For di diabierne ultimo por a sinti cu tin un diferncia di opinion den actual Gabinte AVP-FUTURO, ora cu Conseho di Minister a trata e concepto di ley pa aumenta salario minimo. Un diferencia profundo riba e forma pa mara salario minimo na bestaansminimum a provoca tension fuerte den seno di Gabinete AVP-Futuro. E desacuerdo a pone presion riba e relacion entre e dos socionan di coalicion y por tin consecuencia pa continuidad di e gabinete!

Tabata diadomingo ultimo cu 24Ora.com a publica cu durante reunion di Conseho di Minister diabierna ultimo, 4 Minister di AVP a vota na fabor di un proposicion di ley pa conecta salario minimo di Aruba cu e bestaansminimum na vigor. Segun e informacion suministra, e suma pa un adulto so tabata Afl. 2.697 pa luna na augustus ultimo. Minister Gerlien Croes y Minister Geoffrey Wever, ambos di Futuro, a vota contra. E dos Ministernan ta apoya un aumento di salario minimo, pero ta considera necesario pa prome completa un investigacion cu ta andando y tene dialogo cu representantenan di comercio y sindicato.

E desacuerdo no ta concentra riba e pregunta si salario minimo mester subi, sino riba e base y e proceso pa haci e cambio. Segun e posicion expresa internamente pa Futuro, tuma un decision politico di e magnitud aki sin resultado di investigacion y sin consulta cu e gremionan lo ta iresponsabel. E partido kier un base cientifico pa determina e bestaansminimum y evalua e implicacionnan di e cambio. Prome Minister Mike Eman y Ministernan Wendrick Cicilia, Mervin Wyatt-Ras y Rene Herde a vota na fabor. Minister Arthur Dowers no tabata presente. Den partido AVP tin e conviccion cu a discuti hopi aña caba riba e diferencia entre loke un empleado ta gana y loke e tin mester pa cubri costo di bida. Pa AVP, e bishitanan na cas durante campaña electoral y despues di asumi gobernacion a confirma cu e nivel di pobresa na Aruba ta demasiado halto y cu ta tempo pa actua. Futuro, sinembargo, ta considera cu e experiencia di bishita cas no por reemplasa un investigacion cientifico riba e bestaansminimum. Aunke e proposicion a ricibi apoyo di e Ministernan menciona di AVP, diabierna e carta pa manda e proyecto di ley na Raad van Advies no a sali. Segun e informacion interno, e tension dentro di gabinete a impedi cu e proceso sigui su curso. E situacion a yega asina leu cu por poco a cancela e biahe di Mike Eman pa Hulanda, caminda e tabatin un programa pa despedi di Gobierno Hulandes. Despues di deliberacion na ultimo ora, a opta p’e biahe sigui. E decision ey, sinembargo, no a elimina e diferencia cu Futuro tin cu e manera cu AVP kier adapta e ley.

Futuro a convoca un reunion urgente di su Conseho di Partido diasabra merdia ultimo. Durante e encuentro aki, Gerlien Croes y Geoffrey Wever lo informa e miembronan di e desaroyonan den Conseho di Minister. Despues, e partido lo fiha su posicion oficial. Un di e puntonan central ta si Geoffrey Wever lo firma awe dialuna pa manda e proyecto pa Raad van Advies, of si Futuro lo pone condicion n’e firma. Entre e posibilidadnan menciona tin pa wanta cu e tramite durante dos of tres luna, te ora e investigacion ta cla y despues cu a dialoga cu e gremionan comercial y sindical.

Pa manda e proyecto di ley pa Raad van Advies mester firma di 3 Minister esta di Arthur Dowers di Husticia, Wendrick Cicilia di Labor y Geoffrey Wever di Economia. Esaki ta pone e firma di Wever den centro di e discusion. E apoyo di e 4 Ministernan di AVP, riba su mes, no a resulta den mandamento di e proyecto pa conseho. Den circulonan di AVP, e proposicion ta conta como un punto decisivo pa continuidad di e coalicion,  denomina como un “dealbreaker”. Segun e informacion interno, un blokeo di Futuro por pone futuro di e gabinete na peliger.

Pa AVP cu ta impulsa e cambio, e asunto ta trata di para na banda di e clase trahador. Futuro, di su banda, ta sostene cu investigacion y dialogo ta necesario pa yega na un decision responsabel, sin cu esaki ta nifica oposicion na un aumento.

Awor, e discusion riba salario minimo ta pone e union entre AVP y Futuro bou presion, cu e posicion oficial di Futuro y e firma pa manda e proyecto na Raad van Advies como e siguiente puntonan decisivo. Esaki de facto ta bira e prome reto pa Wendrick Cicilia, despues cu a instal’e como Lider di Partido AVP dia 4 di october 2026. E lo tin e encargo awe dialuna pa encabesa un posibel “coalitieberaad”.

Un coalitieberaad ta un reunion di consulta entre e partidonan politico cu hunto ta forma gobierno. Den e reunion aki, lider di e partidonan y representante di nan fraccion of gabinete ta discuti asuntonan importante, busca acuerdo y trata di soluciona diferencianan cu por afecta e coalicion. Den caso di AVP y Futuro, un coalitieberaad por sirbi pa busca un salida p’e desacuerdo riba e aumento drastico di salario minimo y fiha con e dos partidonan lo sigui goberna hunto. E reunion di consulta entre socionan di coalicion ta un consulta politico; e decisionnan oficial di Gobierno mester sigui e proceduranan corespondiente den Conseho di Minister.

Ayer nochi, Den Noticia a recibi copia di un raport di SER, relaciona cu e aumento di sueldo mínimo mara n’e bestaanminimuum. SER ta di opinión cu sigur mester tin un ahustacion, pero cu esaki mester tuma lugar den fase. E aumentonan aki lo wordo haci den periodo di 3 aña, pero mirando e tempo p’e ley bai na vigor awor na januari 2027, ta mustra difícil. Gobierno kier manda e ley den pura pa Raad van Advies, cu sigur lo no keda cla den e 90 dianan cu aña falta pa caba. Tambe SER ta di opinión cu Gobierno mester consulta cu e gremionan di dunador di trabao y di sindicatonan. E hecho cu e biaha aki e consulta cu gremionan a stanca, ta pa falta di gremio di dunaador di trabao (ATIA, AHATA y CUA) cu no kier mira participación di OPPA, Camara di Comercio y di San Nicolas Buisness Association ne dialogo nacional aki, alegando c unan no ta dunadornan di trabao. P’e falta di madurez aki, no tin dialogo nacional. Tin experto ta bisa cu mester hasta invita Cleronan pa forma parti tambe di e dialogo nacional aki, manera Betico Croes a haci tempo el a forma comisión pa busca interesado pa habri e refinieria. Mirando e periodo cu falta p’e ley aki drenta na vigor, ta difícil pa yega na un consensus awor pa dia 1 di januari 2027, pero ley por haci cu e por drenta na vigor dia 1 di juli 2927, Ta boluntad y corahe político mester tin pa logra loke mester wordo haci. SER tin mas punto di recomendación, cu nos lo bin mas den detalle después.

Un mucha muhe di apenas 27 aña di edad a perde su bida despues cu tiro a alcans’e den cura di su cas na Pos Chikito diasabra madruga. El a bira di 4 victima di arma di candela na Aruba, confirmando un biaha mas, cu tin masha arma di candela na Aruba. Cu e reciente campaña pa entrega arma a resulta un fracaso. Segun vocero di polis, Liliana Rasmijn, kende a confirma tambe cu dos mucha menor di edad tambe tabata den e cas na momento di e sucedido. Alto Comisario di Cuerpo Policial Aruba, drs. Ramon Arnhem, a condena e crimen y a sigura cu polis ta tuma e investigacion hopi na serio. Tabata pa mas o menos 3:10 di madruga cu Central di Polis a ricibi un yamada pa un persona cu a haya herida di bala y no tabata reaccionando. E prome aviso tabata menciona un homber, pero ora e patruyanan a yega na sitio, nan a topa un hende muher na suela den cura di su cas. Polis y ambulance a acudi n’e adres. Paramediconan a haci tur esfuerso pa salba bida di e victima, pero lamentablemente dokter forensico a constata morto di Diviene Celine Lillian Vlaun naci na Aruba dia 12 di mei 1999, pues tabatin apenas 27 aña di edad. Liliana Rasmijn a indica cu e prome informacion ta menciona un auto color scur relaciona cu e sucedido. Sinembargo, polis ainda no a confirma e marca of modelo di e vehiculo, ni cuanto persona tabata aden. Tampoco tabatin confirmacion di cuanto bala a alcansa e victima. E mama di e victima a bisa recherche cu el a scucha cuater diferente tiro! Recherche, polis tecnico y e dokter forensico a inicia nan trabou na sitio pa determina exactamente con e crimen a sosode. Investigadornan tambe ta papia cu testigonan den e vecindario. Rasmijn no a confirma un posibel motibo ni si tabatin algun problema previo relaciona cu e victima. Rasmijn a califica e sucedido como hopi lamentabel y inaceptabel. El a haci referencia tambe na un otro caso reciente na Caya Sint Maarten, unda dos persona a haya herida di bala, sin establece un relacion entre ambos caso. Na nomber di polis, el a expresa condolencia na famia di e victima. E caso lamentabel di diasabra madruga ta marca e di 4 caso di asesinato p’e aña aki. E prome tabata e asesinato na The Village den area di hotelnan highrise. E di dos tabata e caso na Calabas. E di tres asesinato a sosode riba veld di Winston na Santa Cruz. E di cuater t’esun aki na Pos Chiquito. Manera e mama a cuestiona, e no sa kico su yiu a sali bai busca pafo. E yiu a ser yama na su cel p’e sali? Esnan cu ta haci e investigacion mester sa kico nan tin di haci. Tin hopi version, cu no ta toca na nos pa participa n’e speculacionnan aki. Hecho ta cu tur hende kier wak un solucion y cu husticia hci su trabao. Di acuerdo cu e mama, e victima ta biba cu su dos babynan na cas di su mama den e casnan di pueblo na Pos Chiquito. E mama a relata cu dado momento un di e babynan a lanta yora, pa cual su yiu a lanta pa traha un boter p’e. Despues el a sinti e yiu habri e porta di cas y a bay pafo y den cinco minuut a scucha tiro. Ora a sali pafo no a mira nada mas cu su yiu benta banda di e auto di e mama den un plas di sanger. Pa colmo e yiunan a lanta pues a mira nan mama morto na suela, pa cual a traslada nan pa cas di un famia. Drs. Ramon Arnhem, Alto Comisario a lamenta e suceso y a subraya cu e investigacion a cuminsa mesora y cu coleganan ta traha tanto n’e sitio di e crimen como na otro lugarnan relaciona cu e investigacion. Arnhem a califica e crimen como inaceptabel y a sigura cu polis lo actua cu firmesa pa localisa esnan responsabel. E Alto Comisario a pidi comunidad pa colabora cu e investigacion. Cualkier persona cu tin un tip of informacion cu por yuda polis por comparti esaki via e tiplijn 11141.

Despues cu Corte di Apelacion a duna su veredicto den caso contra Otmar Oduber, a surgi basta discusion despues di a tende e entrevista cu Maritiza Maduro tabatin cu e Pers Rechter, Debby Angela. Un bon entrevista porcierto, cu lamentablemente Otmar Oduber a cuestiona esaki, bisando cu Hof a paga pa Maritza Maduro haci e entrevista aki, loke a keda desmenti, pero cu ningun dia Otmar Oduber a disculpa su mes cu e.o. e periodista specialisa aki den casonan di Corte. Hof tambe tin derecho di duna su banda di opinion, loke a ser haci berdad pa prome biaha, pero lo no bira e ultimo tampoco. Awor e mesun Otmar Oduber a presenta un manifiesto na tur lider di fraccion den Parlamento y a duna tambe copia na Presidente di Staten, Marlon Sneek, creando cu tur hende lo ta di acuerdo cu e ponencianan di Otmar Oduber, cu mester cambia ley, mescos cu tin na Hulanda. Ministerio Publico a mustra cu Ley di Procedura Penal di 1 di april 2024, tin cambionan ya haci cu Aruba su ley ta mihor cu esun di Hulanda. Unda Corte Comun di Husticia, mester duna autorisacion ora cu kier investiga un Minister y/of Parlamentario. No mester di ningun Hoge Raad (cu no tin na Aruba, ni na Corsou). E vocero di Hof, Hues mr. Debby Angela, kende ta Pers Rechter di Corte di Aruba a duna mas claridad riba e sentencia cu Corte Comun di Husticia, conoci como Hof, a dicta den caso Flamingo contra ex-minister Otmar Oduber. Den apelacion, Hof a impone dos aña di prizon incondicional y a exclui’e durante cinco aña di ocupa un funcion publico of postula pa un organo representativo. Nos di Den Noticia no ta bai den detayes di e splicacion ya duna pa Hues mr. Debby Angela, pero si lo trese opinion di Hof den e caso aki, unda Hof kier termina cu e cultura politico cu tin na Aruba, pero tambe na otro islanan manera na Corsou y St. Maarten. Hof a considera proba cu Oduber y Esser a haci esfuerso pa yuda diferente persona haya un trabou na entre otro Serlimar y DOW. Den algun caso, Hof a establece un relacion entre e ayudo politico of trabou haci durante campaña y e trato preferencial cu nan a ricibi despues. Segun e splicacion di Hues Angela, funcionario y mandatario publico mester actua cu integridad y tuma decision sin laga interes personal of preferencia politico influencia nan. E conducta demostra den e caso aki a afecta e separacion necesario entre politica y aparato gubernamental. Hues Angela a enfatisa cu e funcion di Minister ta exigi transparencia, integridad y respet pa proceduranan oficial. Un Minister no por uza su posicion pa beneficia amigo, conoci of sostenedo politico riba otro ciudadano. Hof a considera cu Oduber a ocupa un posicion di poder y confiansa, pero a uza e posicion ey pa influencia decisionnan gubernamental. Esaki a causa daño na confiansa cu comunidad mester por tin den Gobierno y den sistema politico. Na momento di determina e castigo, Hof a tene cuenta cu e echonan a sosode algun aña pasa y cu e caso a genera un cantidad grandi di publicidad. Sinembargo, gravedad di e delitonan y e daño na integridad di administracion publico a pisa mas fuerte. “Corupcion ta inaceptabel y ta conduci na castigo severo”, ta e mensahe cu Hof a presenta den su sentencia.  Na final di e entrevista, Hues mr. Debby Angela a contesta e pregunta tocante cua mensahe Hof kier manda na politiconan di Aruba cu e sentencia aki. Segun Angela, Hof su mensahe ta cu un mandatario publico mester actua cu integridad, transparencia y imparcialidad. E hecho cu practicanan politico por a bira comun of cu hende ta considera nan parti di cultura politico di Aruba, no ta nifica cu nan ta permiti legalmente. Un Minister tin libertad pa formula su maneho y tuma decision, pero e libertad ey tin limite. E no por pasa banda di proceduranan oficial, duna trato preferencial na sostenedonan politico ni uza aparato gubernamental pa recompensa personanan cu a yuda durante campaña. Hof kier laga cla cu tur ciudadano mester haya un trato igual cerca Gobierno, sin importa su afiliacion politico, amistad of relacion personal cu un minister. Un politico no por considera un funcion publico, un puesto di trabou of un tereno di Gobierno como un instrumento pa beneficia “nos hendenan”. Si tuma e mensahe aki na consideracion, lo kier men for di Status Aparte p’awor, pa no papia prome cu e periodo aki, tur mandatario a comete corupcion, nan no ta integro. Nan tur a peca cu e pensamento di Hof, awor padilanti. Tambe nos di Den Noticia kier ilustra cu no por t’asina cu tin (ex)miembronan di Ministerio Publico a festeha e veredicto contra di Otmar Oduber como un truinfo di nan. No por!! E mensahe central di Hof ta cu un posicion politico ta trece poder, pero tambe un responsabilidad grandi. Ken cu ocupa un funcion ministerial mester proteha integridad di Gobierno y confiansa di pueblo y no por uza e posicion pa interes personal of partidista!

0

Relacion cu e manifestó cu Otmar Oduber a entrega na Parlmento, pa cambia ley, pa ta igual cu ley na Hulanda, ora di kier persigui un Minister of Parlamentario. Ministerio Publico a emiti un declaración, mustrando cu nos Codigo Penal di Procedimiento Penal cu a keda ahusta na 2024 ta mihor cu esun di Hulanda.

Ministerio Publico ta splica e ciudadano regularmentemente tocante ley penal y e manera con e proceso penal ta cana. E pregunta cu ta bin dilanti cu frecuencia den e cuadro aki, ta si e mesun normanan cu ta conta pa ciudadanonan ora nan wordo sospecha di a comete un delito, ta aplicabel tambe pa ministernan y miembronan di Parlamento.

E principio fundamental ta simpel: Ningun hende ta riba ley, tampoco un Minister of un Parlamentario. Un otro principio fundamental ta cu tur hende tin derecho riba proteccion di su libertad y privacidad. Pesey Gobierno no por zomaar cuminsa un investigacion na forma arbitratio. Mester tin reglanan cla tocante ki ora polis por cuminsa un investigacion penal y ki medidanan por wordo usa den e proceso. E reglanan aki ta stipula den e Codigo di Procedimiento Penal.

Ki ora un investigacion ta cuminsa? Un investigacion penal ta cuminsa ora surgi un sospecho rasonabel cu un persona a comete un delito. Esaki ta conta pa tur sospechoso, sea cu ta trata di un ciudadano comun y coriente, of di un Minister of Parlamentario. Durante un investigacion, polis of Landsrecherche ta reconpila informacion, ta tuma declaracionnan di personanan y ta busca pruebanan. Semper tur esaki mester bay segun reglanan di ley. Sin cu tin un sospecho di un hecho castigabel, no por start un investigacion.

E meta di un investigacion ta pa haya sa e berdad y pa determina si tin suficiente prueba pa hiba e caso dilanti Hues. Di e manera aki ta garantisa cu casonan penal ta wordo trata na un forma husto y cuidadoso.

Ken ta supervisa? Ministerio Publico ta dirigi e investigacion, ta supervisa e proceso y ta dicidi cua pasonan mester wordo tuma. Pa algun medida cu ta interveni profundamente den bida di un persona, manera tap telefon of drenta su cas pa busca, mester haya permiso di Hues-Comisario prome. Hues-Comisario ta controla si e medidanan aki ta wordo aplica legalmente.

Durante investigacion, Fiscal ta determina cua medidanan ta necesario. Hues ta evalua siguientemente si e medidanan mag di wordo aplica. Ora un persona wordo deteni y poni den detencion preventivo, Hues ta dicidi si tin suficiente base leal. Tambe durante e periodo di detencion, Hues ta continuamente evalua si prolongacion di detencion ta hustifica of no.

Ta existi reglanan especial pa Minister- y Parlamentarionan? Loke Ministerio Publico a menciona te aworaki riba, ta conta pa tur ciudadano, incluso pa Minister y Parlamentarionan. Sinembargo, pa Minister y Parlamentarionan ta existi ademas un regla especial. Articulo 476 di Codigo di Procedimiento Penal ta stipula cu desde 1 di april 2024, Ministerio Publico no por procesa un Minister of Parlamentario sin mas pa un delito cometi den funcion.

Prome cu Ministerio Publico mag di saca un citacion pa un delito cometi den funcion (un ambtsdelict of sea un hecho castigabel relaciona cu ehecucion di un funcion oficial), Ministerio Publico mester haya autorisacion di Corte Comun di Husticia. E garantia adicional aki, hinca den articulo 476, tin como meta pa evita cu derecho penal wordo usa como instrumento di poder politico.

Pa tur hende, incluso Minister y Parlamentarionan, ta bal cu semper por bay pa un Corte mas halto cu un caso. Si un persona no ta di acuerdo cu un decision di Corte den Prome Instancia, e por apela na Corte Comun di Husticia, y despues den casacion na Hoge Raad.

Diferencia cu Hulanda Na Hulanda ta existi un areglo diferente pa mandatarionan. Ta solamente Hoge Raad por enhuicia nan pa delitonan cometi den funcion. Contra un decision asina no tin posibilidad di apelacion.

Precisamente p’e motibo ey cu na Hulanda a traha e raport “Niet boven maar in de wet” (Rapport 20210712 digitale versie DEF). Den e raport aki a keda recomenda pa adapta e reglanan legal tocante investigacion, persecucion y enhuiciamento di delitonan cometi den funcion. E raport ta conseha pa aplica e procedura penal normal ora ta trata di mandatarionan, pa asina apelacion y casacion ta posibel den casonan na Hulanda tambe.

Articulo 476 di Aruba ta conecta cu e manera di pensa aki. Na Aruba tambe ta conta, como regla general, cu ta sigui e procedura penal normal cu posibilidadnan di apelacion y casacion. Ademas di esaki, e legislador Arubano a inclui un garantia adicional, esta, cu pa por cita un Minister of un Parlamentario, Ministerio Publico mester haya autorisacion di Corte Comun di Husticia prome.

Presidente di Comerciantenan Uni di Aruba (CUA), Frans Ponson, ta considera cu Gobierno mester revisa e carganan cu e mes ta pone riba necesidadnan basico, prome cu sigui pone responsabilidad pa costo di bida riba comercio. Durante un reciente conferencia di prensa, Frans Ponson a duna su opinion riba e discusion tocante bestaansminimum y aumento di salario minimo. Ponson a menciona coriente, awa, gasolina y internet como necesidadnan di comunidad. Segun e, Gobierno tin un papel importante den e costonan aki mediante empresanan estatal y impuesto, y mester contribui directamente na alivio pa ciudadano. ÒSi bo kier yuda pueblo, haci bo mes un canasta basico cu un bon prijs,Ó Frans Ponson a duna di conoce. Pa ilustra su argumento, Ponson a presenta un calculo di prijs di gasolin, usando un prijs di compra di Afl. 2,50 pa liter y un prijs di benta di Afl. 2,91. Segun su calculo, e parti cu ta bay pa Gobierno y e empresa estatal, incluyendo impuesto, ta representa rond di 40% di e prijs final, mientras e margen di e gasolinera ta rond di 7,3%. E cifranan aki ta calculonan presenta pa Frans Ponson. E margen di e gasolinera no ta mescos cu ganashi neto, pasobra ainda tin gastonan di operacion cu mester wordo cubri. E presidente di CUA a critica loke e ta considera un trato desigual: Comercio ta enfrenta competencia y gastonan diario, mientras Gobierno ta ricibi entrada di impuesto y di su empresanan. Frans Ponson a argumenta cu ora prijs subi, entrada di Gobierno di impuestonan calcula como porcentahe tambe ta aumenta.ÊÒOra un prijs subi na Aruba, ken ta gana mas?ÊGobierno,Ó el a declara. Segun e Presidente di CUA, no ta suficiente pa Gobierno papia di surplus financiero of proteccion di poder di compra, mientras e carganan riba necesidadnan basico ta sigui afecta ciudadano y comercio. El a pidi estudionan serio tocante e impacto di aumentonan di salario minimo y otro medida relaciona cu bestaansminimum, y un relacion di colaboracion cu sector comercial. Su frustracion cu e relacion actual tabata cla: ÒNo ta un partner, ta un enemigo.Ó E mensahe di Frans Ponson ta cu alivio di costo di bida mester ta un responsabilidad comparti, den cual Gobierno tambe ta revisa su propio impuesto, tarifa y exigencianan.

Durante un evento nacional importante pa henter comunidad dilanti di Hulp Bestuurskantoor den centro di San Nicolas, tur Minister di Gabinete AVP-FUTURO a presenta e proyectonan di inversion cu Gobierno ta preparando y cu ta programa pa ehecucion den e proximo añanan. E iniciativa aki ta sigui e aprobacion di e prome presupuesto di Algemeen Investerings- en Ontwikkelingsfonds (AIOF) pa 2026 y 2027, durante e reunion di Parlamento di diabierna 9 di october 2026.

Cu e presentacion aki, Gobierno kier duna pueblo di Aruba un bista completo riba su agenda di inversion, su prioridad y e proyectonan concreto cu lo contribui na mehoracion di calidad di bida, modernisacion di infrastructura publico, fortalecemento di servicio di Gobierno y desaroyo economico duradero. E evento no ta limita na proyectonan financia pa medio di AIOF. Tur Minister a presenta e inversionnan importante den nan respectivo cartera, independientemente di e fuente di financiamento. Di e manera aki, pueblo di Aruba por a haya un bista mas amplio y integra di e proyectonan cu Gobierno ta impulsa pa futuro di nos pais.

Minister di Finansa, Asunto Economico y Sector Primario, Geoffrey Wever, ta considera e aprobacion di presupuesto AIOF un paso importante den e proceso pa transforma e posicion financiero di Aruba den oportunidadnan concreto di desaroyo pa Aruba. Durante e ultimo periodo, Gobierno a pone enfasis riba un maneho financiero responsabel, fortalecemento di disciplina presupuestario y creacion di e condicionnan necesario pa por inverti den prioridadnan di pais.

AIOF ta forma parti di e strategia aki. E fondo ta crea un instrumento financiero cu ta permiti Gobierno planifica y ehecuta inversionnan riba varios aña, teniendo cuenta cu preparacion, financiamento, capacidad di ehecucion y sostenibilidad di e proyectonan.

Sinembargo, inversion publico ta bay mas leu cu un solo fondo. Diferente Ministerio tin proyectonan cu ta wordo financia mediante presupuesto ordinario, fondonan special, cooperacion institucional y otro mecanismo di financiamento. Durante hopi aña Aruba a enfrenta e consecuencia di falta di inversion o por lo menos no suficiente inversion den nos infrastructura, scolnan y facilidadnan publico. Awor nos ta crea e condicionnan pa atende e necesidadnan aki di forma structural. Aprobacion di AIOF ta un paso importante, pero nos vision ta mas amplio. Nos kier cu cada florin cu Gobierno inverti contribui na un Aruba mas fuerte, mas moderno y mas prepara pa futuro, Minister Geoffrey Wever a destaca.

Durante e evento, cada Minister a haya oportunidad pa presenta e proyectonan strategico cu ta cay bou di su responsabilidad. E presentacionnan a brinda un panorama di inversionnan den areanan manera enseñanza, infrastructura, salud, vivienda, seguridad, desaroyo urbano, sostenibilidad, economia y sector primario. E responsabilidad di Gobierno no ta termina na anuncia proyectonan. Mesun importante t'e capacidad pa prepara e proyectonan aki bon, determina nan viabilidad, identifica e recursonan financiero y supervisa nan ehecucion.

Gobierno AVP-FUTURO ta reafirma su compromiso pa sigui traha cu responsabilidad, transparencia y determinacion pa realisa e inversionnan cu Aruba tin mester. Aruba ta inverti den su futuro. Un futuro cu nos ta construyendo cu vision, responsabilidad y accion concreto.

Entre 5 cu 9 di october 2026, a tuma lugar e Caribbean Echo Congress presenta pa HOH Academy di Dr. Horacio E. Oduber Hospital. Un evento unico y innovativo organisa den colaboracion estrecho cu DEUS (Dutch Emergency Ultra Sound). Nan ta un organisacion di educacion medico cu ta specialisa den entrenamento y cursonan di ultrasonido na punto di cuido (POCUS) pa profesionalnan den cuido di salud. E congreso di un total di 5 dia a reuni specialistanan medico, dokternan di cas y otro profesionalnan den sector di salud di Aruba, di nos isla bisiña Corsou y di Hulanda pa un programa intensivo dedica na “Point-of-Care Ultrasound” (POCUS).

E congreso aki a destaca pa e combinacion di sesionnan di conocemento teoretico y entrenamento practico intensivo dirigi pa expertonan. E programa a wordo diseña pa tanto principiantenan cu ta haya un introduccion den POCUS, como pa profesionalnan cu mas experiencia cu tabata busca un entrenamento mas profundo y avansa. E idioma di e congreso tabata Ingles y Hulandes y e evento a ofrece specialistanan medico e oportunidad pa haya 18 punto di acreditacion.

Un enfasis fuerte riba e combinacion di conocemento y practica Durante e cinco dianan di e programa, e participantenan a haya e oportunidad pa amplia nan habilidad y conocemento den varios topico di POCUS, incluyendo evaluacion di FAST, riñon, pulmon y aorta & IVC. Tambe ecografia di curason y e aplicacion den ginecologia, topiconan di gastroenterologia y mucho mas.

Els van Leest, dokter na HBOT y International Patient Office (IPO) na HOH a enfatisa e importancia di a probecha di e congreso teni na Aruba aki cu a invita coleganan di Corsou y Hulanda. "E tecnica aki a nace na aña 2008, pues casi 20 aña pasa, pero na Aruba e no ta incorpora ainda completamente. E ta relativamente nobo akibanda y nos kier acelera su uzo," van Leest a splica. El a agrega tambe e caracter practico di e evento: "E tabata un congreso unda cu por a practica mas tanto posibel, pues nos tabatin tur dia mas o menos 7 pa 9 modelo cu tabata boluntario cu a yuda pa nos por a organisa esaki." E boluntarionan aki a pone nan mes disponibel pa e dokternan por a practica directamente riba nan, realizando echo di curason, pulmon y riñon pa siña mas di kico tur por mira via tecnicanan moderno di ecografia.

Innovacion y mihor cuido pa e pashent E impacto di e entrenamento aki ta di gran balor pa e practica diario di e profesionalnan medico. Internista Jaclyn de Kort ta considera e congreso aki como un momento clave y innovativo pa sigui crece profesionalmente: "Como internista hopi biaha nos ta diagnostica via nos mannan, uzando un stetoscop, pero mi ta kere cu awendia ecografia por ta un manera pa yuda nos pashentnan mas miho ainda. E ta yuda nos pa haci nos trabou mas facil y pa yega na diagnosticonan mas exacto."

E Caribbean Echo Congress a demostra di ta un paso firme padilanti den e introduccion y expansion di tecnicanan di “Point-of-Care Ultrasound” (POCUS) den region di Caribe, contribuyendo directamente n’e mehoracion continuo di e calidad di cuido di salud pa tur pashent cu ta HOH su meta tur dia.

For di algún tempo caba, specialmente después cu Mike de Meza a gradici pa bira Minister, rumornan a cuminza circula cu drs. Rene Herde lo retira fin di aña. Ya cu su nombramento tabata temporal y fracción di AVP no kier mas “vakminisster”.

Diadomingo, dia di Congreso, Minister Rene (Baba) Herdé a briya cu su ausencia, pero a ser bisa cu Baba Herde ta malo na cas. Mike de Meza, evitando di ta presente, a biaha pa Hulanda. Minister drs. Rene Herde a reafirma su compromiso cu Arubaanse Volkspartij (AVP), partido na cual el a bira miembro desde 1990 y ta sostene e Era di Relevo di e Partido completamente. Asina el a laga sa den un comunicado, desmentiendo asina tur rumor cu pa fin di aña e lo baha como Minister. Problema cu Rene Herde tin ta, cu unabes el a asumi función di Minister temporalmente pa Mike de Meza keda cla cu tur problema, Mike de Meza a laga pa Gobierno nombra tur su coordinadornan, pendiente su decisión. Awor cu Mike de Meza a laga sa di no kier bira Minister, nifica cu Minister Herde tin cu tene tur e “hendenan” di Mike de Meza den su Ministerio?

Minister drs. Rene Herdé a splica cu el a cuminsa su trayectoria profesional na 1980 den loke e tempo ey tabata Gebiedsbestuur di Aruba. Durante su carera den sector publico, el a participa den preparacionnan relaciona cu e Status Aparte di 1986 y despues a traha riba renobacion di enseñansa y e introduccion di Papiamento den Enseñansa. Den añanan 90, Herdé a fungi, entre otro, como hefe di Bureau Organisatie & Efficiëntie y tabata envolvi den e fundacion di e Faculteit Financieel Economische Wetenschappen na Universidad di Aruba. El a ocupa tambe diferente funcion den sector priva. Na 1990, Herdé a bira miembro di AVP. Na 2009, el a bira miembro di Parlamento di Aruba y lider di fraccion di AVP. Na 2017, el a termina su carera politica activo, pero a sigui envolvi den e partido. Durante e periodo aki su participacion den eleccionnan di AVP tabata prominente. Na 2025, AVP a acerca Herdé atrobe, inicialmente pa e posicion di Gevolmachtigde Minister na Den Haag. E candidatura tabata parti di e formacion di e Gabinete nobo AVP/Futuro.

Cu su regreso na 2025 pa sirbi pueblo, Herdé a asumi e responsabilidad di Minister den e area di infrastructura, energia y telecomunicacion. E nombramento y su trayectoria a wordo presenta como continuacion di un carera cu ta conecta servicio publico, maneho, enseñansa y politica. “AVP ta mi partido, awe, mañan y semper.” Cu e punto di bista aki, Herdé ta enfatisa su vinculo historico cu e partido, mientras e ta reconoce tambe e importancia di duna espacio na un generacion nobo pa sigui construi riba e experiencia acumula durante añanan. Minister Herdé ta gradici Mike Eman pa lidera AVP pa 25 aña y ta desea Wendrick Cicilia hopi exito como lider nobo. Pa Herdé, e era di relevo ta forma parti di e proceso natural di un organisacion politico, den cual experiencia y energia di generacionnan diferente por sigui contribui n’e futuro di Aruba. Nada a ser menciona di su posible retiro pa fin di aña y como tal lo keda te ora cu periodo di e gobernación aki finalisa.

Esun cu si a anuncia di lo retira fin di aña ta Prome Ministerio Mike Eman, maske durante e Congreso, Mike Eman a admiti cu no ta tur hende ta di acuerdo cu du decisión. Hasta den su famia tin rumanas cu a pide pa reconsidera, pero Mike Eman no a comenta nada riba e peticiónnan aki. Te awor ta ser menciona cu Minister Arthur Dowers lo bira e proximo Prome Minister di nos pais. Pero si mester eligi un persona pa cu su miembrecia den AVP, anto esey lo ta drs. Rene (Baba) Herde. E tambe ta un candidato pa bira Prome Minister. Decision no a cai ainda den Conseho di Partido, cu tin e ultimo palabra.

Minister di Turismo, Transporte y Labor, mr. Wendrick Cicilia, a finalisa cu e di tres ronda di sesionnan di dialogo nacional cu stakeholders clave den turismo pa revisa, refina y concretisa e ehecucion di 'Aruba Strategic Tourism Master Plan 2026-2031'. E consultanan di tres dia a reuni directivanan di Aruba Tourism Authority (A.T.A.), Aruba Ports Authority (APA), Aruba Hotel and Tourism Association (AHATA) y Aruba Timeshare Association (ATSA), hunto cu e representantenan di empresanan publico, educadornan, lidernan ambiental y empresarionan local. E sesionnan a sirbi como un espacio pa alinia prioridadnan di maneho nacional, atende cu e aspectonan relaciona cu e capacidad di Aruba pa sostene turismo y establece mecanismonan concreto pa traduci e vision strategico den accionnan publico y priva cu ta ehecuta.

Awor ta resulta cu AHATA, cu ta un di e stakeholdernan a laga sa cu esnan concerni pa traha e raport aki, no a tene cuenta cu puntonan cu AHATA a trece. E CEO di AHATA, Tisa Lasorte a cuestiona henter e proceso aki y ta bisa cu consehero(nan) di e Minister tin un plan traha caba, sin tene cuenta cu puntonan di bista di AHATA. E vocero di AHATA a califica henter e set-up aki un show di e Minister. Camara di Comercio di otro banda a duna di conoce cu Gobierno mester cuminza ehecuta e plan, sigur pa frena e over-tourism, cu ta un di e prome retonan. Minister di Turismo mester haci cambio di manhood, unda no ta bai pa haya mas turista, pero haya mas balor. Y asina atin alg˙n cambio mas pa adapta di p.e. e ultimo raportnan traha.

CEO di AHATA, Tisa Lasorte a hasta califica henter e asunto aki un malgastamento di placa, y tabagta mas bien un show di partí di e mandatario. E "choque" tabata basta directo, cu a causa un reacción directo di partí di Minister Cecilia. E mandatario ta haya cu CEO di AHATA ta contraed su mes. E kier p reduci turista crucero, pero no ta contra pa construi mas hotel. Minister Cicilia a habri e sesionnan reconociendo e base historico di e industria principal di nos isla, enfatisando cu e exito turistico di Aruba nunca tabata resultado di casualidad. A construi esaki cu vision, curashi, iniciativa empresarial y e calor autentico di e pueblo Arubiano. Mientras turismo a conecta Aruba exitosamente cu mundo y a crea oportunidadnan di progreso economico pa generacionnan di famianan local, Minister Cicilia a subraya cu e tarea nacional di awe ta proteha e logro aki, garantisa cu e sector ta sirbi un proposito ainda mas grandi: crea un Aruba saludabel, sigur, creativo y prospero, cu poco of ningun presion adicional, unda cada residente por progresa y enfrenta futuro cu confiansa.

Minister Cicilia a enfatisa cu e cambio strategico aki ta redefini fundamentalmente e manera cu pais ta evalua e desempeño di su economia turistico. Minister Cicilia a reafirma e principio cu ta guia e Aruba Strategic Tourism Master Plan 2026-2031: si turismo no ta aporta activamente na bienestar y prosperidad di e pueblo Arubiano, e no ta cumpli cu su proposito fundamental.

Cu e meta di brinda periodista conocemento y habilidadnan practico pa nan por integra inteligencia artificial den nan trabou di un manera consciente y responsabel, Red Arubiano di Prensa Profesional (RAPP) a organisa su di tres edicion anual di Caribbean Journalism Seminar. E programa di tres dia, cu a tuma lugar di 25 pa 27 di september, tabatin como tema Innovations & AI in Journalism. E combinacion di un anochi di presentacion y dialogo, sigui pa dos workshop practico, a contribui na un seminario exitoso den cual conocemento y practica a bin hunto. Participantenan no solamente a haya mas informacion tocante e posibilidadnan cu AI ta ofrece periodismo, sino nan a haya tambe e oportunidad pa traha nan mes cu e tecnologia y explora con nan por aplic’e den nan trabou diario. Inteligencia artificial ta transformando periodismo na un ritmo rapido. AI por yuda periodista y redaccionnan procesa y analisa informacion, verifica dato, crea formato nobo y traha di un manera mas eficiente. Pero uzo di AI ta trece tambe preguntanan importante tocante confiabilidad, privacidad, transparencia, responsabilidad editorial y e proteccion di fuente. Pa RAPP, ta importante pa periodistanan no solamente siña con pa uza e tecnologia, sino tambe compronde unda su limitacionnan ta. Un resultado produci pa AI por parce convincente sin ta completamente corecto. P’esey, criterio humano, pensamiento critico y verificacion ta keda indispensabel. E responsabilidad final pa e informacion cu wordo publica no ta cerca e sistema di AI, sino cerca e periodista y e redaccion cu ta haci uzo di dje. E seminario a inicia diabierna 25 di september na unda Rodolfo Rodriguez, Digital Strategist & Developer, a presenta con periodista y otro profesional den media por haci uzo di Claude. Vincent Smit, hefe di redaccion di e medio Hulandes 1Almere, a papia tocante vibe coding den sala di redaccion y con periodista por uza AI pa crea nan propio hermentnan y prototipo. Noel Algarín-Martínez, editor na Centro de Periodismo Investigativo di Puerto Rico, a enfoca riba e dimension etico di AI y e importancia di mantene criterio humano den periodismo. Diasabra 26 di september, e programa a continua cu e workshop AI Essentials for Journalists, facilita pa Laurens Ras, Chief Automation Officer. Durante e workshop, participantenan a siña con pa configura ChatGPT of Claude basa riba nan propio trabou, fuentenan y estilo di skirbi, pa e resultado no ta generico, sino refleha mihor e stem y contexto di e periodista. Diadomingo 27 di september, Vincent Smit a facilita e workshop Vibe Coding in Practice. Participantenan a explora con nan por transforma un idea periodistico den un prome prototipo cu ta funciona, hasta sin experiencia anterior cu programming. Asina nan por pensa riba aplicacionnan manera formato interactivo, herment pa envolvi audiencia, solucionnan pa sala di redaccion y forma nobo di conta storia. E tres dianan a mustra cu innovacion den periodismo no ta trata simplemente di adopta e tecnologia mas nobo. E ta trata di sa pakico, con y den ki momento pa uza e tecnologia, y di sigui cuestiona e resultado. Especialmente den un profesion cu ta basa riba verificacion, independencia y responsabilidad publico, etica mester forma parti di cada decision tocante uzo di AI. Cu e seminario y workshopnan aki, RAPP kier crea espacio pa periodistanan topa otro, comparti conocemento, inspira y sostene otro, y sigui desaroya y profesionalisa nan mes. Di e forma ak