Cu OM ta bisa cu no tin suficiente recherche pa haci investigacion, ta un flie cu no por subi

Manera ta conoci, Minister di Husticia, mr. drs. Arthur Dowers a pidi Corte di Husticia pa duna su opinion riba loke cu Ministerio Publico a laga sa, ora cu Director di Refineria di Aruba, Robert Henriquez a entrega un denuncia serio na Ministerio Publico, demandando pa haci un investigacion profundo riba iregularidadnan cu a keda constata den Refineria di Aruba. Ministerio Publico a laga sa cu nan no por haci e investigacion aki, pa falta di recherche. Un contesta absurdo, na nos opinion. Kier men, horta cuanto placa cu bo kier di un refineria, anto esnan cu a haci nan mes culpable por cana liber manera nada a pasa. Psey nos ta bisa cu e “flie ey no por subi”. Si analisa tur denuncianan haci anteriormente contra Ministernan manera Paul Croes, Benny Sevinger, Glenbert Croes y Otmar Oduber, tabata Recherche Samenwerkings Team a haci e investigacionnan aki, hunto cu Landsrecherche. Kier men, cu por masha bon. Ta pakico a crea RST, djies pa nan bin pasa vakantie? “Si bo kier, bo por”, pero e ta mustra cu aki OM kier sconde y/of cubri pa un of mas di e “grandinan” tras di tur e estafa, ladronicia, etc. Cu tin. Ta pesey tin hende ta pensa cu pesey mester bin cu HOFA, pa controla y vigila gobernantenan, cu no por mira placa, cu nan ta pensa cu mester hort’e. Nos a señala caba, cada kwartaal Ministernan di Husticia di Reino ta reuni, unda ta ofrece tur clase di yudanza y awor esaki no por. N’e ruenionnan aki ta participa Hefenan di Polis, pero tambe PG-nan di cada pais. “A otro perro con ese hueso”, investiga tur denuncia y si esnan investiga ta culpable, anto nan mester sinta riba nan blaar.

Siman pasa diahuebs, pero mas bien awe, nos por bisa cu mayoria skol na Aruba a cuminza cu nan aña escolar 2026-2027. Si analisa loke tin actualmente, por conclui cu e aña escolar nobo aki ta yen di reto. E.o. por constata cu tin falta di masha hopi docente, sigur esnan di vaste pakket (eerste graad). P.e. laga nos tuma loke t’e caso na Colegio Arubano (Playa), unda te ainda no tin un Rector nombra pa tuma rienda di e skol. Un skol asina importante pa nos studiantenan cu kier sigui nan estudi avanza e.o. na Hulanda of Merca. A keda constata caba cu p.e. na EPI, lo cuminza cu 50 studiante menos, pero aki tambe tin falta di docentenan califica den algun vaknan specifico. No por haya docente p.e. na Hulanda, pasobra Hulanda tambe tin problema cu docente. Aki por conclui cu Gobierno no a sa di prepara su propio yiunan di tera. Ta for di tempo cu Rudy Lampe tabata Minister di Educacion, a trece algun cambio den nos sistema educacional, cu awe Aruba ta carga cu e consecuencia, cu no tin suficiente yiu di tera prepara. SKOA kier a cuminsa cu un klas nobo, pero no por pa falta di docente. Tambe e vocero di SKOA a duna di conoce, cu fuera di falta di docente, SKOA ta constata cu tin hopi problema social y tambe hasta mental. No por lubida esakinan tampoco. Mester admiti tambe cu tin docente a muda bai traha na Corsou of na Bonaire, unda sigur e salario y demas beneficionan pa un docente ta mas faborable. Y e yiunan di tera cu tin na Hulanda, no kier bin Aruba, meramente p’esey, esta salario na Aruba no ta igual n’esun di Hulanda. Gobierno di Aruba ta nenga di cubri gastonan di un yiu di tera pa bolbe su pais, pero si ta paga tur cos pa un Hulandes cu kier bin traha na Aruba. Esaki ta un motibo tambe cu un yiu di tera no tin gana mes pa bolbe su pais. Y asina nos por menciona varios ehempel mas. Aunke mester bisa cu e actual Minister di Educacion, Gerlien Croes a drecha e salarionan di tur docente. Minister sra. mr. Gerlien Croes den su deseo expresa p’e aña escolar nobo a duna di conoce cu: “Educacion, ta formando nos futuro generacion” Un aña escolar nobo ta representa un pagina blanco yen di oportunidad, reto y posibilidadnan nobo pa crece, siña y supera tur limite. Lo tin dianan yen di alegria y dianan cu ta exigi mas esfuerso, pero corda cu tur reto ta un oportunidad pa fortalece boso caracter. Cu perseverancia, disciplina y fe den boso mes, no tin ningun meta cu boso no por alcansa. Cada les cu boso siña awe ta un paso mas serca di boso soñonan mañan.

Educacion t’e yabi mas poderoso pa habri e portanan di futuro y sigura e progreso di nos pais. Minister Gerlien Croes como Minister di Educacion a desea henter e comunidad educativo un aña escolar 2026-2027 yena cu sabiduria, salud, perseverancia y hopi exito.

Como cu esnan responsabel no a logra confirma sala grandi di Renaisance Convention Center na tempo, Comision Organisador di Congreso di AVP a hay’e ta cambia e fecha, cu awor lo ta diadomingo dia 4 di october den Marriott Resort Grand Ballroom. Tabata Vie Presidente di AVP, Clifford Heyliger cu a habri e conferencia aki, bisando cu esaki sigur ta un momento cu lo marca e siguiente fase den e proceso di renobacion y fortalece e organisacion despues di e anuncio historico haci recientemente p'e lider di partido, Mike Eman. Durante di e congreso, e miembronan lo trata tres tema principal: E cambionan den e estatutonan di partido, e transicion oficial di liderazgo y e presentacion di un directiva nobo, hunto cu e directivanan di e diferente fundacion cu ta forma parti di e structura di AVP. Segun e dirigencia di partido, e congreso ta representa un paso natural den e proceso di relevo generacional cu a wordo anuncia anteriormente. Cu e proceso aki, AVP ta reafirma cu liderazgo no ta un asunto di un persona, sino di un organisacion cu semper a prepara su lidernan nobo pa sigui sirbi Aruba. Ademas di e decisionnan organisacional, e congreso lo brinda espacio pa dialogo entre e miembronan, presentacion di e mocionnan y votacion riba diferente proposicion cu lo determina e direccion strategico di partido p'e añanan benidero.

E anuncio ta sigui e decision historico di Mike Eman cu lo entrega e liderazgo di AVP durante e Congreso y lo conclui su cargo como Minister-President na 1 di januari 2027. Den e periodo cu ta resta, e lider di partido a expresa su compromiso pa culmina un serie di proyecto importante, entre nan iniciativa pa fortalece e posicion economico di nos pensionadonan, e famianan vulnerabel, e personanan cu limitacion, trabou pa acopla salario minimo n'e bestaansminimum y diferente inversion den educacion y desaroyo di nos comunidad. AVP ta considera cu e transicion aki un muestra cu ta fortalece un partido cu ta pensa mas leu di un generacion y cu ta mantene fiel na su balornan di servicio, responsabilidad, solidaridad y amor pa Aruba. Cu Congreso 2026, AVP ta habri oficialmente un capitulo nobo den su historia, cu un liderazgo renoba, un organisacion mas fuerte y e determinacion pa sigui traha den interes di pueblo di Aruba. E Congreso ta stipula pa cuminsa 9 or di mainta. Manera ta conoci, riba e dia aki, AVP lo tin cu eligi un lider nobo pa guia e partido na un otro nivel. Tabata e propio Mike Eman, kende a propone Wendrick Cecilia como e proximo lider di AVP, maske varios observador ta di opinion cu Cecilia ta hopi hoben ainda pa tuma e timon di partido, y ta haya cu Cecilia mester di mas experiencia. Te cu awe no tin mas candidato cu ta desea di bira lider di AVP.

Manera a ser bisa na nos, cu Wendrick Cecilia no por kere cu bira lider di AVP, ta solamente pa nomber, pero for di awor e mester por demostra loke e tin di haci pa AVP keda un partido na mando. E mester por yama reunionnan di Conseho di Partido, discuti caba su maneho, pero te ainda e no ta haciendo nada di esaki. Wendrick Cecilia mester garantisa di por retene e votonan di p.e. Mike Eman (como 5 mil voto) y no kere cu tur hoben lo ta su tras. Hopi di e 5 mil votonan di Mike Eman, ta conoci como “Emanista” y un hoben lider mester por sa di convence nan, cu e ta un “lider forma pa Mike Eman”, e “yiu politico di Mike Eman” y asina e “Emanistanan” tin confianza den e hoben politico aki. Di otro banda, nos sa cu hopi di e siguidornan di Mike Eman ta poniendo hopi presion pa Mike Eman deshaci di su opinion di retira fin di aña como Prome Minister y p’e sigui e 2 añanan cu falta. Di otro banda, tin algun observador ta di opinion ta mihor cu Mike Eman bai, laga sanger nobo tuma rienda. Pasobra Mike Eman, contrario na su campaña electroral cu mester haci full un doorlichting di e gabinete anterior, ta net e Mike Eman aki no kier retira ningun hende di e partido opositor. Posiblemente dirigentenan nobo di AVP, si lo tin e curashi di haci esey, y si t’asina ta mihor Mike Eman bai cu retiro berdad. Straño di e conferencia di prensa aki tabata, cu prensa no a ser permiti pa haci pregunta, of e periodistanan cu tabata presente, no tin pregunta pa haci.

Ultimo dianan tin un crisis energetico na Corsou, unda ta ser bisa cu como biento a cai, a presenta cu Agua-electra no por produci suficiente coriente pa henter Corsou. Expertonan ta bisa cu esnan responsabel mester ta mas sincero y stop di gaña pueblo di e forma aki. Mientrastanto na Aruba tambe a surgi e pregunta si un situacion manera na Corsou por sosode na Aruba tambe, maske na Aruba no tin e cantidad di molina di biento manera tin na Corsou. Di biahe nos a haya un comunicado, unda Minister encarga cu Energia, mr. drs. Arthur Dowers, a califica finalisacion di expansion di planta RECIP-3 di WEB Aruba N.V. como un paso importante pa fortalece seguridad y confiabilidad di suministro di energia na Aruba. Tabata siman pasa diarazon mainta Minister Dowers tabata presente na ceremonia oficial di entrega di e proyecto, cu a representa un inversion di AWG 115 miyon. Hunto cu directiva di WEB Aruba y representante di Wärtsilä Finland Oy, Minister Dowers tabata un di esnan cu a primi e boton di start cu oficialmente a pone e dos motornan RECIP nobo den operacion. Cu entrada den operacion di e dos motornan, capacidad di produccion di energia via RECIP ta aumenta di 194 MW pa 230 MW, brindando Aruba mas capacidad firme pa responde n’e demanda creciente di energia. Minister Dowers a pone e expansion den contexto di e crecemento cu Aruba ta experimentando y e presion adicional cu esaki ta pone riba suministro di energia. Aumento den actividad economico, turismo y consumo, combina cu periodonan di calor intenso, ta nifica cu demanda di energia ta sigui presenta un reto. P'esey, segun Dowers, Aruba mester tin suficiente capacidad y, mas importante ainda, planifica na tempo pa evita cu crecemento supera e capacidad disponibel. “Nos a duna un paso importante pa garantisa seguridad di energia den nos pais,” Minister mr. drs Arthur Dowers a enfatisa. E mandatario a expresa su aprecio p’e nivel di conocemento y profesionalismo cu tin dentro di WEB, remarcando cu un suministro confiabel no ta algo cu un pais por tuma pa concedi. Na diferente parti di mundo, hasta paisnan cu tin mas recurso y escala, ta enfrenta reto pa satisface nan demanda energetico ora capacidad y planificacion no ta crece na e mesun ritmo. Cu e dos motornan nobo operacional, WEB ta den un posicion mas fuerte pa garantisa suministro mientras cu Aruba ta sigui prepara proyectonan relaciona cu energia renobabel y almacenahe, incluyendo mayor participacion di energia solar y di biento den e mix energetico. Cu activacion oficial di RECIP-3, Aruba ta agrega capacidad nobo na su sistema energetico y, na mes momento, fortalece e base necesario pa un suministro mas confiabel y un futuro energetico mas sostenibel.

Aruba ta manera un Kerstboom, segun Bill Armstrong. Datanan sismologico rond di Aruba a mustra di tin un area rico na gas y petroleo cla pa explora. E ta manera un buraco pa hala rosea di un bayena. Asina Bill Armstrong ta cataloga e area den awanan teritorial di Aruba unda e ta convenci cu ta rico na hidrocarbono. No solamente gas pero tambe petroleo. Armstrong a bisa esaki durante un entrevista cu Hart Energy, media specialisa den industria di energia y petroleo basa na Houston. Bill Armstrong, propietario di Armstrong Oil and Gas/Armstrong International a duna e entrevista den preparacion pa su presentacion como orador principal n’e Hart Energy Super Dug Conference na Houston, cu lo tuma lugar na September proximo. Armstrong Oil & Gas ta un compania independiente di exploracion y produccion. Bill Armstrong mes ta un geologo di profesion y a lanta den e ambiente di exploracion y explotacion di petroleo. Despues di mas di 4 decada desde cu a funda Armstrong Oil & Gas, Armstrong a haya e reputacion di ta un di e exploradornan mas exitoso, unda el a traha un carera dor di explora unda otronan a laga un banda. Amstrong, a bisa cu e dos areanan cu e ta trahando riba dje t’e asina yama North Slope di Alaska y Aruba. Ta for di 2024 cu Armstrong a firma un acuerdo cu Compania Arubano di Petroleo, CAP. E acuerdo di concesion a bin despues cu segun Armstrong, el a logra detecta presencia di un rikesa di hidrocarbono den e mesun area cu Repsol a explora anteriormente. Manera ta conoci, Repsol a pasa tempo ta pone e area panort di Aruba riba mapa y a haci 4 boramento, pero sin exito. E data acumula sinembargo, a bira propiedad di CAP, cu a hinca esakinan den un pakete cu a ofrece na otro interesadonan. Varios a cumpra e pakete cu tabata entre 150 pa 200 mil dollar, un suma considera insignificante den e mundo di petroleo. E arte di haya hidrocarbono ta basa riba interpretacion di data, cu ta crea un imagen di e mundo submarino. E data ta duna un bista riba e perspectiva si por tin fuentenan di petroleo y gas. Repsol berdad a bora, pero no ta tur e lugarnan cu e mapa ta indica cu por tin posibilidad. E uso di Inteligencia Artificial, AI, sinembargo cu a bira mas detaya den ultimo añanan a permiti un interpretacion mas detaya kico por tin bou superficie, esta kico tin, unda tin y den cua cantidad, Bill Armstrong tabata entre e diferente partidonan cu a cumpra e pakete y el a keda convenci cu por explora petroleo. E ta confia den e interpretacion nobo. Consecuentemente Armstrong Oil & Gas, cu na Aruba ta opera bou e nomber Andicuri Oil and Gas Exploration VBA, na 2024 a sera e contrato cu CAP pa un concesion di tres miyon y mey di hectaria. E trabounan cu a sigui despues tabata pa investigacionnan geofisico y geologico. E ta mustra di ta uno no-biogenico, sino mas bien un capa di gas riba un mina di petroleo. Y t’esey Armstrong kier explora. Segun Armstrong, el a haci otro investigacionnan rond Sur America y basa riba e resultadonan, Aruba ta duna e compania e mihor indicacion pa haya gas y posiblemente petroleo. Segun Armstrong, Aruba ta manera un kerstboom. Gobierno via su compania estatal, CAP ta debidamente na altura di tur e informacionnan aki, pero ta mantene un silencio, sin kier comenta y trece e berdad padilanti. Pakico, Gobierno tin cu splica esaki.

Banco Central di Aruba (BCA) a presenta su plan strategico 2026-2030, pronostico y estudio economico mas recien durante su Business Days 2026. E evento a tuma lugar den cuadro di e celebracionnan di e 40 añanan di Banco Central. E Business Days, cu e tema “Liderando cu equidad, ancra den futuro” (Leading with Equity, Anchored in the Future) a tuma lugar dianan 19 y 20 di augustus y tabata dirigi na stakeholder di e sector financiero, Gobierno y organisacion den sector publico. Mr. Thomas Domhoff, kende a asumi e cargo di Presidente di BCA dia prome di juli 2026, a percura p’e discurso di apertura durante tur dos sesion y a introduci su mes formalmente n’e stakeholdernan clave. Melanie Croes, Manager Strategy & Projects, a presenta e plan strategico di BCA pa 2026-2030, titula Ancra den Futuro. E plan ta basa riba e tres pilarnan di Banco Central y ta fiha cuatro punto di prioridad p’e añanan benidero: Digitalisacion, dato, envolvimento cu stakeholder y preparacion pa reto, incluyendo menasa cibernetico y cambio climatico. E prioridadnan aki ta refleha e esfuerso continuo di BCA pa mantene e panorama financiero di Aruba resiliente. Dr. Ryan Marapin, economista na Banco Central, a comparti algun detaye di e publicacion di Economic Outlook di BCA, cual lo keda publica pronto. Su presentacion a cubri e pronosticonan pa resto di 2026 y loke ta bin despues. Por ultimo, Departamento di Research & Economic Policy di Banco Central, a presenta e edicion mas reciente di “Governing from the Future”, cual ta contene shete estudio tocante e retonan economico y di maneho cu ta spera di por afecta Aruba den e siguiente 10 pa 15 añanan. E economistanan Giantcarlo Croes, Elmelynn Croes, Daniella van den Berg y Rynall Kock a tene e presentacionnan aki. E plan strategico 2026-2030 y Governing from the Future, Leading with Equity ta disponibel atraves di www.cbaruba.org.

Siman pasa diahuebs mainta e sospechoso femenino Chania Chante Fernandes Pedra di 25 aña a presenta un biaha mas den Corte sin abogado. Fernandes Pedra a manda via mail, un cantidad di documento pa Huez. Esaki tabata un Regiezitting, unda Huez despues di a scucha reaccion di Fiscal riba e diferente peticionnan, a dicidi cu ta busca abogado di Corsou pa defende Fernandes Pedra, ya cu ningun abogado na Aruba ta disponible. Huez a bolbe rechaza e peticion di Fernandes Pedra p’e bay liber. Huez a bisa cu e kier sa e posecion huridico pa Fernandes Perna, raport Psicologico, raport di computer di e Jeep SUV. Tambe tin mas documentonan cu a bin acerca. Fiscal a presenta e acusacionnan contra Fernandes Pedra cu ta; cu dia 4 Januari 2025, a dal mata e victima Josely Paulina Vasquez Gonzalez di 65 aña y Carlos David Vialez Valerio di 54 aña y sigui core bay. Fiscal a sigui bisa cu Fernandes Pedra ta wordo acusa di tabata core e Jeep SUV sin rijbewijs, core bao influencia, core cu velocidad halto y den un situacion emocional. Fiscal tambe a bisa cu Chania Chante Fernandes Pedra ta wordo acusa di intento di mata di señora Williams y e homber Fernandes Rivas. Huez a puntra Fernandes Pedra con a para cu abogado. Fernandes Pedra a bisa Huez cu un carta a wordo manda Corte via mail cu ta splica tur cos. Huez a puntra ken a traha e carta. Segun Fernandes Pedra, abogado Moszkowicz a yud’e, kende porcierto a ser nenga di por ta den sala di Corte na Aruba. Huez a bisa cu tambe tin email di Fiscal cu ta bisa cu a purba haya asistencia di abogado di Aruba. For di Orden di Abogado por a compronde cu no tin abogado cu lo kier ta dispuesto pero tin dos abogado for di Corsou. Kico t’e motibo cu e abogadonan cu kier a representa Fernandes Pedra, a retira, lagando e acusada sin asistencia huridico. Fiscal a bisa cu Departamento di Asuntonan Social a informa cu no tin informacion pa gastonan di estadia di e abogadonan di Corsou. Fiscal ta haya cu Huez lo mester tuma un decision riba esaki. Huez a mustra cu segun ley, e gastonan di honorario di abogado, estadia lo mester wordo cubri dor di Gobierno di Aruba. Huez a mustra cu e sospechoso ta reclama e forma con el a ordo deteni pa 11 dia na Warda di Polis.  E documentonan traha pa Moszkowicz ta mustra cu e investigacion tecnico riba e Jeep SUV no a keda cla. Mester investiga e comportacion di e peatonnan. Si nan tabata bou influencia di alcohol.  Investiga e daño na e Jeep. Puntra si por usa e investigacion di Hulanda como prueba. A pidi un reconstruccion di e accidente y verificacion di e sucedido. Ta uza argumento cu e no por a mira e peatonnan.  Con por ta sigur si t’e computer di e auto a wordo manda Hulanda y si nada no a wordo haci n’e auto. Y sospechoso ta bisa cu si tin cameranan cu a filma, revisanan.  A haci peticion pa scucha testigonan.  Reclama cu nan a nenga di dun’e tratamento medico tempo e tabata sera na Warda di Polis. Resistencia contra asistencia di un abogado. A bolbe haci peticion atrobe pa lag’e liber cu condicionnan stipula promer cu e investigacionnan ta completamente cla y cu e tin abogado. Fiscal a bisa cu e no ta haya cu por laga Fernandes Pedra liber. El a mustra cu investigacion for di Hulanda ta mustra e comportacion di stuur sumamente peligroso cu a causa morto di dos hende. El a mustra cu p’e delito cu Fernandes Pedra a haci, tin un castigo di 8 aña di prison. Fiscal ta haya cu comunidad lo no gusta cu Fernandes Pedra lo wordo laga liber. El a remarca cu no tin situacionnan personal cu a wordo presenta cu ta mustra cu mester cambia di opinion. Huez a bisa cu ta importante cu Fernandes Pedra haya un abogado. Huez a dicidi cu Fernandes Pedra lo haya dos abogado for di Corsou y lo mester scoge cual e kier. Huez ta haya cu tin motibonan di peso teniendo na cuenta cu e raportnan nobo cu tin awor. Teniendo cuenta cu p’e delito tin castigo di 8 aña di prison y a shock comunidad, no por laga Fernandes Pedra liber awor.  Dia 2 October pa 9’or di mainta lo trata e caso.

Diahuebs atardi a drenta informe di un accidente riba lama. Testigonan a indica cu un tube pa un motibo of otro a bay dal den un catamaran cu consecuencia cu 3 persona a keda herida. Un boto tabata lastra un tube cu varios hende riba dje. E capitan di boto a calcula malo, a kere cu e catamaran tabata para. Esey no tabata e caso. E catamaran tabata moviendo direccion p’e pier. Capitan di e boto a bay ‘swipe’ cu e boto y tube, pero a calcula malo. Esey a pone cu e tube a bay dal den e catamaran y e hendenan a termina herida. Polis a presenta na sitio unda cu hunto cu e trahadornan di hotel a brinda prome auxilio n’e personanan herida. Dos persona tabata keha di dolor motibo pa cual ambulance a presenta y transporta nan cu urgencia pa hospital. Mientras e di tres herido tabata transporta tambe pa hospital den auto di Pelican. Despues di e incidente aki, por a mira reportahe di e incidente aki na Fox, canal 7 na Miami, cu a pasa na Ingles y mesun reportahe aki a pasa na TeleMundo na Miami, unda Marcelo Lorenzo di 24 aña di Hollywood, Florida, a relata con el a logra rescata varios miembro di su propio famia despues cu un paseo riba lama na Aruba a termina den un accidente serio. Marcelo Lorenzo, kende ta traha cu Hollywood Ocean Rescue, tabata di vakantie cu su famia ora dos balsa (tube) hala pa un boto a keda involucra den e accidente. Segun Lorenzo, e capitan a bira e boto liher, causando cu e balsa caminda su tata, tanta y prima tabata a dal contra un boto. Lorenzo a bula den awa inmediatamente. El a haya su tata inconsciente bou di e boto, sak’e for di awa y despues a mira su prima boca abou, tambe inconsciente. El a logra stabilisa su cabes y nek, mientras cu dos empleado di e catamaran a yuda subi’e bordo. Su tanta a resulta cu un braza kibra y varios miembro di famia a termina den hospital. Su tata ainda ta na Aruba, wardando autorizacion medico pa por biaha bek Merca. Marcelo Lorenzo ya a regresa Florida y a bolbe su trabou como lifeguard na Hollywood Beach. Ciudad di Hollywood lo honra e cu un premio pa su accion di salbamento. E no a declara cu e famia lo entama un caso pa daño y perhuicio, pa loke a sosode. Ta di spera cu e compania di watersport tin seguro, de lo contrario e consecuencia por ta fatal.

Recientemente Presidente di Comercio Uni Aruba (CUA), Frans Ponson no a sconde un critica fuerte contra actual Gobierno. Unda e Gobierno aki tin 1 aña y 7 luna na mando y asina mes, tin inversionista tin mesun tanto tempo ta warda riba un permiso. E critica aki tabata mas bien dirigi na Minister di Infrastuctura, Rene (Baba) Herde, kende ta masha contento y no ta laga tende mucho di dje. Minister Herde a bin afo, reconoce e critica aki di CUA, admitiendo cu DOW y DIP ta bao di enorme presion, pero cu den mesun rosea a duna di conoce cu a contrata un compania pa traha riba un reorganisacion completo y hasta unificacion di algun departamento pa mehora sigur e eficiencia cu tanto ta haci falta. Tambe t’asina cu e grupo di inversionista, cu ya a expresa cu nan kier inverti, pero cu ta cansa di tarda riba permiso y otro proceso administrativo. E grupo aki, Oranjestad Investment Group a laga sa cu nan lo bai inverti otro caminda y deshaci di nan plannan na Aruba. Minister di Economia, Geoffrey Wever a reconoce cu e frustracion ta real. Tin casonan cu ta dura demasiado, cu e proceso ta dificil y cu esaki ta crea frustracion. Gobierno ta consciente cu cambio ta necesario. Minister Wever a splica cu Oranjestad Investment Group a acerca Gobierno cu e peticion pa mira Gobierno den su totalidad traha pa revitalisa centro di Oranjestad. Wever a indica cu especialmente DIP y DOW ta bou di presion enorme. Aunke el a reconoce critica contra Minister Rene Herdé, e ta argumenta cu Herdé a hereda dos departamento cu durante hopi aña no a ricibi suficiente atencion. “Minister Herdé a hereda un cartera cu durante hopi aña no a haya e atencion cu e mester. N’e momento aki e ta dunando tanto DIP como DOW e instrumentonan necesario pa nan por haci nan trabou.” Segun Minister Wever, Gobierno ta pone fondo disponibel pa contrata mas personal y adquiri instrumentonan cu mester haci e proceso mas eficiente y mas liher. E inversionistanan cu ya ta expresa frustracion, a haya promesa di mehoracion, no ta suficiente. Gobierno mester tin algo concreto pa evita cu inversionistanan ta perde pasenchi. Minister Geoffrey Wever a señala entre otro na incentivo fiscal introduci for di 1 di januari pa inversion den e dos centro di ciudad. Gobierno tin contacto regular cu inversionistanan y ta sigui motiva nan pa tene confiansa. Na opinion di Minister Herde, el a declara cu modernisa e aparato publico, acelera proceduranan y haci servicio mas accesibel pa ciudadano ta forma parti di e vision cu e ta haciendo. Desde cu el a asumi e ministerio, Rene Herdé a dedica atencion pa conoce e funcionamento di cada departamento y identifica unda tin proceso cu por mehora. Den e trayecto aki a constata diferente obstaculo, proceduranan cu ta tuma demasiado tempo y sistema cu no semper ta logra responde n’e demanda existente y cu e rapides necesario. Modernisacion no ta solamente digitalisa un formulario. E ta revisa con nos ta traha, unda e proceso ta stanca y con nos por brinda ciudadanonan un servicio mas rapido, transparente y eficiente, segun Minister Herdé.

Revitalisacion no por ta solamente algo cu ta wordo haci pa nos comunidad. E mester ta algo cu nos ta construi hunto. Pa hopi aña caba nos ta papia di revitalisacion di San Nicolas. Nos a mira diferente plan, estudio, inversion, proyecto y iniciativa pasa. Sinembargo, apesar di tur e esfuersonan aki, tin un pregunta cu ta sigui bolbe: Dicon San Nicolas ainda no a logra e revitalisacion economico y social duradero cu asina tanto di nos sa cu e districto tin potencial pa logra? Recientemente, e economista sra. Suzette Dumfries a presenta e resultadonan di 5 aña di investigacion durante e Forum on the Future of San Nicolas. Su trabou merece nos atencion, no pasobra e ta presenta otro solucion rapido, sino pasobra prome el a haci un pregunta mas fundamental: Dicon e esfuersonan anterior no a logra e transformacion duradero cu San Nicolas mester? Su investigacion a combina historia di San Nicolas y plannan anterior cu un proceso amplio di dialogo cu comunidad. Durante su investigacion, el a conduci 153 entrevista y combersacion den comunidad cu habitante, empresario, doñonan di propiedad, iglesia, polis, personanan activo den cultura, hoben y adulto mayor y otro personanan conecta cu e districto. Un di e conclusionnan importante cu nos por saca for di e investigacion ta cu e problema di San Nicolas no necesariamente ta falta di plan of idea. Durante añanan, nos a acerca desaroyo di San Nicolas for di diferente direccion: Infrastructura, turismo, desaroyo economico, social, cultura y industrial (refineria). Pero demasiado biaha nan a wordo trata como asunto separa, enbes di wak’e como diferente parti di un solo economia regional. Un acera nobo solamente no ta revitalisa un ciudad. Tampoco un festival, un edificio renoba, un proyecto turistico, un negoshi nobo of un programa di Gobierno no por logra esey su so. Pero revitalisacion sostenibel ta pasa ora desaroyo economico, infrastructura, educacion, skills, desaroyo di propiedad, cultura, seguridad, comercio y inversion cuminsa fortalece otro. Historia di San Nicolas ta yuda nos compronde esaki. Lago no tabata solamente un refineria cu tabata ofrece trabou. El a crea un ecosistema rond di su trahadornan, unda empleo y entrada tabata conecta cu programa di aprendis, desaroyo di carera, creacion di vivienda, cuido di salud, educacion, deporte y recreacion. E salarionan genera p’e refineria tambe tabata sostene e tienda, dunadonan di servicio, doñonan di propiedad y otro actividad economico den henter e districto. Esaki no kiermen cu nos mester recrea e era di Lago. E investigacion mes ta reconoce cu desigualdad, segregacion y dependencia tambe tabata parti di e sistema ey. E les no ta pa recrea pasado, sino pa compronde e les cu passado a siña nos, e importancia di integracion: Conecta hende, oportunidad y inversion, sin bolbe ripiti e exclusionnan di e sistema anterior. Ora Lago a sera na 1985, San Nicolas no a perde solamente un dunador grandi di trabou. Aproximadamente 1.300 empleo directo den refineria y entre 6.000 y 8.000 empleo indirecto a desaparece, mientras desempleo nacional a subi drasticamente. Cu tempo, diferente funcion a wordo reemplaza of absorba den otro caminda. Pero loke nunca a wordo reemplaza completamente tabata e mecanismo cu tabata conecta tereno, propiedad, capital, empleo, habilidad, negoshi y infrastructura den un solo economia regional cu ta funciona. E diferencia aki ta importante ora nos papia di loke mester sigui.

Consul General di Merca, Ramon Negron, a tene su ultimo reunion oficial den su capacidad como Consul General cu Prome Minister Mike Eman. Durante di e reunion aki a repasa e colaboracion estrecho cu tabatin durante di e ultimo añanan y tambe a resalta e desaroyonan actual den region y den nos hemisferio. Durante di e bishita aki tambe Consul General a introduci un functionario nobo di e consulado cu ta Patrick O’Neill kende t’e funcionario Politico y Economico n’e consulado. Minister President Eman a resalta e importancia di e laso cu Merca riba diferente area manera, seguridad, economia, inovacion, pero tambe como partner den promove e bon comun.

E situacion pa famia de Meza ta dificil. Extraoficialmente nos di Den Noticia a haya informacion cu e siman aki, Mike de Meza lo tuma su decision, si lo bira Minister of lo keda como un Parlamentario di AVP, pero uno critico. Mike Eman y Mike de Meza a tuma decision cu lo no duna publicidad riba e negociacionnan cu tin. E situacion ta uno hopi fastioso, cu ta motibo cu Arthur Dowers a bin ta intermedia y a pone lider di AVP, Mike Eman den contacto cu Mike de Meza y asina, sin cu nan a topa otro personalmente, ta papia na telefon. Siguidornan di Mike de Meza ta haya cu lider di AVP no a para duro banda di Mike de Meza, cu excepcion a declara cu e tambe tin hopi dolor loke cu a pasa su amigo de Meza. Mike de Meza a pone algun condicion prome cu e por tuma un decision y e.o. e condicionnan fuerte ta, HOFA tin cu wordo bari for di mesa. Ni maske cu elimina art. 38, unda Raad van State como Raad van Advies a conseha, cu mester bin cambio, unda ningun politico Hulandes no mag di mete den asunto interno di pais Aruba. Ya caba Minister mr. Geoffrey Wever a laga sa cu pa resto di aña lo no tin ningun decision mas riba ley di HOFA. Pero tabata lider di Futuro, Gerlien Croes a laga sa cu HOFA ta un acuerdo di gobernacion y si kier cambio, partidonan di coalision tin cu negocia di nobo, pasobra sin acuerdo di HOFA, n opinion di Gerlien Croes no tin Gobierno. Otro condicion di parti di Mike de Meza ta, cu Gobierno mester tuma accion contra di mr. Louane Gomez-Pieters, Directora di DIMP. P.e. sikiera pone riba non-actief y laga un comision di experto determina si su actuacion tabata na su lugar. Un top-ambtenaar den Corte ta declara na Huez cu Mike de Meza no debe y cu el a cumpl cu su pagonan, pa algun ora despues ta entrega un keho na Ministerio Publico ta manda un carta pa Formadornan, Eman y Croes, cu Mike de Meza ta un sospechoso, cu consecuentemente Mike de Meza no por bira Minister. Hecho aki no mag di ripiti su mes, cu ta motibo cu Mike de Meza kier mira un decision disciplinario wordo tuma contra Directora di DIMP. E dos condicionnan aki di Mike de Meza ta haci dificil p’e bira Minister, pero cu den fin di siman e lo discuti esaki cu su casa atrobe. Pa loke ta su siguidornan, mayoria di nan, cu hasta tin trabao caba den Gobierno, ta kere cu Mike de Meza mester bira Minister, ya cu esaki ta unico forma cu e por yuda San Nicolas. E ta ser considera un di e personanan cu mayoria experiencia pa negocia henter asunto di refineria, pa cual tin un grupo caba interesa. Pesey a dicidi cu e siman aki mester tin claridad. Mike de Meza ta bira Minister of ta keda den Parlamento, pero un Parlamentario di AVP, pero uno critico. Prome cu proximo fin di siman, Aruba lo sa e berdad.