No tin duda, cabez tin cu lora

Despues di a bira conoci cu Mike de Meza a keda absolbi di tur persecucion penal, ta hopi pregunta tin, cu te awor a keda sin contesta. E acuerdo entre Parlamentario Mike de Meza y Ministerio Publico a pone un punto final na un caso cu pa mas cu un aña y mei a tene politica Arubiano ocupa. Mike de Meza lo of a paga Afl. 2.500 como transaccion, sin admiti culpabilidad, mientras cu e obstaculo penal cu tabata afecta su screening ta desaparece. Pero e desenlace aki no solamente ta lanta e pregunta si Departamento di Impuesto of Ministerio Publico a maneha e caso proporcionalmente. Unda dos funcionario publico a haya ta bon pa “secuestra" Mike de Meza pa un aña y mei, cu e consecuencia cu e no por bira Minister, manera tabata deseo di partido AVP. No mester lubida cu den un di e casonan den Corte, unda hasta Huez a puntra Directora di DIMP, mr. Luenne Gomes-Pieters si Mike de Meza tin debe of a comete iregularidad cu su Belasting, e Directora a bisa cu tur cos ta na ordo. Pa un rato despues e mesun Luenne Gomes Pieters a manda un denuncia, cu ta trha for di algun dia caba na PG di Ministerio Publico, pa cual a informa Formador di Gobierno, Mike Eman cu de Meza no ta ministerial, pasobra e ta un sospechoso. P’awe Ministerio Publico, por medio di su Fiscal Mayor nobo, mr. Reinoud den Haan a conclui cu no tin motibo pa persigui Mike de Meza penalmente mas. Consecuentemente esaki nifica cu Mike de Meza ta ministeriable, maske ta wordo bisa cu e tin pasa un screening nobo. Mike de Meza, kende ta masha resenti cu AVP y su lider Mike Eman, kende no a para fuerte banda di dje, a laga sa cu prome di por tuma cualkier posicion tin varios punto pa aclarea. E.o. kier claridad tras di e maneho cu a ser hiba pa mr. Luenne Pieters, kende a gaña un Huez den Corte pa despues a haci un denuncia falso y cu PG di Ministerio Publico no a laga haci un investigacion debido. Directora di DIMP riba su mes a tuma e decision pa haci e denuncia? El a haya aprobacion di su Minister? Cu ta wordo bisa di tabata Geoffrey Wever di partido Futuro. Hasta t’asina cu Geoffrey Wever a consulta abogado Murray di Corsou pa defende DIMP contra di Mike de Meza, pero despues a deshaci di dicho intencion, Mike de Meza ta demanda awor cu cabez tin cu lora. Sigur esun di Luenne Pieters y un of mas di su top funcionarionan den DIMP, pero tambe di PG, mr. Amalin Flanegin, kende tambe a faya den su funcion. Nan a atacha nan propio integridad. Pa loke t’e PG, di acuerdo cu nos informacion, lo baha caba fin di aña, unabes a cumpli cu edad di bai cu pensioen. Pa loke ta trata mr. Luenne Gomez-Pieters, sea e ta entrega su retiro of lo cuminsa cu un proceso pa mande retiro, cuminsando di schors’e for di su funcion. Por a tende comentario di Minister Geoffrey Wever, kende a bisa cu un Inspector di Belasting tin full autoridad di actua riba su mes, sin mester di consulta cu Gobierno. Pero den e caso aki a keda constata cu tin abuso di poder, pa cual sigur Minister Geoffrey Wever mester a of por tuma accion ainda. Tanten no tin claridad di e punto aki, Mike de Meza lo no kier bira Minister. Mester pone un paro na abusonan di poder di e.o. DIMP ta practica, manera den e caso di Mike de Meza. Awe na final, hopi lo puntra nan mes, kende tabatin razon. Mester bin cambio den ley di screening? Aruba por siña for di e caso pa evita cu esaki ta bolbe pasa?

Den su prome contacto cu Prome Minister Mike Eman después di e acuerdo cu Ministerio Publico, Mike de Meza, kende no ta un sospechoso mas y como tal por bira Minister, e Parlamentario a pidi líder di AVP tempo prome cu nan por papia riba su futuro carrera. Durante su conferencia di prensa, Mike de Meza a laga sa cu e no mester bira Minister pa sirbi pueblo y cu e por haci esaki tambe den Parlamento. Mike de Meza por tin razón, pero pueblo di San Nicolas y manera e mes a bisa pueblo di pariba di brug no ta hayando e atención manera mester ta. Siendo Mike de Meza, si el a pasa e screening, e lo ta Minister awe di e.o. di Energia, Infrastructura y mas. El a haya sostén di su hendenan di pariba di brug, ya cu Mike de Meza ta ser mira como e persona cu por trece cambio p.e. pa cu e refineria, creando desaroyonan economico nobo pa pariba di brug. Actualmente mes Mike de Meza, siendo Parlamentario no ta mucho activo den Parlamento. E ta atende reunionnan pa cual e tin interés, ganando su salario sin traha duro mes. Pero na nos opinión Mike de Meza si berdaderamente kier yuda San Nicolas, e tin cu asumi su responsabilidad y bira Minister y wak con por cumpli cu su hendenan di pariba di brug. Cu e tin algún condición ta di comprende y cu nos sigur ta sostene, pasobra Mike de Meza y famia a bira victima di abuso di poder y esaki no mag di ripiti su mes mas. Pero pa bisa cu e no kier carga responsabilidad ministerial, pa traha pa su pueblo, nos no ta comparti. Mientras di banda di fracción di AVP a duna di conoce cu nan a ricibi e noticia cu hopi satisfacción. Pa fracción di AVP, Mike de Meza ta ministeriabel atrobe. Un di e condicionnan sigur ta, kico lo pasa cu Directora di DIMP, kende den Corte ta declara dilanti Huez, cu Mike de Meza no debe belasting, ta cumpli cabalmente cu su responsabilidad, pa un rato despues ta manda un carta di denuncia pa PG, kende a laga Formador sa cu Mike de Meza no ta ministeriable. Sigur algo mester wordo haci, pasobra si e Directora di DIMP a cumpli cu e ley di screening sin mas, pero a bai fuera di su autoridad pa sea tuma venganza contra di Mike de Meza y su famia. Esaki no por y mester tuma accion y trece cambio di ley, pa evita pa tipo di abusonan di poder aki no ripiti su mes. Mike de Meza ta un politico cu experiencia, capacidad y un profundo amor pa nos pais. Su compromiso cu bienestar di henter Aruba y su districto di San Nicolas semper tabata evidente den su trayectoria politico. Fraccion di AVP ta reconoce tambe e dedicacion y profesionalismo di su ekipo legal y di tur esnan cu a sostene Mike durante e proceso aki. Ultimo palabra ta di Mike de Meza mes, después cu tur diferencia keda clarifica, p’e por bira Minister atrobe, manera su pueblo ta desea.

Ex-Presidente di Staten y Parlamentario mr. Edgard Vrolijk, di fraccion di MEP, a duna su reaccion riba e conclusion di e caso penal contra Mike de Meza, expresando cu e proceso aki a laga hopi duda den e manera cu e proceduranan a encamina. Mester tin mas hende tras di e persecusion aki cu sigur ta crea su precedentenan. Ainda e ta recorda cu aña pasa e caso a cuminsa den un forma straño durante screening, caminda a clasifica Mike de Meza como sospechoso. N’e momento ey, MEP a opta pa no hiba palabra y laga e asunto cana su caminda legal. Awor cu Ministerio Publico a haya un Fiscal Mayor nobo, maske un persona conoci den loke ta pasa n’e islanan di Caribe Hulandes, pasobra e tabata traha na St. Maarten, no como Fiscal Mayor, a dicidi di repasa e caso y a conclui cu no tabatin intencion malo (opzet). Despues di un Cita cu Fiscal, e partidonan a conclui cu Mike de Meza tin di paga un transaccion di 2500 florin, e caso penal a sera y de Meza a keda categorisa como ministeriabel. Edgard Vrolijk, kende tabata den contacto estrecho cu e famia, a expresa su alegria y solidaridad, señalando cu e situacion inhusto aki di un aña cu 6 luna a causa hopi rabia y frustracion. El a felicita nan y a mustra alivio p’e claridad cu esaki a trece. Sinembargo, Edgard Vrolijk a cuestiona con a sigui cu e procedemento, criticando cu prensa tabata sa e contenido di e screening prome cu e mes y puntrando ken a autorisa e ambtenaar pa haci e denuncia. Tambe el a menciona e incertidumbre rond di abogado Murray di Corsou. E politico di MEP tambe a conclui cu por papia aki di un persecusion, abuso di poder a ser cometi contra Mike de Meza, cu no mag di sosode mas. Na su opinion, Luanne Pieters no a actua su so. Mester bin cambio di ley pa evita esaki. Finalmente, Edgard Vrolijk a compara e sosten cu Mike de Meza a ricibi cu e sosten cu e mes a haya tempo cu a bah’e como Presidente di Parlamento. Mike de Meza a trece condicionnan pa sigui cu su partido, cu manera ta conoci ta contra di ley di HOFA y e ta contra e desmantelacion di e refineria.

Despues di mira con e team di defensa di Mike de Meza a bin ta bringando e inhusticia cu algun Top-Ambtenaar a haci tur nan posibel pe miembro di AVP aki no por mira Minister, ta surgi e pregunta, con ta para cu e casonan cu OM tin contra algun funcionario di MEP, manera contra di ex-Minister Chris Romero y ex-Minister Glenbert Croes pa no papia mes di casonan pendiente tambe di Edison Briesen, Guilfred Besaril y te hasta tin un denuncia haci na OM contra di Endy Croes, cu no a bin ainda na beurt. Por conclui cu Mike de Meza tabatin un team cu a bay all out pa mustra e persecusion, abuso di poder, e inhusticia cu tabatin contra su persona, te cu e Fiscal Mayor nobo, Reinoud den Haan despues di repasa henter e dossier a conclui cu no tin nada iregular a tuma lugar, a yega na un acuerdo pa cual awe Mike de Meza ta ministeriable atrobe. Si analisa e casonan di Chris Romero, unda Landsrecherche a hacie algun pregunta y no tabatin ningun citacion mas y mesun caso di Glenbert Croes, kende di acuerdo cu nos informacion, no a ni wordo interroga, pero si a pasa y ta pasando den un proceso largo di inhusticia, ta surgi e pregunta, ambos politico di MEP lo wordo absolvi tambe di nan acusacionnan? Parlamento tin trabao pa haci, unda no por laga detene personanan manera den caso di Chris Romero y Glenbert Croes, sin por presenta nan den Corte. Mester tin un limite di tempo y no laga nan den un incertidumbre pa aña largo. No por sigui crea departamentonan cu tanto poder, pasobra a lo largo nan ta cuminsa abusa di esaki. E dos politiconan menciona tin sigur un 2 aña of mas ta biba den incertidrumbre sin sa ki dia nan caso lo bin dilanti.

Un aspecto importante den e maneho economico ta revitalisacion di centro di Oranjestad y San Nicolas. Y asina mes, e.o. e grupo di inversionista den Oranjestad ta cuestiona e burocarcia di Gobierno, cu berdad a firma un MOU, pero cu no a haci nada mas pa pone economia drei den Playa, cu algun di e inversionistanan aki kier hasta retira di e plannan cu nan tin pa cu Playa. Awor di e 242 negoshinan nobo registra entre januari y juni 2026, 12 a establece dentro di e areanan di centro defini conform ROPV: 6 den centro di Oranjestad y 6 den centro di San Nicolas. E negoshinan aki ta inclui actividadnan manera houdstermaatschappij, real estate, establecimento di cuminda, oficina administrativo y otro servicio empresarial. Esaki ta demostra tambe cu e incentivanan fiscal cu a introduci 1 di januari 2026 a cuminsa duna su frutonan, segun Minister Geoffrey Wever. Cu e introduccion di e maneho fiscal aki, Gobierno AVP-FUTURO ta haciendo un intento serio pa crea un clima di inversion cla y transparente p’e centronan historico. Dor di uni Gobierno y sector priva, ta stimula cu e centro di Oranjestad y San Nicolas ta wordo revitalisa y cu e edificionan por wordo usa pa vivienda, restaurant, café, oficina y retail. Bunita idea, pero manera menciona, e grupo di inversionista local, Oranjestad Investment Group (OIG) ta masha disgusta, p.e. cu nan no por haya sikiera un reunion cu Minister di Infrastructura, drs. Rene (Baba) Herde. E maneho ta di acuerdo cu e Programa di Gobernacion AVP-FUTURO 2025–2028 y ta sigui e recomendacionnan di e “Commission Economic Recovery 2023”, un comision cu Minister Wever a institui y lidera pa bin cu incentivanan fiscal consistiendo e tempo ey di KVK, ATIA, AHATA, Freezone, DEZHI, diferente abogado, diferente fiscalista y diferente accountants. E distribucion geografico ta mustra cu actividad empresarial ta tuma luga den henter Aruba. Noord/Tanki Leendert a registra e cantidad mas halto cu 78 establecimiento nobo, sigui pa Oranjestad Oost cu 50, Oranjestad West cu 42, Paradera y Santa Cruz cu 25 cada uno, Savaneta cu 13, San Nicolas Zuid cu 6 y San Nicolas Noord cu 3. Desde october 2022, bou di responsabilidad di Minister Geoffrey Wever, Gobierno a introduci un “vestigingsbeleid” nobo cu ta enfoca riba simplificacion di rekisitonan, digitalisacion di e proceso y reduccion di barera administrativo pa haci negoshi. E linea di maneho aki ta sigui ta importante pa crea un clima unda empresario por move cu mas claridad y unda Gobierno ta facilita actividad economico na un manera controla y structural. Despues di un aña record den 2025, cu 880 permiso pa negoshi nobo, Gobierno ta sigui enfoca riba consolida e condicionnan necesario pa actividad empresarial por desaroya, diversifica y contribui na creacion di oportunidad economico. E prioridad no ta solamente pa procesa permiso, sino pa crea un ambiente empresarial cu ta inspira confianza, facilita inversion y fortalece e base productivo di Aruba. Minister Wever a gradici e team di DEZHI p’e trabou continuo den ehecucion di Vestigingsverordening Bedrijven y pa procesa e diferente peticionnan na un manera profesional, transparente y eficiente. Gobierno lo sigui evalua y mehora e proceso di aplicacion pa permiso, mientras cu e maneho economico ta keda enfoca riba mas actividad economico, mas inversion y un economia mas diversifica y resiliente.

Manera nos di Den Noticia a publica ampliamente un denuncia haci p’e actual Director di Refineria di Aruba, Robert Henriquez, unda a constata varios iregularidad cometi, Ministerio Publico a laga sa di no por haci ningun clase di investigacion pa falta di Recherche. Hasta lo a recomenda pa RDA cuminsa un caso civil. Minister di Husticia, drs. Mr. Arthur Dowers, no por a acepta e argumento aki y a confirma cu Gobierno di Aruba a presenta un denuncia formal relaciona cu indicacion di posibel iregularidad na RDA na Corte Superior. Segun Minister Dowers, despues cu a ricibi informacion tocante e indicacionnan aki, Gobierno a sigui e proceduranan legal y a presenta e denuncia na Ministerio Publico pa evaluacion. Minister Dowers a splica cu Ministerio Publico posteriormente a comunica cu e denuncia no lo sigui procedura di investigacion, indicando cu limitacion di capacidad operacional como motibo p’e decision. "E ta un decision cu ta pertenece exclusivamente na Ministerio Publico," Minister Dowers a expresa. El a indica cu, conforme e mecanismonan legal cu tin disponibel, e persona of instancia cu presenta e denuncia tin e derecho di recuri na Huez y solicita cu un investigacion tuma lugar. Segun Dowers, precisamente esey tabata e siguiente paso cu Gobierno a tuma. "Awor nos ta spera riba e decision di Huez tocante e peticion pa instrui Ministerio Publico pa sigui cu e investigacion." Minister Dowers a expresa cu lamentablemente, cu limitacion di personal por resulta den un investigacion no sigui dilanti, resaltando cu e ta importante p’e proceso legal sigui su curso pa por trece claridad den e asunto. El a conclui cu Gobierno ta respeta independencia di e instancianan hudicial, mientras cu ta spera e pronunciamento di Huez.

Despues di critica di parti di Oranjestad Investment Group (OIG), Gobierno a anuncia un destaho publico pa duna un bida nobo n’e edificio historico unda antes tabata e pompstation di Lagoen, den bario di Klip na Playa. E proyecto ta forma parti di e vision mas amplio di Gobierno pa revitalisa centro di Oranjestad, combina actividad economico cu preservacion di patrimonio y fortalece e sentido di identidad y pertenencia den comunidad. Prome Minister mr. Mike Eman, hunto cu Ministernan mr. Geoffrey Wever y drs. Rene Herde, a duna e anuncio dilanti di e edificio, cu actualmente ta den estado di deterioro, pero cu pa Gobierno, tin un potencial grandi pa bira un punto atractivo y caracteristico den centro di ciudad. Prome Minister Eman a expresa su satisfaccion cu e proyecto ta yega n’e siguiente fase y a destaca cu revitalisacion di Oranjestad no ta trata solamente di infrastructura of actividad comercial. E monumento y edificionan historico tin un funcion importante den conserva e memoria di Aruba y den fortalece e conexion di comunidad cu su propio historia. “E desaroyo comercial, pero tambe e desaroyo di duna nos un sentido di identidad, duna nos un sentido di pertenencia, ta sumamente importante,” Prome Minister Eman a bisa. E ex-pompstation di Lagoen tin un significado personal tambe pa Prome Minister Eman, kende a crece den e area di Klip. Durante su declaracion, el a recorda con e edificio tabata forma parti di bida diario di hopi famia di e bario y con e lugar ta carga memoria di diferente generacion. El a indica cu rescata e edificio no solamente lo crea un oportunidad economico nobo, sino tambe lo conserva un punto di referencia p’e comunidad. Minister Geoffrey Wever a splica cu e proyecto ta resultado di varios aña di preparacion y ta forma parti di e trabou cu a cuminsa pa revitalisa centro di Oranjestad. El a indica cu e proceso lo ta habri y transparente, cu condicionnan claramente defini y evaluacion dor di un comision independiente cu representacion di, entre otro, ATA, ATIA, Ministerio di Infrastructura, Ministerio di Economia y DIP. Prome Minister Eman a elogia e esfuerso di Minister Wever, kende ya den un Gobierno anterior a inicia diferente proyecto relaciona cu renobacion di centro di ciudad. El a destaca tambe e contribucion di Minister Rene Herde y e departamentonan bou di su responsabilidad pa crea e condicionnan infrastructural y legal necesario pa por realisa e proyecto. Prome Minister Eman a remarca cu e renobacion di e ex-pompstation den un cuadro mas amplio di e proyectonan cu actualmente ta transforma centro di Oranjestad. El a menciona, e.o., e renobacion di e brug banda di Wilhelminapark, expansion di Parlamento di Aruba, restauracion di Fort Zoutman y Willem III Toren, futuro desaroyo di e edificio unda ante tabata Ministerio Publico, y e siguiente fase di renobacion di Wilhelminastraat. El a destaca tambe e contribucion di iniciativa priva, incluyendo restauracion di e monumentonan y otro proyecto den centro di ciudad. Tur esaki hunto ta mustra cu Oranjestad poco-poco ta recupera un bida nobo. E meta ta crea un centro di ciudad caminda tin actividad economico y comercial, pero caminda pueblo Arubiano tambe por reconoce su historia, su cultura y su identidad.

Recientemente Parlamentario Jennifer Arends-Reyes, Presidente di Comision di Turismo di Parlamento, a participa hunto cu Minister di Turismo Wendrick Cicilia na un encuentro na Alto Vista Winery, den cuadro di e iniciativa ‘Compost Alliance.’ Compost Alliance ta un proyecto di Iberostar cu ta reuni diferente hotel y partner, e.o. Aruba Airport Authority (AAA), pa transforma resto di cuminda y otro desperdicio organico den compost. Di e manera aki, material cu, normalmente lo wordo benta afo, ta haya un segundo bida como un recurso util pa agricultura, naturalesa y mantencion di areanan berde. E iniciativa ta un ehempel concreto di economia circular: Enbes di mira desperdicio como algo sin balor, e ta wordo procesa y converti den un producto cu por beneficia Aruba atrobe. “E iniciativa aki ta mustra cu mediante cooperacion y creatividad, loke normalmente nos ta mira como desperdicio, por bira un recurso valioso cu ta beneficia henter nos isla. Esaki ta sostenibilidad den practica,” Arends-Reyes a declara. Segun e parlamentario, Aruba mester sigui stimula proyectonan cu ta promove menos desperdicio, mas re-utilisacion di recurso y un industria turistico cu ta contribui activamente na sostenibilidad. Como isla turistico, diariamente nos ta produci un cantidad considerabel di desperdicio. P’esey, sector publico y priva mester uni forza pa busca solucionnan inovativo cu ta contribui na un medio ambiente mas limpi y saludabel. “Nos industria turistico ta un motor importante di nos economia, pero e por bira tambe un motor di cambio positivo. Iniciativanan manera Compost Alliance ta demostra cu crecemento economico y cuido di nos medio ambiente por bay man den man,” e parlamentario a expresa. Jennifer Arends-Reyes a gradici General Manager di JOIA by Iberostar, sr. Arnaud Le Lanchon, y ing. Jareth Vermeulen, Destination Steward Manager, p’e invitacion, e informacion comparti y nan caluroso acogida. “Mi ta kere den proyectonan cu ta uni hende y sectornan pa crea algo positivo pa Aruba. Paso pa paso, nos por reduci desperdicio, cuida nos naturalesa y construi un futuro mas sostenibel pa nos isla,” Arends-Reyes a finalisa.

Stichting Parkietenbos ta mira cu preocupacion e reciente Dia Nacional di Limpiesa, organisa bou di e slogan "Cuida Aruba". Proximamente lo tin un di dos edicion, pero Stichting Parkietenbos ta mustra cu Cuida Aruba mester cuminsa pa cuida pueblo mes. Mira e situacion actual rond di Parkietenbos cu no conoce un alivio ainda. Tur iniciativa pa promove un Aruba limpi ta digno di apoya. Sinembargo, nos no por laga pasa e contradiccion cu ta existi entre e mensahe cu ta wordo manda na comunidad y e realidad cu miles di habitantenan ta confronta tur dia. Stichting Parkietenbos a manda diferente carta na Gobierno di Aruba, incluyendo esun actual, advirtiendo cu e manera cu desperdicio ta wordo maneha na Barcadera y e deramento di desperdicio na Ser'i Teishi ta causa un problema serio pa salud publico, especialmente di e barionan cerca. E acumulacion y procesamento di desperdicio, hunto cu e deramento di sushi na Ser'i Teishi, ta causa un holor insoportabel cu ta afecta directamente e barionan di Mahuma, Parkietenbos, Simeon Antonio, Buena Vista y otro partinan di e comunidad den e area. Miles di habitantenan ta sufri regularmente di aire contamina, holor malo, musca y un deterioro di nan calidad di bida. Cuida Aruba no por limita su mes solamente na haci limpi den mondi of beachnan, mientras cu na mes momento e maneho di desperdicio ta sigui crea contaminacion di aire cu ta afecta comunidad di barionan den cercania cu tabata tey prome cu a dicidi di bay procesa y dera sushi na Barcadera y Ser’i Teishi. Stichting Parkietenbos ta haci un yamada na Gobierno pa pone e mesun compromiso cu ta mustra den campaña di limpiesa tambe den proteccion di salud y bienestar di e habitantenan. Cuida Aruba ta nifica tambe cuida e aire cu nos ta hala rosea di dje. Nos ta pidi Gobierno pa: Stop e deramento di desperdicio na Ser'i Teishi y tuma medida concreto pa elimina e problema di holor, contaminacion di aire y molester cu e maneho actual di desperdicio ta causa. Y finalmente ta pidi pa envolucra e fundacion di habitantenan afecta di Stichting Parkietenbos den tur decision importante tocante e futuro di maneho di desperdicio na Aruba. E habitantenan di Mahuma, Parkietenbos, Simeon Antonio, Buena Vista y e otro barionan afecta no ta pidi un trato special. Nan ta pidi un derecho igual y fundamental, pa por biba den un ambiente sano y hala rosea di aire limpi, mescos cu tur otro ciudadano di Aruba. Cuida Aruba no ta solamente limpia e isla. Cuida Aruba ta proteha su pueblo tambe.

Gobierno ta bolbe reuni comunidad, sector priva y diferente institucion den un esfuerso nacional durante dos dia cu un solo obhetivo: Cuida Aruba. Dianan 28 y 29 di augustus, e di dos edicion di e iniciativa lo converti limpiesa, boluntariado y preparacion p’e temporada di awasero den un accion coordina na nivel nacional, cu Gobierno ta considera un paso importante den construccion di un Aruba mas resiliente, mas saludabel y mihor prepara pa cualkier eventualidad. Durante conferencia di prensa na Centro di Maneho di Operacion (CMO), Prome Minister Mike Eman a enfatisa cu e exito di e prome edicion a confirma cu ora Gobierno, sector priva y comunidad uni nan forsa, Aruba por logra resultado concreto cu ta beneficia henter sociedad. “Cuida Aruba a demostra cu nos pueblo ta dispuesto pa uni forsa pa cuida nos isla. E di dos edicion ta amplia e esfuerso ey y ta invita henter pueblo, organisacion y empresa pa forma parti di un movimiento nacional di responsabilidad comparti,” Prome Minister a declara. Segun Mike Eman, Cuida Aruba a evoluciona mas aya di un accion di limpiesa. E iniciativa ta forma parti di un vision mas amplio di Gobierno pa fortalece participacion comunitario, crea mas conciencia riba cuido di espacio publico y prepara Aruba p’e retonan cu e temporada di yobida y tormenta ta trese. “Cada iniciativa cu contribui na un Aruba mas limpi ta un aporte valioso. Sea cu ta limpia un cancha deportivo, un centro comunitario, un scol of un otro espacio publico, loke ta importante ta cu nos traha hunto. Cuida Aruba ta di tur hende,” el a añadi. Un di e principal motibonan pa organisa e segunda edicion den e periodo aki ta preparacion di Aruba p’e temporada di awasero. Segun Prome Minister, haci riol, canalnan y area publico limpi ta yuda reduci e riesgo di inundacion, mientras cu eliminacion di desperdicio cu por retene awa ta contribui directamente na prevencion di dengue y otro riesgo pa salud publico. Coordinador di e iniciativa, Rino Hermans di CMO, a splica cu e programa di e di dos edicion a wordo adapta basa riba e experiencia di e prome accion nacional. Entre e mehoracion cu a implementa tin un expansion di e capacidad logistico, un mihor distribucion di puntanan di deposito y un coordinacion mas eficiente pa transporte y procesamento di desperdicio. Director di CEDE Aruba, Daniel Tecklenborg, a destaca cu boluntariado ta sigui e curason di Cuida Aruba. Segun Daniel, e prome dia, diabierna 28 di augustus, lo enfoca principalmente riba accionnan di boluntariado, cu participacion di empresa, hotel, scolnan, scouting, organisacionnan social y grupo di hubentud, mientras cu diasabra 29 di augustus lo brinda comunidad e oportunidad pa haci nan cas, bario y entorno limpi y haci uzo di e puntanan di coleccion habilita p’e fin di siman. Gobierno a recorda tambe cu e Centro di Desperdicio ta habri durante henter siman y a invita comunidad pa sigui haci uzo responsabel di e facilidadnan disponibel, no solamente durante Cuida Aruba, sino como parti di un compromiso permanente cu cuido di nos isla. Na conclusion di su mensahe, Prome Minister Mike Eman a enfatisa cu Cuida Aruba no ta solamente un evento anual, sino un movimento nacional cu ta fortalece e sentido di responsabilidad comparti den comunidad.

Recientemente, Minister di Husticia, mr. drs. Arthur Dowers, responsabel p’e maneho di admision di stranhero, a ricibi e raport cu resultado di e investigacion haci den edificio di DIMAS, despues di e situacion cu a presenta algun siman pasa relaciona cu holor y posibel presencia di schimmel. E investigacion a inicia despues cu varios empleado a bira malo riba mesun dia durante oranan di trabao despues cu a haya un holor fuerte di gas. Mirando e seriedad di e situacion y pa garantisa bienestar y seguridad tanto di empleadonan como clientenan di DIMAS, autoridad a dicidi pa evacua e edificio inmediatamente, pendiente un investigacion mas amplio. Durante e dianan cu a sigui, Departamento di Salud Publico y e compania PURE Indoor Air Quality Solutions, a realisa diferente test y inspeccion den tur piso di e edificio. E.o., a tuma muestra pa determina posibel presencia di schimmel, a midi calidad di aire y a haci inspeccion tecnico di e sistema central di airco. E raport entrega na Minister Dowers ta indica cu e resultadonan di e investigacion ta cay denter di normanan normal. Esaki ta nifica cu, basa riba e resultadonan, no tin indicacion cu ta existi un situacion cu ta representa un riesgo p’e empleadonan cu ta traha den e edificio ni p’e clientenan cu ta bishita DIMAS. Minister Dowers a indica cu e resultado ta importante pa por duna tanto personal como publico e trankilidad necesario. Na mes momento, e mandatario a enfatisa cu e recomendacionnan inclui den e raport lo haya e atencion necesario. E raport ta inclui algun recomendacion pa mehora ventilacion y circulacion di aire den e edificio. Minister Dowers a indica cu esakinan mester atencion, specialmente mirando cu varios edificio di Gobierno tin sistemanan cu ya tin varios aña den uzo y cu gradualmente mester modernisa pa sistemanan mas moderno y eficiente.

Minister di Husticia mr. drs. Arthur Dowers a reafirma cu Gobierno ta sigui comprometi cu re-establece ordo den e maneho di e-step na Aruba y cu e posicion oficial no a cambia: E-step no ta permiti den trafico/via publico conforme cu e legislacion vigente. Segun Minister Dowers, e situacion actual ta resultado di añanan den cual, segun su criterio, no tabatin suficiente control ni accion pa laga cumpli cu e ley. El a indica cu e Gobierno actual a hereda un situacion unda actividad cu no tabatin e autorisacion legal necesario a sigui opera, creando incertidumbre tanto pa empresario como pa usuario. "E responsabilidad di un Gobierno ta pa haci cumpli cu ley y re-establece ordo, aunke esaki por nifica cu mester tuma decisionnan dificil," el a expresa. Segun e Minister, nunca a otorga un permiso/precario, concesion of autorisacion pa opera un servicio comercial di e-stepnan riba camindanan publico. El a enfatisa cu e hecho cu un actividad a tuma lugar durante un periodo, no ta crea automaticamente un derecho pa sigui opera contra e disposicionnan legal vigente. Minister Dowers a reconoce cu e proceso pa re-establece e situacion conforme ley no semper ta facil y cu diferente procedura hudicial ta actualmente andando. No obstante, el a expresa confiansa cu e trayecto legal lo brinda e claridad necesario y permiti Gobierno sigui cu su responsabilidad di haci cumpli cu ley. E Minister a reafirma cu e decision original pa prohibi e-stepnan tabata basa riba recomendacion di Comision Seguridad den Trafico, riba preocupacionnan serio di seguridad vial y riba e realidad cu Aruba su infrastructura no ta adapta p’e tipo di vehiculonan aki. "Nos no por warda te ora cu tin mas accidente grave pa actua. Nos responsabilidad ta proteha bida humano, re-establece ordo den trafico y haci respeta e ley," Minister Dowers a conclui.