Retiro di Mike Eman ta debi ley di HOFA

For di dia cu Mike Eman a anuncia cu pa fin di aña e lo retira como Prome Minister di Aruba, ningun hende no a haya sa e motibo di tras di tal decision. A surgi un cantidad di speculacion, pero te cu awe Mike Eman mes no a bin dilanti pa bisa e motibo. Loke el a declara ta, cu el a yega edad di bai cu pensioen y kier pa lidernan hoben tuma e batuta di partido AVP, maske hopi intento a ser haci pa Mike Eman reconsidera su decision, pero el a bisa no, momento a yega pa bai. Loke nos di Den Noticia a bin haya sa ta, maske Mike Eman mes no kier admiti esaki, t’e hecho cu Mike Eman no kier forma parti di ningun negociacion pa cu HOFA. Vice Prome Minister Gerlien Croes den un declaracion publico a laga sa cu ley di HOFA ta forma parti di e acuerdo di actual Acuerdo di Gobernacion di AVP-FUTURO. Y si no tin tal acuerdo, lo nifica cu no tin Acuerdo di Gobernacion mas, pasobra FUTURO si ta pro HOFA, cu a ser manifesta for di prome cu eleccion. Tabata Mike de Meza, kende a gradici e honor pa bira Minister atrobe, bisando como un di su condicionnan, cu HOFA mester ta for di mesa. No ta cuestion di negocia nada. Y di dos condicion tabata cu Gobierno AVP-FUTURO mester tuma medida contra di Directora di DIMP, Louane Gomez-Pieters, kende a engaña Huez den Corte, alegando cu Mike de Meza no tin ningun debe, a cumpli cu su obligacionnan pa sali di Corte y a entrega un denuncia penal na Ministerio Publico, pa cual Mike de Meza no por a bisa Minister. Finalmente OM a yega na un acuerdo cu Mike de Meza, cu no tin nada penal a tuma lugar y cu Mike de Meza por bira candidato pa bira Minister atrobe. Pero e ta un hecho cu dirigencia di DIMP a “secuestra” un candidato pa un aña y 7 luna. Esaki merece un investigacion profundo y sancion mester cai. Mike de Meza si el a acepta pa bira Minister atrobe, mester a pasa den un screening atrobe. DIMP, cu a entrega un denuncia penal, lo por keda riba mesun punto? Mike de Meza lo keda inministeriable? Bolbiendo bek n’e caso di ley di HOFA, Prome Minister Mike Eman a bisa Mike de Meza cu tin mas persona den AVP ta contra e ley. Mike Eman no a bisa cu un di nan ta su propio persona. Hecho ta cu banda di Mike Eman tin mas miembro den fraccion di AVP cu ta contra e ley, cu te ainda no a yega Parlamento y lo no yega Parlamento prome cu fin di aña. E retiro di Mike Eman tin di haci cu esaki. Mike Eman tambe ta contra ley di HOFA, e no kier forma parti di ningun negociacion. Laga esnan cu a cuminsa traha riba e ley, caba cune tambe y no bente riba un otro Gobierno. Minister di Finansa y Economia, mr. Geoffrey Wever a trata di convence tur hende cu HOFA lo conveni pueblo di Aruba sigur, pero mester trece e cambionan cu a wordo recomenda pa Raad van State (Hulanda) y pa Raad van Advies (Aruba). Unabes cu esey tuma lugar, ley di HOFA lo wordo trata den Parlamento y lo determina si dicho ley lo tin sosten di mayoria of no. De lo contrario HOFA lo wordo bari for di mesa. Kier men Mike Eman cu Mike de Meza ta riba mesun liña pa loke ta HOFA, pero Mike Eman como Prome Minister no tin e curachi pa bise esey publicamente. Ta di spera cu esnan cu ta bai Conferencia di Prensa di Gobierno, tambe tin e curachi pa haci Mike Eman e pregunta aki: Bo ta contra HOFA? Esaki ta motibo di bo retiro como Prome Minister?

Pa prome biaha den 14 aña, Aruba lo importa bestia nobo pa cria, introduciendo genetica nobo cu lo contribui na fortalecemento di cria local y na un produccion mas sostenibel pa nos comunidad. Den preparacion p’e yegada di e bestianan nobo, Santa Rosa lo bende parti di su bestianan existente den un loting cu lo tuma lugar e siman aki. Den preparacion pa yegada di e bestianan nobo, Directie Landbouw, Veeteelt, Visserij en Markthallen (DLVV), mihor conoci como Santa Rosa, ta habri oportunidad pa criadornan local cumpra parti di e bestianan existente. E bestianan cu actualmente ta wordo ofreci pa benta ta porco y padrotnan di cabrito jong-adulto y adulto. E plan di DLVV ta stipula cu e porconan existente y un grupo selecta di cabrito macho lo wordo bendi, mientras cu un grupo selecta di bestia lo keda pa forma parti di e programa di cria renoba. Minister di Finansa, Economia y Sector Primario, Geoffrey Wever, ta invita tur criador interesa y registra na Santa Rosa pa tuma contacto cu DLVV, indica nan interes y registra pa e loting cu lo tuma lugar e siman aki. Segun e procedimiento estableci, cada comprador por cumpra un maximo di dos bestia; e bestia selecta ta wordo pisa, pago ta tuma lugar na caha di DLVV y e comprador ta responsabel pa transporte. Pa por cumpra bestia di DLVV, e interesado mester ta registra como agricultor y/of criador na DLVV-Santa Rosa y cumpli cu e condicionnan estableci pa tene bestia. Criadornan interesa por tuma contacto cu Santa Rosa na 585-8102 y puntra pa sr. Edward Berben of sra. Carola Geerman pa mas informacion tocante e benta y e proceso di loting. Den curso di siman, Minister Wever lo comparti mas informacion tocante e importacion di e bestianan nobo, e genetica nobo y e beneficio cu esaki lo trece pa sector primario di Aruba. Esaki ta stapnan concrete pa fortelece e sector primario p’e bienesta di pais Aruba.

Siman pasa Dialuna, Minister di Husticia, Integracion, Transporte Publico y Energia, mr. drs. Arthur Dowers, a biaha pa Willemstad, Corsou pa hunto cu su coleganan di Husticia Minister Nathalie Tackling di Sint Maarten, Minister Shalten Hato di Corsou y Minister David van Weel di Hulanda dialoga riba diferente aspecto relevante pa husticia y seguridad den Reino.

Durante e siman aki Corsou ta sede di e Justitieel Vierlandenoverleg, cu ta tuma lugar dos bes pa aña na un di e paisnan participante. E reunionnan aki ta momentonan importante p’e 4 paisnan den Reino dialoga y trata diferente tema relaciona cu husticia y seguridad cu ta di importancia pa cada pais, pero tambe pa Reino completo.

Ademas di e mandatarionan di husticia, ehecutivonan den e cadena hudicial di cada pais ta bin hunto pa atende cu aspectonan huridico cu ta afecta cada pais individualmente, pero tambe cu aspectonan cu tin un impacto colectivo den Reino.

Durante e reunion ta intercambia informacion y experencia entre Aruba, Corsou, Sint Maarten y Hulanda, mientras ta trata diferente tema cu tin relacion cu e desaroyo di husticia y seguridad den e paisnan. E participacion di Aruba den e Justitieel Vierlandenoverleg ta brinda un oportunidad pa Minister Dowers hunto cu su coleganan di e otro paisnan sigui dialoga riba temanan di interes comun y busca manera pa fortalece e cooperacion den e area di husticia y seguridad den Reino.

Durante su bishita na Corsou relaciona cu e Justitieel Vierlandenoverleg, Minister di Husticia, mr. drs. Arthur Dowers, a tene un encuentro cu e.o Gobernador di Corsou, e Arubiano, mr. Mauritsz de Kort y a topa cu Presidente di Corte Comun di Husticia, mr. Sigmar Carmelia. Durante e encuentro aki, a hiba dialogo habri y ameno cu Presidente di Corte Comun den compania di Martin Luttge, Director di Operacion y Kyra de Koeijer, Secretario di e Hunto di Corte Comun. Minister Dowers ta considera e contacto y dialogo cu diferente instancia dentro di e cadena di husticia importante pa mantene un bon relacion institucional y cooperacion entre diferente actor.

Minister di Finansa, Asunto Economico y Sector Primario mr. Geoffrey Wever a informa cu Presupuesto 2027 a wordo entrega na Parlamento, na tempo manera stipula den ley. Banda di entrega e presupuesto na tempo, Presupuesto 2027 ta cumpli cu e normanan di presupuesto ancra den ley, ta mantene finansa publico den control y ta crea espacio pa sigui duna e beneficio di desaroyo economico bek na comunidad. Presupuesto 2027 ta proyecta un surplus di Afl. 84,1 miyon pa Pais Aruba, equivalente na 1% di Producto Interno Bruto. Na nivel di sector colectivo, ta proyecta un surplus di mas cu Afl. 203 miyon, equivalente na 2,4% di Producto Interno Bruto. College Aruba financieel toezicht (CAft) a evalua e ontwerp-begroting 2027 positivamente y a conclui cu e presupuesto ta cumpli tanto na nivel di Pais como na nivel di sector colectivo cu e normanan financiero ancra den ley. Prioridad di maneho di Gabinete AVP-FUTURO ta un finansa publico duradero segun normanan di presupuesto stipula den ley y duna e beneficio di e desaroyo economico bek na comunidad. Presupuesto 2027 tin como punto di salida ehecucion di Programa di Gobernacion 2025-2028 como fundeshi di e esfuerso colectivo na beneficio di desaroyo di tur hende. E Presupuesto 2027 ta refleho di compromiso di Gabinete AVP-FUTURO pa sigui usa presupuesto di Pais Aruba como instrumento strategico di maneho pa desaroyo di Aruba. E perspectivanan economico pa 2027 ta positivo. Departamento di Asunto Economico, Comercio y Industria ta proyecta un crecemento nominal di economia di 4,1% pa 2027, cu Producto Interno Bruto proyecta na aproximadamente Afl. 8,4 mil miyon. Inversionnan ta proyecta como e motor principal di crecemento, mientras cu consumo priva, exportacion y actividad economico tambe ta sigui contribui na desaroyo di economia. E Presupuesto 2027 ta continua tambe cu e principio di duna e beneficio di e desaroyo economico bek na comunidad. Den e presupuesto tin fondonan pa e compromiso di Gobierno relaciona cu pension y Reparatietoeslag, mientras cu maneho economico ta sigui enfoca riba mehoracion di poder di compra, stimula actividad empresarial y crea mas oportunidad economico. Na mes momento, Gabinete AVP-FUTURO ta sigui traha riba un economia mas diversifica y menos dependiente di un solo sector. Presupuesto 2027 ta sostene e vision pa desaroya sector economico nobo y fortalece esnan existente, entre otro agricultura y Sector Primario, economia blauw, fintech, energia renovabel y industria creativo. Tambe ta inclui como prioridad e revitalisacion di Oranjestad y San Nicolas como centronan economico, stimula emprendemento, facilita inversion y mehora acceso na financiamento. Aña 2027 ta marca tambe un siguiente paso den modernisacion di manera cu Gobierno ta prepara y controla presupuesto. Gabinete AVP-FUTURO ta introduci gradualmente un sistema di policy-based budgeting, caminda placa publico ta wordo conecta mas directamente cu prioridadnan di maneho y resultado cu Gobierno kier logra. E meta ta pa presupuesto no ta solamente un lista di entrada y gasto, pero un instrumento cu ta mustra unda placa publico ta bay, kico Gobierno kier logra cu e placa ey y cua resultado comunidad por spera. E proyecto policy-based budgeting ta un proyecto cu sosten financiero di Hulanda por medio di Landspakket. Minister Geoffrey Wever ta gradici Hulanda pa nan sosten den e proyecto importante aki. Ademas, Gobierno ta sigui fortalece control riba riesgonan financiero, inversionnan publico y ehecucion di presupuesto. Cu introduccion di instrumento manera Fiscal Risk Assessment Tool y e preparacion di un agenda di inversion multianual relaciona cu Algemeen Investerings- en Ontwikkelingsfonds, Gobierno ta crea mas structura, transparencia y control riba uzo di fondonan publico. Cu entrega di Presupuesto 2027, Gabinete AVP-FUTURO ta cumpli un biaha mas cu e proceso legal, ta cumpli cu e normanan di presupuesto y ta sigui fortalece e fundeshi financiero di Pais Aruba.

Mundo ta cambiando na un ritmo rapido. Inteligencia artificial, digitalisacion, reto di clima y e incertidumbre global ta redefini totalmente e forma con nos ta biba, traha y siña. Pa responde n’e realidad aki na un manera strategico, a nace Learning Cities Aruba, un iniciativa nacional conecta cu e Red Global di Ciudadnan di Enseñansa di UNESCO. Esaki no ta simplemente un proyecto mas; esaki ta un transformacion di nos sistema di educacion. E meta ta pa crea un cultura di siñamento continuo y inclusivo cu ta yega na tur skina di nos sociedad atraves di tayer, curso y actividadnan practico den tur bario rond di Aruba. E proyecto aki ta lo consistiti di un red di colaborador cu ta haci e diferencia. E colaboracion lo ta entre otro cu Universidad di Aruba y IPA, na vanguardia di investigacion, educacion pa adulto y e formacion continuo di nos docente y lidernan educativo. Tambe lo traha cu Tienda di Educacion, kende ta brinda apoyo y recurso educativo directamente den e barionan p’esnan cu mas mester di dje. Finalmente nos lo tin expertonan local y internacional den temanan clave manera multilinguismo, inclusion den Caribe, design thinking y AI. E iniciativa ta un invitacion habri pa tur sector di e comunidad, reconociendo cu e mihor recurso di Aruba ta su mesun hende. Ministerio di Educacion ta enfatisa cu e sociedad y compromiso cu educacion cu nos ta traha hunto lo t’e fundeshi di tur locual Aruba ta aspira pa logra. Individuonan cu ta enfoca den maneho (policymakers), lidernan educativo, organisacionnan comunitario y partnernan internacional ta wordo yama pa uni forsa y co-crea e plataforma nacional aki cu lo posiciona Aruba como un modelo regional di enseñansa, innovacion y resiliencia.

Den cuadro di celebracion di Dia di Prensa, RAPP, e Red Arubiano di Prensa Profesional conhuntamente cu Vertegenwoordiging van Nederland in Oranjestad VNO, a tene un brindis. Vincent Storimans, kende ta representante di Hulanda na Aruba, a bisa cu e ta contento di mira cu diferente instancia na Aruba a para keto n’e Dia di Prensa y e trabou cu periodistanan ta eherce, ya cu un estado di derecho democratico solamente por funciona cu un prensa liber, independiente y critico cu ta controla e podernan na un forma profesional. Ya ta dos aña cu RAPP a wordo funda cu e meta pa uni prensa y enforsa desaroyo di e periodistanan. E trabou di prensa ta importante y VNO ta sostene RAPP den su meta pa sigui uni y profesionalisa periodistanan por medio di training y otro formanan di educacion. Melissa Stamper kende ta Presidente y un di e fundadornan di RAPP, a gradici VNO pa a organisa e brindis conhuntamente cu RAPP y alabes tambe pa nan sosten di momento cu a funda RAPP na 2024. Pa RAPP ta importante pa prensa por organisa su mes como profesionalnan. Alabes Melissa Stamper a menciona cu en conexion cu Dia di Prensa, RAPP ta organisando pa di tres bes e Caribbean Journalism Seminar di cual e topico lo ta ‘AI & Innovations’. E oradornan international lo papia riba AI & Ethics, Vibe Coding in the Newsroom y Claude for Journalists. E workshopnan lo ta over AI Essentials for Journalists y Vibe Coding in practice. Entrada ta gratis pa tur periodista y nan lo por atende e workshopnan tambe. Na mes momento no por keda sin menciona cu RAPP ta bay estrena su Podcast: ‘Prensa den Close Up’ den luna di September via medionan social.

Parlamentario Otami Thomasia di AVP a haci un yamada pa Aruba establece un marco nacional di curriculum cu ta garantisa cu cada alumno, na cada scol, haya un base comun di conocemento tocante historia, cultura, identidad, ciudadania y sostenibilidad di nos pais. Segun Thomasia, mientras Aruba ta papia di reforma di enseñansa, idioma, tecnologia y preparacion pa mercado laboral, tin un pregunta fundamental cu merece contesta: Kico un mucha Arubiano mester sa di Aruba prome cu e gradua? “Nos muchanan ta prepara pa drenta mundo, pero prome nos mester sigura cu nan conoce e pais cu nan ta yama cas,” Thomasia a expresa. Aruba ta un sociedad multi-cultural y esaki ta representa un di su mayor fortalezanan. Sinembargo, pa cultiva un sentido fuerte di identidad y pertenencia, alumnonan mester conoce e historia y procesonan cu a forma nos isla. Esaki ta inclui conocemento tocante nos pueblo indigena, sclavitud y emancipacion, migracion, desaroyo democratico, prome eleccionnan, derecho di voto di hende muher, Status Aparte, Lago y refineria, crecemento di San Nicolas y e manera cu turismo a bira un pilar fundamental di nos economia. Dia 23 di augustus 2026, e exposicion “NOS: Where Past and Present Meet – Heroenan di Libertad”, presenta na Archivo Nacional Aruba, a bolbe mustra e rikeza di historia conserva den nos archivonan y memoria colectivo. Segun Otami Thomasia, e exposicion no a crea e idea aki, pero a recorda comunidad cu hopi di e historia ainda no ta suficientemente presente den nos klasnan. “Cada aña cu nos pospone esaki ta un oportunidad perdi pa un otro generacion. Nos no por permiti cu conocemento di nos propio pais keda limita na archivo, museo of memoria di algun persona. E mester yega sistematicamente cerca nos muchanan,” e Parlamentario a enfatisa. Thomasia a señala cu e marco legal di Aruba ya ta ofrece un base pa avansa den e direccion aki. Articulo I.20 di Staatsregeling van Aruba ta reconoce enseñansa como un responsabilidad continuo di Gobierno. Articulo 7 di Landsverordening basisonderwijs ta inclui, e.o., historia, geografia, naturalesa, musica, formacion social y Papiamento, mientras articulonan 12 y 13 ta trata e leerplan y contenido educativo. P’esey, segun Thomasia, e pregunta no ta si historia y cultura di Aruba tin un lugar den enseñansa. “E pregunta cu nos mester haci ta: Ki Aruba nos ta siña nos muchanan?” E Parlamentario ta propone pa traha riba un marco nacional di curriculum pa historia, cultura, identidad, ciudadania y sostenibilidad. E marco aki lo establece un base comun di conocemento cu cada alumno, den cada scol, mester ricibi. E intencion no ta pa limita creatividad of libertad profesional di maestro. Al contrario, ta pa brinda un guia comun y garantisa cu conocemento di Aruba no ta depende exclusivamente di e scol cu un mucha ta bishita of e maestro cu e ta haya dilanti di klas. Otami Thomasia ta visualisa un forma dinamico y creativo pa ofrece e contenido. Entre e posibilidadnan tin competencia entre scol, storytelling, debate, proyecto di bario, entrevista cu grandinan, bishita na Archivo Nacional y museonan, musica, teatro y contenido digital. Ora diferente scol ta traha riba e mesun temanan nacional, e combersacion no ta keda limita na klas. E por drenta cas, bario y comunidad, creando un intercambio entre generacionnan y un apreciacion mas profundo pa Aruba. E propuesta ta conecta tambe cu Plan Educacion Nacional 2030 y cu e metanan internacional di desaroyo sostenibel. SDG 4.7 ta promove educacion pa ciudadania, sostenibilidad y apreciacion di diversidad cultural, mientras SDG 11.4 ta enfoca riba proteccion di patrimonio cultural y natural. “Nos no ta busca pa biba den pasado. Nos ta busca pa comprende pasado, pa forma presente y prepara futuro,” Thomasia a declara. E Parlamentario a agrega cu no mester mira conocemento di Aruba como un topico adicional of secundario den enseñansa. E ta un instrumento pa fortalece identidad, participacion democratico, responsabilidad social y proteccion di nos patrimonio cultural y natural. Ora hobennan Arubiano sali pa studia, traha of representa nos pais den exterior, nan mester por conta mundo unda nan ta bin for di dje. Nan mester conoce mas cu nos playanan; nan mester conoce e lucha, sacrificio, cultura, diversidad y historia cu a forma Aruba. Prome cu nos muchanan sali pa mundo, nan mester conoce cas. Nos no por pidi un generacion proteha un Aruba cu nos nunca a siña nan comprende. Awor ta tempo pa Aruba siña Aruba, Parlamentario Otami Thomasia a conclui.

Na ocasion di apertura oficial di Aña Plamentario nobo, cu ta mayan, Parlamentario di AVP, ing. Carlos Bermudez, ta haci un evaluacion di su trabou durante e periodo pasa y ta reafirma su compromiso pa sigui transforma e preocupacionnan di pueblo den pregunta oficial, mocion y solucion concreto. Durante e periodo parlamentario anterior, Bermudez a mantene contacto directo cu ciudadanonan, empresario y residentenan di diferente bario. E preocupacionnan comparti cu ne a wordo traduci den accion parlamentario y acercamento cu e Ministernan y instancianan concerni. Un di e temanan cu a haya mas atencion ta transporte. Bermudez a insisti riba actualisacion di tarifanan di taxi, mas transparencia pa pasahero y proteccion di e taxistanan cu ta cumpli cu ley. Publicacion di e lista di prijs nobo y introduccion di Taxi.aw ta pasonan positivo, despues di ocho aña sin actualisacion, pero, segun e Parlamentario, e trabou no ta cla ainda. E problematica di taxi y operator pirata lo ta un di su prioridadnan principal den e Aña Parlamentario nobo. Actividad ilegal ta crea competencia inhusto, pone seguridad di pasahero na riesgo y ta perhudica esnan cu a inverti den un vergunning y ta cumpli cu tur condicion legal. Modernisacion ta necesario, pero e mester bay man den man cu informacion, dialogo, control y respet p’e personanan cu ta depende di e sector pa gana nan pan, Bermudez a expresa. Otro tema central durante e periodo anterior tabata dignidad y proteccion di trahadornan. Despues di ricibi decenas di señal tocante intimidacion, trato desigual, abuso di poder, pago incorecto, falta di oportunidad pa promocion y posible mal-cumplimento di leynan laboral den sector hotelero, Carlos Bermudez a solicita un plan urgente di inspeccion. E plan lo keda un punto principal den e Aña Parlamentario nobo, cu enfoke riba control efectivo na pia di trabou, cumplimento cu leynan laboral, proteccion contra abuso y un canal anonimo pa empleado por reporta situacion sin miedo pa represaya. Infrastructura y calidad di bida den bario a forma otro parti importante di su trabou. Bermudez a solicita un plan multianual cu DOW pa inventarisa peticionnan pendiente pa asfalt, sleeping police, limpiesa y snoei, y informa comunidad ki tempo nan por spera accion. P’e Parlamentario, asfalt no ta un luho, ya cu stof, lodo y camindanan den mal estado tin impacto directo riba salud, seguridad y condicion di vehiculo. Ademas, el a presenta un mocion, aproba unanimamente, pa inicia estudio pa transforma e cruzada di Palm Beach–Caya Nelson Florencio Sprok den un rotonde moderno y sigur. Tambe el a presenta pregunta oficial tocante e estado deplorabel di e caminda entre rotonde di Super Food y Palm Beach. Un otro caso cu a haya su atencion t’e brug di Rooi Afo, cu ta sera desde februari 2025 y ta causa inconveniencia pa residente, automobilista y negoshinan den e area. Bermudez a acerca Minister di Infrastructura y DOW, y a presenta un mocion pa pidi atencion urgente, alocacion di fondo y seguimiento di e projectdossier necesario pa logra reapertura di e brug. Un Aña Parlamentario nobo no ta nifica cu nos ta cuminsa for di sero. E ta nifica cu nos mester sigui unda nos a keda, acerca e Ministernan concerni, exigi contesta y verifica cu plan y promesa ta bira accion, Bermudez a enfatisa. Den un segundo comunicado, Parlamentario Bermudez lo amplia riba otro temanan cu a forma parti di su trabou, incluyendo acceso liber na beach y palapanan, proteccion di naturaleza, sector di piscamento, diversificacion economico, salud y preparacion di Aruba pa futuro.