Ayera mainta Congreso AVP 2026 a inicia cu presencia di miembro, activista, dirigente y invitadonan di partido, e.o. for di Bonaire y Corsou. E programa a habri cu palabra di apertura di Erin Croes y Tarrick Ras, sigui pa Humphrey Obispa cu Himno Nacional Aruba Dushi Tera. Rachel Eman y Maria Ridderstap a haci lectura di e Credo di AVP, mientras Pastoor Pablo Miranda a brinda oracion y bendicion.

Despues di palabra di bonbini, e programa a continua cu presentacion di cambionan di e statutonan di AVP na cargo di Maria van der Biezen, y invocacion y guia spiritual di Pastoor Jairo Maduro. Durante e mainta, Congreso a continua cu diferente presentacion, homenahe y intervencion, culminando cu e traspaso formal di liderazgo di Mike Eman na Wendrick Cicilia. Ballroom di Marriott tabata yen di hende, te cu nos a compronde cu pa seguridad mester a evita mas hende pa drenta. Demostrando interes grandi pe Congreso 2026.

Practicamente tur miembro di Parlamento a hiba palabra confirmando nan sosten ne lider nobo di AVP, Wendrick Cecilia, maske tabatin un encuesta cu ta bisa cu hopi ta considera Cecilia mucho jong pa bira lider di AVP. Awor e momento a yega pa rehubenece e partido, awor cu Mike Eman a cumpli 25 anja como lider di AVP. Sala a acepta su nomicacion y awor Wendrick Cecilia tin cu demostra pakico el a gana e confianza pa bira lider di AVP.

Pedro "Eddie" Croes, ex Minister di Husticia, ex Presidente di AVP a describi e Era di Relevo hopi bon. P'esey, ora Eddie Croes papia di Congreso AVP 2026, Era di Relevo, e ta hacie for di perspectiva di un persona cu ya a presencia mas cu un cambio di generacion. Pa Eddie, e titulo Era di Relevo ta cuadra cu e momento. "Mundo ta cambia. Cos ta cambia pafo y partido tambe ta cambia." E cambio ey, segun e, ta necesario, pero relevo no ta nifica pone pasado un banda y cuminsa di cero.

Ora Eddie mira bek, e ta conecta trayectoria di AVP cu diferente momento importante den desaroyo di Aruba. E ta recorda e lucha pa mas autonomia, e proceso cu eventualmente a conduci na Status Aparte y e responsabilidad cu a bin despues pa Aruba sigui determina su propio direccion como pais. E siguiente generacion mester tuma over. Un generacion a traha. Otro a sigui construi. Awor un generacion nobo ta prepara pa tuma e responsabilidad y sigui e caminda.

Diasabra anochi pa diadomingo, algo pasa di mey anochi a sosode un accidente grave cu a resulta tambe den uno fatal. E hoben Noah Hietbrink di 17 aña tabata riba brommer y na altura di Westpunt a baha caminda bay dal den e barancanan cant’i caminda. E accidente tabata asina grave cu na yegada di e paramediconan no por a haci nada mas p’e victima. Dokter a constata morto. Mesora a cuminsa cu un investigacion n’e sitio. Famianan a presenta n’e sitio di e accidente un rato algo despues c’un persona a yama pa avisa nan. Slachtofferhulp a atende cu mama di e victima. Presente n’e sitio tabata t’ey tambe Alto Comisario di Polis, drs. Ramon Arnhem kende a atende cu e mama y bay cu e mama p’e mira e yiu sin bida despues cu el a accidenta. Asina pues Aruba ta conoce su di 11 morto den trafico pa 2026. Nos di parti di Den Noticia ta manda nos mas sincero condolencia na famia di e hoben Noah Hietbrink cu e morto tragico aki. (Nota di red: foto ta di cortesia 24Ora.com).

0 Post anterior

Ta bai haci como un anja caba cu un grupo di inversionista local, conoci como Oranjestad Investment Group a presenta nan mes e.o. na Gobierno pa splica nan plannan pa loke ta revalitacion di Oranjestad. Hopi bunita plan, sin di pidi garantia di Gobierno, pero a demanda pa evita burocracia pa haya e permisonan necesario. Te awe tur cos a keda na palabra bunita so y nada mas. E grupo aki a laga sa publicamente cu nan no tin confianza mas di Gobierno, cu na su turno tambe ta sigui cu su plannan, e.o. kier sigui revalitiza Wilheminastraat, te cu a firma un MOU atrobe, pero nada mas ta tuma lugar. E grupo di inversionista aki a laga cu nan lo no por sigui cu nan inversionnan y lo cancela tur nan plannan. Di otro banda tin algun inversionista tambe local, cu a inverti caba den renobacion di edificio banda di John G. Emanstraat, pero ta wardando pa algun tempo caba pa permiso di e.o. pa por opera nan negoshi. Nada, pero nan tambe ta wardando riba Gobierno y a laga Gobierno sa cu Wilhelminastraat so no ta Oranjestad, unda Gobierno kier concreta tur nan proyectonan, cu tampoco ta move pdilanti. Recientemente Presidente di Comerciantenan Uni (CUA), Frans Ponson a bisa bon cla cu Gobierno aki ta sostene negoshinan ilegal, cu por haci tur cos sin ningun clase di permiso y esnan cu si kier cumpli cu ley, mester warda un siglo. Ta keda demostra cu Gobierno di AVP-Futuro tin falta di hombernan cu bala, pa tuma decision y stop cu tur burocracia. Ta parce su t’e ambtenaarnan tin mas poder cu e mandatarionan mes. Gobierno a cambia, pero nada mas a cambia. Pueblo en general ta harta. Mester trece bida bek den Oranjestad y p’esaki e.o. tin un demanda grandi pa vivienda. Recientemente FCCA a laga sa cu como 2000 hende a aplica p’e plannan di FCCA, consstrui cas, bao di e slogan cu Yabi den bo Man. Den centro di Oranjestad tin un cantidad di edificio bashi, cu por converti den vivienda. Parlamento, cambia e leynan pa haci esaki posibel.   Tin varios parlamentario a cuminza expresa nan preocupacion y a cuminza cuestiona, dicon e inversionistanan local, cu ta sigui proceso legal ta keda tranca, mientras nan capital ta para. Segun Pieters di PPA, algun ya ta considera inverti nan placa den otro pais. E consecuencia, Pieters ta haya ta bira peligroso. Si te ROPV t’e problema, cambie anto. Loke falta ta curashi pa tuma decision, loke e Gobierno aki ta carece didje. Falta di lider.  E problema aki no ta di Oranjestad so, San Nicolas tambe ta den mesun boto. Aruba no tin solamente problema di edificio den decadencia. E problema mas grandi ta ora inversionista ta cla pa construi futuro, Gobierno no ta cla pa dicidi.

E prome accidente fatal di aña 2025 a tuma lugar di 4 pa 5 di januari. Y te ainda e tratamento profundo di e caso penal contra e chofer responsabel Chania Fernandes Pedra no a tuma lugar. Cada bes ta surgi algo cu e parti di defensa. E tabatin tres abogado local, pero pa diferencia di opinion cu loke famia kier, e abogadonan a desisti. Despues a busca Yeduri Moszlowicz di Hulanda, pero e no por a bira abogado di e acusado, pasobra e no ta registra n Caribe Hulandes. Nan a insisti riba e abogado aki, pero tog no a logra.

Despues cu no a logra nada local, diabierna mainta e caso mester a sigui cu un abogado di Corsou. Pero e acusado a nenga, pasobra niun momento a consulta cu ne si e ta acepta e abogado cu finalmente a logra haya pa tuma e caso. Y e abogado aki, segun por a scucha, no t’esnan cu inicialmente Ordo di Abogado a bisa cu ta dispuesto pa tuma e caso. A logra haya un abogado net un dia prome cu e huicio mester a sigui. E propio acusado no a haya e oportunidad pa papia cu ne. Tabata den Corte cu el a mira kende e abogado aki via di un video call. Elx a bisacu e no por acepta e abogado apunta, pasobra e no tin e confiaxnsa cune. Ta parce manera cu simplemente a pusha e caso den un abogado cu nan ta sinti cu tin suficiente experencia y a acepta tambe. Pero esaki no a convence e acusado, kende a bisa cu e no kier e abogado. El a priminti cu lo haci tur su esfuerso pa haya uno cu e ta confia den dje y cu lo hiba e caso manera cu e kier. Tambe e acusada a pidi via di abogado Braam Moszkowicz, cu no t’esun cu el a presenta cu ne den Corte inicialmente, pa pospone tratamento di e caso p’e yega na un abogado y pa pospone su detencion. Di e forma aki e mes por sondea kende lo por represente den e caso aki. Pero pa di tantisimo biaha, Corte no a bay di acuerdo bou di e mesun argumentonan: E caso aki ta uno demasiado serio cu a shock comunidad y cu tin un castigo pisa cu ta colga riba su cabez.

Huez a bise cu e mester keda den KIA y cu e lo dune chens pa busca otro abogado p’e caso por sigui dia 4 di november awor den oranan di atardi.

Tabata ainda prome cu final di Gabinete MEP-Raiz, cu Departamento di Recurso Humano a dicidi di cuminsa cu un investigacion riba e forma di proceder di Directora di Cas di Aruba. Dicho investigacion no a sigui mas, pero tabata Gobierno AVP-Futuro a dicidi pa suspende Joselin Croes, kende no tabata presenta na trabao mes, te ora cu DRH keda cla cu su investigacion. Tin hopi cos cu Joselin Croes a bin ta haci, sin a haya autorisacion di Gobierno. Mirando e tempo ta pasando, Joselin Croes a dicidi di entama un caso contra su suspension y recientemente Corte di Prome Instancia di Aruba a declara e decision di 17 di maart 2026 pa suspende Joselin S. Croes como directora di Gabinete di Ministro Plenipotenciario di Aruba na Hulanda, conoci como Arubahuis, nulo. Den su sentencia di 21 di september ultimo, Corte a conclui cu e decision no a wordo prepara suficiente y cu Gobierno no a motiva concretamente pakico e suspension tabata necesario. Joselin Croes a wordo nombra directora te 1 di december 2028. Gobierno a suspende entrante di 18 di maart 2026, pendiente un decision tocante un posible sancion disciplinario. E medida a sigui despues cu na december 2025 nan a prohibie entrada na Arubahuis den cuadro di un investigacion interno. Di acuerdo un investigacion preliminar di Departamento Recurso Humano a trece dilanti señalnan tocante, entre otro, maneho financiero, funcionamiento di e organisacion, asunto di personal y maneho di documento. Segun Huez, considerando e posicion prominente cu e tin, Gobierno mester a tende su version prome di suspende. Corte a indica tambe cu e splicacion di Gobierno riba e supuesto faltanan tabata insuficiente y cu investigacion di e hechonan tabata demasiado unilateral pa sostene e conclusion cu tabatin un sospecha concreto di falta grave. Ademas, segun e sentencia, durante e periodo di suspension no a tuma lugar mas investigacion di e hechonan. Gobierno tampoco a demostra un necesidad actual pa mantene e suspension, specialmente considerando cu Joselin Croes ya no tabata ehecutando su funcion desde anteriormente. Corte a declara e decision di suspension nulo y a ordena Gobierno paga Afl. 2.100 na gastonan procesal. E peticion separa di Joselin Croes pa un medida provisional a wordo rechasa, pasobra, cu e anulacion di e suspension, e medida provisional ya no tabata necesario. E sentencia ta trata legalidad di e decision di suspension. E no ta un decision final riba si Joselin Croes a comete e faltanan disciplinario cu Gobierno ta atribui na dje. Abogado p’e ex-Directora di Cas di Aruba tabata abogado mr.Ronny Wix.  Ambos partido por apela e decision riba e bezwaar. Como cu e funcion di Director di Cas di Aruba te ainda ta vacante, no ta exclui cu mr. Joselin Croes lo por bolbe su dicho funcion. Maske na Cas di Aruba, ta prefera p’e no bolbe mas, mirando e trato cu nan a haya di e senjora aki.

Dianan 17 y 18 di november 2026, Gobiernonan di Aruba, Corsou, Hulanda y Sint Maarten lo reuni na Sint Maarten p’e prome "Kingdom Summit". E Kingdom Summit ta un reunion gubernamental di nivel halto entre e Gobiernonan di e paisnan autonomo di Reino. E Summit ta dedica na fortifica e cooperacion entre e 4 paisnan di Reino. Durante e Kingdom Summit cada pais ta tene su propio "State of the Nation". Den e presentacionnan aki, e Prome Ministernan lo refleha riba e exito y e retonan di nan respectivo paisnan y lo pone enfasis riba e areanan di maneho riba cual cooperacion nobo of mas estrecho ta posibel. Cooperacion ta esencial pa un Reino cu ta resiliente y cla pa futuro. Respet mutuo pa otro su posicion, e conexion mutuo y e boluntad pa yuda otro, ta pilarnan importante bou di e cooperacion ey. E Kingdom Summit aki ta duna e oportunidad pa fortifica y profundisa e lasonan entre e Gobiernonan. Ademas, e 4 paisnan ta pa mas continuidad y coherencia den e consultanan periodico entre e Gobiernonan. Minister Presidente di Sint Maarten, Dr. Luc Mercelina: "Sint Maarten ta mira cu anticipacion pa ricibi Gobiernonan di Aruba, Corsou y Hulanda p’e prome Kingdom Summit aki. Dor di traha hunto y na mes momento tene cuenta cu nos diferencianan, nos ta construi riba un Reino mas fuerte y cu ta cla pa futuro".

Siman pasa mester a tuma lugar un encuentro parlamentario, den un asina yama vragenuurtje,, pidi pa John Hart di AVP pa haci preguntanan necesario na 3 Minister, relaciona cu delincuencia hubenil, cu ta un preocupación pa nos comunidad. Pero for di inicio di e reunión, por a constata cu oposición a bin cu e meta pa boycotea e reunión aki, sigur unabes a nota presencia di Minister Gerlien Croes, kende manera ta conocí ta ser considera un “enemigo” di oposición, ya cu e no kier contesta preguntanan relaciona cu un biahe cu el a haci pa Corsou. Pa John Hart, e problema no ta responsabilidad exclusivo di Ministerio di Husticia. Ministerio di Asunto Social y Ministerio di Enseñansa tambe mester participa activamente den un strategia integral. Delincuencia hubenil ta un problema social cu ta bay hopi mas leu cu solamente e tereno di husticia. Ora un hoben ta desvia di e caminda corecto, e causanan hopi biaha ta presente prome cu e hoben yega na contacto cu polis of husticia: abandono di scol, problema den famia, pobresa, falta di guia, desempleo y, sobre tur cos, falta di perspectiva pa futuro. John Hart (AVP) no a haya ni e oportunidad pa trece su preocupación na discusión, pasobra Rocco Tjon a pidi un punto di ordo y a cuestiona e maneho di Presidente di Parlamento, kende no ta yama e reunionnan di MEP, pero si di miembronan di fracción di AVP. A sigui un gritamento, insulto, y por mira con sala di Parlemento a para bira un circo, otro no por califique. Coalicion como Oposicion a demostra cu nan mes no tin ningun clase di respet pa Cas di Pueblo y a demostra bon cla, cu nan mes ta duna mal ehemple cu nan comportacion y kier drecha mundo, sin nan mes no sa di comporta nan mes. Nos a tuma nota cu Parldamentario Rocco Tjon a haye ta entrega un keho na Gobernador y a informa tur Parlamento den Reino tocante con Presidente di Parlamento, Marlon Sneek, ta mina derecho di Parlamentarionan. E motibo t’e willekeur y imparcialidad cu cual e reunionnan ta wordo yama, locual ta stroba e trabou di control constitucional, según Rocco Tjon. Nos lo a desea di haya sa kico Gobernador su opinión ta riba e denuncia aki. Nos ta kere cu Gobernador lo bisa Coalicion como Oposicion, “grow up”, ser ehempel pa pueblo y stop cu e muchadanan aki. Con Parlamento ta kere di drecha delincuencia hubenil, si Parlamentarionan mes ta demostra con no mester ta.

Traha na Horacio Oduber Hospital (HOH) no ta nifica unicamente contribui na cuido y calidad di awe, sino tambe enfoca riba bo propio desaroyo profesional pa e cuido di mañan. Desde juni 2026, HOH Academy a start cu un grupo di 37 studiante cu a scoge pa sigui crece den nan carera profesional den cuido. Pa medio di e programa aki HOH ta ofrece na su empleadonan e oportunidad pa profundisa nan conocemento, crece profesionalmente y specialisa nan mes den e tereno cu mas ta interesa nan. E diferente estudionan aki ta wordo organisa y coordina pa HOH Academy, den cooperacion estrecho cu stakeholders local y Hulandes.

Na september 2025 HOH Academy a cuminsa pa prome biaha na Aruba mes cu estudionan pa nurse specialisa den Cuido Intensivo (IC) y Seccion di Emergencia (SEH). Na september di e aña aki a agrega e estudio pa loke ta Basis Acute Zorg (BAZ). E estudio aki tambe ta wordo organisa pa prome biaha pa HOH Academy, den cooperacion cu Universidad di Aruba (UA) y Leids Universitair Medisch Centrum (LUMC). BAZ ta ofrece profesionalnan den cuido un base dentro di cuido agudo y ta forma e punto di salida pa mas specialisacion. Despues di finalisa e estudio di BAZ e profesionalnan por sigui cu diferente estudio di dentro di e cluster agudo.

Banda di e estudionan dentro di e cuido agudo, HOH Academy a cuminsa cu diferente otro trayecto di estudio specialisa manera Neurofisiologia Clinico (KNF) den cooperacion cu LOI, Citologia y Master Physician Assistant (PA) den cooperacion cu HAN, Departamento Central di Sterilisacion (CSA) den cooperacion cu Summa College, nurse di Diabetes den cooperacion cu Antonius Academie y nurse specialisa den Obstetricia, Pediatria, Dialisis y tambe Intervencion Cardiologico (MIC) den cooperacion cu Amstel Academie. Danki n’e colaboracionnan local y internacional e aña aki 37 colega ta haya e oportunidad pa sigui desaroya nan mes y specialisa den diferente tereno dentro di cuido.

Dor di ofrece e estudionan specialisa aki na Aruba mes, profesionalnan den cuido por combina nan trabou hunto cu nan estudio y keda conecta cu nan ambiente di trabao na HOH mes y pues no mester bay afo pa eleva nan conocemento y sigui specialisa. Asina aki HOH Academy ta sigui expande riba un di e pilarnan di HOH cu ta Continuous learning enfocando riba tereno di siña, educacion y desaroyo profesional. Pabien na nos coleganan cu a tuma e paso importante aki. Nos ta orguyoso di boso!

Den Corte no tin un hende cu mas suerte cu Zuriel Celaire, un acusado basta hoben, kende a haya su mes diferente biaha caba den Corte pa casonan pisa. Sinembargo el a logra convence Huez pa un biaha mas dun’e un chens. Y Huez, cu condicionnan extra, a dun’e otro chens. Huez a bisa e acusado cu el a tene cuenta cu e declaracion di e homber Dennis Lesire y un amigo di Lesire, kendenan a bisa cu nan a topa cu Celaire patras di EPB San Nicolas. Nan ta bisa cu Zuriel no tabata su so y e persona aki a maltrata e homber Lesire cu un cabo di un arma di candela.  E dos rumannan Lesire ya caba a wordo condena pa tira riba un auto cu Zuriel Celaire tabata maneha, na luna di april 2025.  Pa loke ta e caso specifico contra Zuriel Celaire, Corte a conclui cu a base di tur e declaracionnan, el a menasa un di e rumannan di Lesire. No a haya proba maltrato pisa, pasobra esey no tabatin. Solamente maltrato cu arma. Tambe a haya proba, menasa contra e ruman muher di Dennis Lesire. Corte a haya proba posesion di arma di candela. Tin un potret unda ta mira su man y un arma di candela. Pero tin mas potret di arma di candela so. Aunke cu e acusado a bisa cu el a traha e foto haciendo uzo di AI, e no por a proba esey. E no por a splica Huez con el a hacie. Solamente el a bisa cu e mester di un computer of telefon pa mustra cu el a trah’e.  E demanda contra Zuriel tabata 4 aña mas TBS. Su abogado tabata prefera pa dun’e TBS. Pero Corte no por a bay di acuerdo cu esaki.  Corte a conclui cu na Aruba tin un problema serio cu posesion di arma di candela. Ta kere cu e ta un problema serio riba e isla. Tur e acusacionnan contra dje ta proba y ta delitonan serio. Actuacion asina den publico ta crea sentimento di inseguridad. Corte ta tuma e actonan di Zuriel Celaire hopi na serio. Mas pasobra el a caba di pasa den un proceso di TBS (2 aña) y el a caba di yega Aruba, ora cu el a haya su mes den problema.

Si Huez a tene cuenta cu e recomendacionnan di Reclassering, pa loke ta uzo di enkelband y a impone un orario di salida y entrada na su cas. Awor esaki ta posibel dor di yegada di enkelband. Prome cu esey, no tabatin forma pa controla si un persona ta na cas of no.  Pues el a haya un castigo di 4 aña di cual 2 aña ta condicional, cu un tempo di prueba di 3 aña, durante cual e mester cumpli cu tur e condicionnan y ordonan di Reclassering. Y un di nan ta cu durante nuebe luna, despues cu e sali for di KIA, mester uza e enkelband y e mester yega cas pa 6’or di atardi y por sali bek 6’or di mainta.   E sospecho di participa actonan cu violencia, cual a hiba na varios investigacion detaya di parti di Cuerpo Policial di Aruba (KPA). Por corda maltrato di un persona di edad halto; drive-by shooting na San Nicolas unda 4 persona a resulta herida Y esun mas serio tabata matamento di un mucha muher di 19 aña, Sayuri Petronia. E caso di Zuriel Celaire ta resalta e desafio grandi cu Aruba ta enfrenta tocante e recidivismo  di hobennan den criminalidad y e transicion di delitonan chikito pa crimen organisa of di alto riesgo. P’e comunidad, e ta sirbi como un ehempel di e necesidad pa prevencion tempran y atencion pa hobennan den riesgo, mientras cu p’e sistema hudicial, e ta keda un caso di siguimento di cerca pa garantisa e proteccion y trankilidad di e pueblo Arubano.

Recientemente, Minister di Husticia, mr. drs. Arthur Dowers, a ricibi un bishita di introduccion di luitenant-kolonel Patrick Taribuka, Comandante nobo di Brigade Caribisch Gebied di Koninklijke Marechaussee (KMar). Desde september 2026, Patrick Taribuka ta den funcion di Comandante di Brigade Caribisch Gebied di KMar. Taribuka a re-emplasa luitenant-kolonel Gerhard Smit, kende tabata na cabes di e brigada desde juni 2024. Den su funcion nobo, Taribuka ta lidera e unidadnan di KMar riba e 6 islanan Caribense den Reino. Su bishita na Minister Dowers a tuma lugar den cuadro di su funcion nobo y a enfoca riba cooperacion y e tareanan comun riba tereno di seguridad y control di frontera. Durante e encuentro, a papia tocante e importancia di un bon cooperacion entre e diferente partnernan den Reino. Apesar cu cada isla tin su propio caracter, responsabilidad y institucionnan, cooperacion y confiansa mutuo ta esencial den lucha contra criminalidad relaciona cu frontera y den sosten di autoridadnan local. Koninklijke Marechaussee ta ehecuta diferente tarea den Caribe riba tereno di control di frontera y lucha contra criminalidad relaciona cu frontera. Ademas, KMar ta sostene autoridadnan local cu experticio, personal y material. Personal di Marechaussee tin un rol importante den entre otro, e cadena di inmigracion, unidadnan di informacion y den lucha contra crimen organisa, como tambe den deteccion di fraude cu documento y identidad. Tambe tin cooperacion cu Kustwacht Caribisch Gebied y otro partnernan den cadena di seguridad y husticia. Desaroyonan riba tereno di seguridad di frontera y criminalidad transfronteriso ta exigi un enfoke conhunto y bon coordina, teniendo na mes momento cuenta cu e situacion y necesidadnan specifico di Aruba. Minister Dowers a desea luitenant-kolonel Patrick Taribuka hopi exito den su funcion nobo y a expresa su confiansa den continuacion di e bon cooperacion entre Aruba y Koninklijke Marechaussee.