela kico exactamente a causa cu Aruba no tabata disponibel. Situacionnan asina por resulta di congestion di bapor, conflicto di programacion, trabounan di mantencion of proyecto di construccion. Actualmente, e terminal di crucero di Aruba ta pasando dor di un proyecto grandi di modernisacion y renobacion di e waterfront, cu lo dura varios aña. Aunke operacionnan di crucero ta sigui normalmente, algun fase di e proyecto por afecta disponibilidad di lugarnan di atraque. Cu e itinerario nobo, 3 di februari lo bira un dia completo na lama. E siguiente dia, cu originalmente tabata un dia na lama, e Norwegian Prima lo bishita Philipsburg, St. Maarten, entre 7:00 di mainta te 5:00 di atardi. E resto di e itinerario ta keda mescos, cu escalanan na Willemstad, Corsou, St. Thomas, Islanan Virgin di Merca, Tortola, Islanan Virgin Britanico. Segun e programacion actual, Norwegian Prima lo no regresa Aruba te 11 di maart 2027. No tin compensacion anuncia. Te awor, Norwegian Cruise Line no a anuncia ningun compensacion pa pasaheronan afecta p’e cambio den itinerario. Segun e condicionnan di e contrato di crucero, e compania tin e derecho di cambia itinerarionan pa motibonan operacional sin obligacion di paga compensacion. Excursionnan cu pasaheronan tabatin reserva pa Aruba lo wordo cancela automaticamente y e placa lo wordo devolvi. Pasaheronan cu no ta satisfecho cu e cambio ainda por cancela nan crucero sin multa, semper cu nan haci esey dentro di e termino di cancelacion estableci dor di Norwegian Cruise Line. Actualmente ainda tin mas cu 7 luna prome cu e salida di e crucero.

Riba invitacion di Stichting Rancho un delegacion a bishita Aruba pa participa activamente den e programacion di conmemoracion di Dia di Emancipacion, celebra dia 1 di juli tambe a keda proclama como dia nacional. Como parti di e bishita aki, Clifford Rosa Presidente di Stichting Rancho a presenta famia de Kom, Hiadees de Kom y Anthon De Kom, kende ta famia di un hereo nacional na Surnam esta Anton De Kom y awendia ambos decendiente ta biba na La Guajira y Maria Isabel Cabarcas Aguilar, Directora di Revista SER Caribe y Fundacion InspirARTE Aain, a ser ricibi pa Prome Minister Mike Eman. Durante e reunion, e delegacion a entrega na Prome Minister e prome edicion di Revista SER Caribe. Tambe nan a presenta e di dos edicion, cu anteriormente a wordo lansa den formato digital durante e simposio “Brug entre Generacionnan “na Universidad di Aruba. E front page di e ultimo edicion ta dedica na Ramon Todd Dandare, reconoci como un di e principal guardian di nos idioma Papiamento. Ademas, e delegacion a entrega un invitacion oficial na Prome Minister Mike Eman pa participa den e XV Festival Internacional del Bolero, cu lo tuma lugar na Riohacha, Colombia, entre 13 y 16 di november 2026. Durante e encuentro tambe a comparti informacion tocante e trabounan cu Stichting Rancho y Fundacion InspirARTE Aain ta realisa pa fortalece integracion cultural, lenguahe, academico, artistico y literario entre Aruba y La Guajira. Tambe a destaca e resultado di Encuentro Caribeño Colombo Neerlandes “Mma Pe’ ipaasu”, iniciativa cu a conmemora 200 aña di relacionnan diplomatico entre Reino Hulandes y Colombia.

Aruba a logra posiciona su mes como un di e destinacionnan turistico mas aprecia den Caribe. Aña tras aña, nos ta celebra crecemento den cantidad di bishitante, ocupacion di hotel y reconocemento internacional. Sinembargo, pa Parlamentario di AVP, Stephany Sevinger, e pregunta mas importante no ta cuanto turista Aruba ta ricibi, sino con e exito di turismo ta traduci den un mihor calidad di bida pa pueblo Arubiano. Den su intervencion den Parlamento dialuna durante un reunion cu Minister di Turismo y liderazgo di Aruba Tourism Authority (ATA), Sevinger a enfatisa cu turismo nunca mester wordo considera un meta riba su mes. “Turismo no ta un meta. Turismo ta un instrumento. E berdadero resultado cu nos mester busca ta un pueblo cu ta biba mihor danki n'e industria cu nos a construi durante decadanan.”

Segun e Parlamentario, hopi biaha e exito di turismo ta midi den stadistica manera cantidad di bishitante, ocupacion hotelero of ingreso economico. Aunke e cifranan ta importante, nan no por bira e unico criterio pa evalua exito di nos modelo economico. “Nos por celebra dos miyon bishitante of un ocupacion record di hotelnan, pero si e famia cu ta biba den un bario cu tin dump ilegal no ta sinti ningun mehoracion den nan entorno, anto nos tin cu sigui haci nos mes e pregunta fundamental: pa ken nos ta crea e rikeza aki?” Sevinger a señala cu turismo solamente ta cumpli cu su propósito real ora e ingreso cu e ta genera ta reinverti den proyecto cu beneficia directamente e comunidad.

Segun e Parlamentario di AVP, inversion den limpiesa publico, infrastructura, medio ambiente, seguridad y calidad di bida no ta gasto, sino inversionnan cu fortalece tanto bienestar di pueblo como competitividad di Aruba como destino turistico. “E señora cu ta cana den San Nicolas no ta sinti su bida a cambia solamente pasobra un cruiseship a yega. E mucha cu ta hunga banda di un dump ilegal no ta beneficia pasobra un hotel ta yen. Pueblo kier mira cambio den nan bario, den nan salubridad y den nan calidad di bida.”

Sevinger a recorda cu den pasado diferente proyecto comunitario a haya apoyo financiero for di fondonan relaciona cu turismo. E principio aki ta sigui ta valido awe. “Turismo no solamente mester beneficia di Aruba. Turismo mester reinverti den Aruba.” E Parlamentario a agrega cu precisamente pasobra turismo t'e motor principal di nos economia, e sector tin un responsabilidad comparti pa contribui na solucion di retonan nacional cu finalmente tambe fortalece e producto turistico. “Un pais limpi, bon manteni y cu comunidadnan saludabel no solamente ta bon pa turista. Primeramente ta bon pa nos propio pueblo.”

Stephany Sevinger a enfatisa cu e inversionnan den limpiesa, maneho di desperdicio, infrastructura y proteccion ambiental no mester wordo mira como gastonan separa di turismo, sino como inversionnan den sostenibilidad di nos principal industria economico. Segun e Parlamentario, un Aruba cu ta cuida su naturaleza, su bario y su espacio publico ta fortalece su posicion internacional y na mesun momento ta ofrece un mihor ambiente pa su mesun habitantenan. Sevinger a conclui cu e discusion tocante turismo mester evoluciona for di solamente crecemento economico pa un combersacion mas amplio tocante bienestar humano. “Cada florin cu turismo ta genera finalmente mester refleha den un mihor pais pa nos pueblo. Si nos logra esey, e ora si nos por bisa cu turismo ta realmente sirbi Aruba.”

Presidente di San Nicolas Business Association (SNBA), Errol de Freitas, despues di algun tempo sin duda declaracion na prensa, a haya momento oportuno pa mustra cu den nan bista, e prome 6 lunanan di 2026 casi a mira nada impactante wordo haci dor di Gobierno pa San Nicolas.  Pa colmo algun idea cu SNBA a yega di trece dilanti, awor ta djis wordo “copia” dor di Gobierno, sin duna sikiera cara. Errol de Freitas a bisa cu SNBA no kier ‘bati palo’ riba ningun hende y tampoco Gobierno, pero realidad ta cu nan como organizacion a entrega nan “Vision pa San Nicolas” na Gobierno.  Segun SNBA, esaki ta un ‘Vision’ cu ta completo den tur aspecto, pero awor diripiente nan ta ripara cu algun Minister a dicidi na copia cierto contexto di e ‘Vision’ aki p’asina haci algun trabao chikito paki-paya. “Pero hopi cos bo no ta mira ta pasando na San Nicolas,” ta loke Presidente, Errol de Freitas a enfatiza riba dje! E asociacion SNBA mes a cuminza encamina un proceso di ‘Plan di Ehecucion’ den ultimo lunanan aki, cu ta delinea con pa ehecuta y haci e vision. “Nos ta riparando cu Gobierno keto bay no tin e atencion pa San Nicolas, fuera di algun actividad, y tambe verfmento den Bernhardstraat, etc.”  Aki el a subraya: “Pero algo cu por haci un cambio real, no ta echt sosodiendo.” Tampoco esnan di San Nicolas y SNBA no tin e ‘conexion’ mas cu Gobierno, manera den pasado cu tabatin reunion ‘Conseho di Ministro’ na San Nicolas.  De Freitas sinembargo a admiti cu SNBA tin contacto cu algun di e Ministernan. Presidente di SNBA a bisa cu e no ta rabia si Gobierno tuma algun proyecto di nan pa haci’e.  “Pero bo tin di sinta papia cu esnan cu a origina e ideanan, cu tampoco no ta pasando,” de Freitas a insisti. El a splica cu SNBA tabatin un combersacion cu un oficial di Gobierno.  Nan tin hopi respet p’e oficial aki, y nan tin cierto acuerdo pa haci realiza un plan pa tene un reunion di Conseho di Minister na San Nicolas. Den e entrevista cu medio di prensa, e Presidente di SNBA a elabora riba mas topico di importancia, cu ta aspectonan cu inmediatamente por cambia e economia di San Nicolas. Aki el a referi riba e terenonan di e refineria na San Nicolas. Errol de Freitas aki ta referi na un poliza di energia, incluyendo tur loke por wordo cambia.  Y a enfatiza cu tin di traha riba nan, como cu mundo no ta para! El a bisa cu pais bisiña Venezuela tin 300 biyon bari di crudo disponibel, pero aworaki no tin suficiente man, ni refineria pa sake y proces’e.  Tog e cantidad di crudo cu ta moviendo ta subiendo.  Nan a bula for di 600.000 bari, bay pa 900.000 bari, y awor ya a pasa 1.400.000 bari pa dia. Aruba no ta competidor, pueblo tin cu compronde cu e refineria di Aruba y esun di Corsow no ta competi cu otro, pero nos tin un specialista den nos Hunta Directiva. Nos ta un complementa otro. Pa Aruba, aki ta enfatiza riba e sistema di ‘upgrader’, pues ta tuma e crudo, saca e diluyente (‘nafta’), cu ta wordo manda bek pa Venezuela p’asina nan refinerianan aya por funciona. Mientrastanto tempo ta pasando, y temblornan na Venezuela a haci cos mas dificil, y por imagina cu e pais tin otro prioridadnan cu nan tin cu haci, cu cierto cosnan na Venezuela ta tranca, pero tur cos ta pasa pa un motibo. Pasobra nos na Aruba tambe ta tranca, pero sikiera Venezuela si tin un motibo pa ta tranca... pero Aruba no tin motibo pa ta tranca asina. Tur hende ta papia cu SNBA di e envidia cu nan ta bay desmantela e refineria.  Desmantela kico?  Anto ora di caba desmantela, ta pa pone kico?  Kico e idea ta cu e tereno di refineria?  Bo plan ta algo cu San Nicolas por biba cu ne?  Cu pueblo di Aruba por biba cu ne?  Pero e ta bo plan, pasobra e ta bo plan. Errol de Freitas a agrega, cu e refineria na Aruba tin suficiente tereno pa haci hopi cos.  Si bo kier papia di un Science Park... tin tereno p’e!  Si bo ta papia di un Data Center... tin tereno p’e!  Si kier un Yard Harbor.. tin tereno p’e. Tin dos miyon di m2 riba e tereno cu mester reserva pa actividad di energia y petroleo. Tin e parti maritimo, y tin parti di e tankinan pa warda crudo.  Tin 17 tanki, pero corda e tankinan n’e parti mas pariba, unda por evalua nan condicion, corta nan, y instala nan bek n’e parti zuid p’asina Aruba por yega na 25 te cu 30 tanki pa warda crudo.  Esey riba su mes ta trece ingreso grandi pa Aruba. Aruba tin un Minister di Economia y Finanzas, y un Minister di Energia, y SNBA ta puntrando ta unda e ta?  “Nos tin basta tempo di purba di haya Minister Dowers, kende a mustra su buena fe di lo kier sinta cu nos.  Nos tin Prome Ministro kende a percura nos tin un hende den su oficina cu nos tin contacto direct cu ne, mescos cu Minister di Turismo a haci esey, y igual cu Minister di Salubridad nos tin contacto”, de Freitas a bisa.  “Pero di e Minister di Infrastructura nos no sa nada di dje.

Dialuna ultimo, den oranan di merdia Wardacosta a risibi un melding pa un evacuacion medico riba un barco crucero. Tabata trata di un hende muher di 40 aña di edad abordo cual e agente di e crucero a informa Wardacosta cu lo mester di un helicopter urgente pa transporta e persona pa un hospital p’e por ricibi cuido medico. E Centro Operacional Maritimo di Wardacosta despues di e melding a dirigi e helicopter n’e crucero, cu tabata nabega den awanan di responsabilidat di Wardacosta pa nort di Aruba. E helicopter a bai n’e crucero pa busca e hende muher y hib’e Aeropuerto na Aruba caminda un ambulans tabata para cla pa transport’e pa hospital.