Siman pasa tabatin un reunión di Comision di Trabao di Parlamento, cu participación di tur partio político, unda a delibera cu e gremionan di dunador di trabao, manera CUA, ATIA, pero a invita tambe AHATA, Camara di Comercio y SNBA y cu e parti di e gremionan sindical. Manera ta conocí Prome Minister Mike Eman a laga sa caba su posición cu su intención ta cu salario mínimo mester conoce un aumento te ora cu yega n’e bestaansminimum, cuminsando januari awor cu 200 florin pa luna. For di momento cu esaki a keda anuncia, por conclui cu tur gremio, comercial y sindical ta di acuerdo cu e opinión aki, pero no asi no mas ta djies aumenta e salario mínimo. Mike Eman a admiti cu mayoria participante ta di acuerdo, pero a laga sa cu esaki mester tuma lugar den forma responsable y cu msster scucha e gremionan. E ex líder y ex Mediador di Gobierno, Anselmo Pontilius tabata ma directo bisando pa aumenta salario mínimo na januari 2027, mientras lo sigui dialoga cu tur esnan conerni pa finalmente logra un consensus. Lider di MEP, mr. Evelyn Wever Croes a bisa cu durante MEP su gobernacion, tur aña tabtin aumento di salario mínimo. Kier men lo sostene sigur un aumento di salario mínimo, pero e forma cu Mike Eman kier haci’e te awe Parlamento no a haya ningún clase di documento na studia. Siendo ta di spera cu un cambio asina mester di un sosten unánime. E líder di MEP a pidi pa Parlamento convoca un reunión publico, invitando Mike Eman como Geoffrey Wever pa bin splica con e aumento aki y esnan den futuro lo tuma lugar. Y alabes entrega tur documento, splicando meta di Gobierno. Por lo pronto MEP su fracción lo abstene di vota. Parlamentario di AVP, John Hart, tambe a pidi un debate den Parlamento pa aumenta salario minimo gradualmente te na nivel di bestaansminimum, e entrada necesario pa cubri necesidadnan basico. Segun Hart, actualmente tin un diferencia di casi Afl. 700 pa luna entre e dos nivelnan, cu ta afecta aproximadamente 20.000 trahador na Aruba. Den Staten por sinti cu tur fraccion ta di acuerdo cu un aumento mester bay acompaña di medidanan di sosten pa empresanan, pa evita cu nan carga financiero bira demasiado pisa. A pidi Minister di Labor, Wendrick Cecilia claridad tocante e preparacion, posibel compensacion pa comercio y e cambionan legal necesario. Meta ta pa tur trahador por gana un salario cu ta permitie biba cu dignidad, ta opinion di mayoria den Parlamento. Manera ta conoci, Prome Minister Mike Eman ta na Hulanda y no tin intencion bi bolbe awor, loke ta haci dificil cu e por ta presente pa presenta su proposicion. Kico lo pasa dianan benidero ta interesante pa sigui, unda claramente por mira cu bao di propio partidonan di coalision tin diferencia di opinion, hasta den propio partido AVP.

Tabata diamars ultimo cu Parlamentario di AVP, ing. Mike de Meza, hunto cu su esposa a entrega un denuncia y keho penal contra Director di Departamento di Impuesto (DIMP), mr. Luenne Gomez-Pieters. Pareha de Meza Every a acusa e Director di a presenta un denuncia falso y calumnioso cu, segun nan, a daña nan bon nomber y a obstaculisa su nombramento como Minister.

Su abogado, mr. Desiree Croes, a precisa cu e keho ta trata di lasterlijke aanklacht, valse aangifte y lasterlijke verdachtmaking: Un acusacion calumnioso, denuncia falso y accionnan pa pone un persona falsamente bou di sospecho di un delito. Mester bia cu e denuncia haci ta masha bon documenta y sigur ta bira uno interesante pa sigui pa determina kico lo bira e resultado. Pa Mike de Meza, e paso tuma t’e cuminsamento di un lucha pa responsabilisa esnan cu, segun e, a atacha su integridad y esun di su casa. Tur hende cu a haci nan malo, tin cu paga pe, Mike de Meza a laga sa. Kibrando silencio, Mike de Meza a expresa un decepcion profundo pa cu e actitud di su mesun coleganan politico. Segun e Parlamentario, Minister Presidente Mike Eman y Minister di Husticia Arthur Dowers a mantene un distancia grandi durante e periodo cu e y su casa tabata enfrenta e acusacionnan. E ta reprocha nan cu, hasta despues di e acuerdo cu Ministerio Publico, nan a opta pa keda keto. Pero Asia mes, recientemente Dowers tabatin un reunión cu de Meza pa algún ora.

Pa de Meza, e silencio ey ta doloroso. E ta sinti cu el a enfrenta e lucha pa su bon nomber y integridad practicamente su so. Pa ilustra su sentimentonan, e ta referi n’e pensamento di Martin Luther King Jr. tocante e dolor cu silencio di amigonan por causa, mas aya di e desordo di enemigonan. Den e keho penal haci, Mike de Meza y Brigitte Every a solicita pa Landsrecherche investiga e actuacion di e Director di DIMP, bou di supervision di un Fiscal cu no tabata involucra anteriormente den e caso contra nan. Nan ta pidi pa sigura e dosier completo di e denuncia original y verifica cua documentonan e Director a entrega na Ministerio Publico y cua el a laga afo. Tambe nan ta solicita investigacion di corespondencia y mensahenan relevante y pa tende e personanan involucra. E pareha ta reserva su derecho pa reclama compensacion pa daño y pa inicia un procedimiento civil. Mike de Meza a sa cu p’e, e asunto no a termina cu e acuerdo cu Ministerio Publico. E ta considera cu e acusacionnan a afecta su famia, su reputacion y su futuro politico. “Tur hende cu a haci malo na mi y mi casa lo mester paga p’e”, e ta expresa. Segun e parlamentario, a purba atacha e bon nomber y integridad di ambos y e no tin intencion di laga esey pasa sin consecuencia. Dia Director di DIMP a entrega keho, a haci Mike de Meza un sospechoso. Den caso cu Gomez-Pieters bira un sospechoso oficial, automaticamente Minister Geoffrey Wever lo mester prohibi su entrada na tur oficina di Gobierno pa por garantisa integridad di un investigacion husto.

Colegio di supervision financiero di Aruba (CAft) a conseha Gobierno di Aruba pa haci un escogencia fundamental tocante di e futuro di turismo y pa incorpora e escogencia aki integralmente den e presupuesto, e agenda multianual di inversion y e regulacionnan fiscal. E economia di Aruba t’asina entrelasa cu turismo cu e escogencia aki lo afecta tur Minister. Turismo t’e motor principal di crecemento economico, pero na mes momento e t’e riesgo di mas grandi pa e sostenibilidad di finanza publico.

Situacion financiero economico Desde un perspectiva economico, Aruba ainda ta bayendo bon, aunke e crecemento ta nivelando despues di varios aña di recuperacion fuerte di turismo. E ultimo añanan, e ratio di debe di e sector colectivo a baha fuertemente te 64 porciento na 2025. E resultado di explotacion y e resultado di e pais ta keda positivo. Aruba ta sumamente vulnerabel pa shocknan economico; na aña 2020, por ehemplo, Aruba tabata un di e economianan mas afecta. E situacion economico mundial incierto y e embehecimento di poblacion t’e riesgonan principal pa finanza publico.

Turismo: Motor y Riesgo Pa hopi aña caba, turismo t’e motor principal di e economia di Aruba. E ultimo 20 aña, e actividad turistico practicamente a dobla. Crecemento continua di e cantidad di turista ta yegando na limitenan, limitenan cu por percibi caba. Tin un deficit structural riba mercado laboral, e sector di utilidad ta yegando na su limite di capacidad, tin tur biaha mas aglomeracion den trafico, y mas y mas presion riba e mercado di bibienda. E obstaculo no t’e falta di plannan, sino e implementacion di e plannan aki. CAft ta enfatisa cu considerando e espacio financiero actual, awor t’e momento pa inverti y reforma. Precisamente awor cu e presion riba finanza publico ainda ta limita.

Scoge direccion CAft ta subraya e importancia pa Aruba di haci escogencianan awor. Si e enfoke ta riba atraccion di mas bishitante, e presion di turismo riba e pais ta aumenta ainda mas, mientras si ta enfoca riba e balor pa bishitante y diversificacion di e economia, por cera e brecha entre crecemento turistico y crecemento di prosperidad. Den e marco ey, Tourism 3.0 ta un inicio balioso di e discusion social. Establecimento di institucionnan nobo pa duna forma na e maneho di turismo por obstaculisa maneho di turismo eficaz. Establecimento di fondonan nobo alimenta pa impuestonan aloca por conduci na fragmentacion di gastonan publico. Recientemente, Aruba a inicia e regulacion di acomodacionnan short stay. CAft ta consciente di e importancia di regulacion eficaz y enforsamento riba e area di maneho aki, y ta conseha pa duna mas forma n’esaki. Hunto cu IMF, Aruba ta explorando e re-emplaso di BBO pa un sistema di btw. E implementacion di un sistema di btw lo contribui n’e ampliacion di e base pa inclui e sector informal.

Banco Central di Aruba (BCA), di 12 te cu 18 di october 2026, a participa n’e reunionnan anual di Fondo Monetario Internacional (IMF) y di Banco Mundial (World Bank Group) na Bangkok, Tailandia. BCA tabata representa pa Presidente Thomas Domhoff, Director Ehecutivo Miriam Gonzalez y Division Manager Penélope Tromp-Gomez. Banda di e encuentronan oficial cu IMF y Banco Mundial, e delegacion a forma parti di e reunion di Group of Thirty (G30), di e Forum pa Estado Chikito (Small State Forums) y di encuentro regional cu diferente banco central di Latino-America y di Caribe, entre nan e red CEMLA. E reunionnan aki a duna Banco Central di Aruba e espacio pa sigui e desaroyonan internacional for di un fase tempran, intercambia experiencia y adkiri informacion pa loke ta maneho monetario, supervision financiero, sistema di pago y e stabilidad di e structura financiero di Aruba.

Durante e combersacionnan regional, e prijsnan di e costo di bida den aumento y desaroyo den e mercado di vivienda na destinacion turistico a bin padilanti. Economia di isla chikito ta fuertemente dependiente di importacion di producto, cual ta causa cu prijs di energia, transporte y comestibel internacional ta practicamente directamente inclui den e prijsnan di e necesidadnan di bida diario. Inversion di exterior den propiedad ta sostene e economia, pero tambe por percura p’e prijsnan di vivienda y tereno subi.

P’e motibo aki, varios pais ta busca un balans entre e atraccion di inversion y e accesibilidad n’e mercado di vivienda. Aunke e maneho di e mercado di vivienda no ta bou encargo di Banco Central di Aruba, e desaroyonan aki por tin consecuencia p’e pronosticonan economico y e stabilidad financiero.

Inteligencia Artificial (IA) tabata un di e topiconan cu mas a destaca. Riba termino cortico, e ola di inversion mundial den centro di dato, energia y infrastructura digital por conduci na presion di prijs. Riba termino largo, Inteligencia Artificial por aumenta productividad considerablemente. Banconan Central mester haci un distincion entre e efectonan temporal y structural aki cuidadosamente. Banda di esey, IA ta ofrece Banconan Central mas chikito oportunidad pa ehecuta analisis y supervision economico na un manera mas eficiente. Na mes momento, e uzo di Inteligencia Artificial dor di entidad financiero ta pidi pa pone atencion na confiansa, transparencia y dependencia di proveedo di tecnologia externo.

Un tema recurente tabata resiliencia: E capacidad pa recupera rapidamente despues di un obstaculo grave, manera un atake cibernetico of un interupcion di cadena di suministro. Pa economia chikito cu capacidad tecnico limita, colaboracion entre Gobierno, sector financiero, compania di servicio publico y otro organisacion vital ta esencial. E colaboracion den Reino y cu partner internacional por yuda comparti conocemento, capacidad y costo di inversion, e.o. p’e continuidad di transaccion di pago.

Kico esaki ta nifica pa Aruba? “Bangkok a confirma cu un economia fuerte mester mas cu solamente crece,” Presidente Thomas Domhoff a indica. “Ta trata aki di crecemento inclusivo di cual tur habitante di Aruba por gana, di uzo responsabel di inovacion tecnologico y crea suficiente resiliencia pa por absorbe impacto inespera. Esaki ta un tarea comun p’e añanan benidero.” Banco Central di Aruba lo incorpora e informacion ricibi den e desaroyo di su trabou di supervision, e confiansa den transaccion di pago, su analisisnan economico y e cooperacion cu partner nacional y internacional.

Nos estado di derecho democrático ta bao di presion creciente pa motibo di criminalidad, desinformacion, cambionan di poder político, y confiansa público den Gobièrno cu ta baha. Procurador General di Aruba, mr. Amalin Flanegin a adverti di esaki durante instalacion di mr. Sigmar Carmelia como Presidente nobo di Corte Comun di Husticia na Corsou. Segun e PG, protehá nos estado di derecho no ta solamente un responsabilidad di Huesnan Ministerio Público, pero tambe di Gobièrno, ciudadano, negoshinan, y prensa. Den su discurso, Flanegin a delineá un sociedad den cua problema ta reforsá otro. El a mustra riba aumento di violencia cu arma, problemanan creciente den cuido di salud mental, y capacidad insuficiente denter di servicio di Gobièrno, incluyendo organisacionnan denter di e cadena di husticia.

Segun e Procurador General, esaki por conduci cu ciudadanonan ta sinti nan mes yuda inadecuadamente of trata inhustamente. E consecuencia ta cu confiansa den Gobierno y estado di derecho ta bin bou di presion. Un parti signifikante di su discurso a enfoká riba e separacion di podernan. Den un òrdo hurídico democrático, Gobièrno, Parlamento y poder hudicial ta tene otro den balansa. Ciudadanonan mester por laga un Huez independiente revisa decisionnan di Gobierno. Amalin Flanegin a advertí cu e balansa aki no ta un dato mas internacionalmente. Como ehèmpel, el a referí na Merca, caminda, segun e, e programa político Proyecto 2025 tin como meta pa duna e poder ehecutivo mas influencia relacioná cu e poder legislativo y hudicial. E PG a pone e desaroyo ey denter di un discusion mas amplio tocante e funcionamento di institucionnan democrático y e importancia di un poder hudicial independiente. Su mensahe tabata cu no solamente ciudadanonan mester atené nan mes n’e norma y na balornan di e estado di derecho democrático, pero e Gobièrno mes tambe. Haciendo esaki, el a pone e responsabilidad pa mantené e estado di derecho serca tur ramo di Gobièrno y sociedad den su totalidad.

Flanegin a enfatisá cu un òrdo hurídico democrático no ta consistí solamente di leynan, eleccionnan y institucionnan. E ta trata tambe di e balornan riba kua nan ta basá, manera igualdad hurídico, husticia, y rèspèt pa diferente punto di bista.

Relaciona cu esaki mr. Amalin Flanegin a referi n'e trabou di e ex Vice-Presidente Hulandes di Conseho di Estado, Herman Tjeenk Willink. Su mensahe tabata cu no solamente ciudadanonan mester atené nan mes na norma y balornan di e òrdo hurídico democrático, pero e Gobièrno mes tambe.

Procurador General, mr. Amalin Flanegin durante instalacion di Presidente nobo di Corte Comun di Husticia, mr. Sigmar Carmelia, a expresa su preocupacion pa loke ta trata di plamamento di malinformacion y desinformacion. Segun e, institutonan hudicial y otro institutonan ta wòrdo atacá mas y mas sin cu ningun discusion substancial ta tuma lugar. El’a referi, entre otro, na atakenan riba institutonan internacional manera Corte Penal Internacional, pero tambe localmente. Di acuerdo cu Flanegin, e ripiticion constante di informacion falso por crea un situacion den cua e bèrdad factual ta bai den fondo y convicionnan personal ta wòrdo presentá como hechonan. El a advertí cu e tipo di desaroyonan ey por tin consecuencia tambe p’e futuro di e poder hudicial. Profesionalnan hurídico hóben por wòrdo descurashá di bira Hues òf Fiscal público debí n’e atakenan continuo riba institutonan hudicial. Segun e PG di Aruba, esaki ta un riesgo particular riba e islanan relativamente chikito di Caribe, caminda atraé y retené profesionalnan hurídico calificá ta forma un reto significante. Amalin Flanegin a concluí su discurso cu un yamada na sociedad den su totalidad pa protehá defendé e òrdo hurídico democrático. Segun e, Huesnan y Ministerio Publico no por carga e responsabilidad ey nan so. Político, administrador, organisacionnan social, compania, periodista y ciudadanonan tambe tin un ròl den esaki. Mester reconoce cu esaki ta ultimo discurso tambe I PG mr. Amalin Flanegin, ya cu fin di aña e ta baha cu pensioen y sigur e tabata blanco di critica inhusto, eherciendo su funcion.

Recientemente a yega na nos oído cu e edificio di Sun Plaza, cu un tempo tabata e oficina principal di Sun Development, encabeza pa Raymond Maduro, desaroyador di varios proyecto di time-share na Aruba, ser bendi cu Caribbean Mercantile Bank. Manera menciona e edificio aki tabata Head Office di Sun Development, cu tabati e piso mas riba y e demás espacionan, tabata na huur, e.o. cu Gobierno. Durante tempo e accionistanan a bende e edificio aki, te cu awor a ser cumpra dor di Caribbean Mercantile Bank, cu tambe a cuminsa sali di centro di Playa, cu tabata e Oficina Principal di CMB. E banco asina a habri un sucursal grandi na Noord, a habri otro na Hyatt Place na Aeropuerto y tin mas sucursal p.e. na Santa Cruz y San Nicolas, pero tin varios otro oficina aki-aya. Cuanto CMB a paga p’e edificio di Sun Plaza no ta conocí pa nos, pero sigur e ta core den algún millón florin. Extraoficialmente nos por a comprende cu e banco kier converti Sun Plaza den su Head Office, mientras pa loke t’e edificionan di e otro surcusalnan, lo conoce ampliación, mescos tambe nan oficina den Oranjestad, unda lo trece tur otro oficinanan cu CMB tin aki-aya, lo keda centralisa. Ta ser menciona cu e edificio den Caya Betico Croes lo ser amplia tambe cu otro facilidadnan. CMB mes lo anuncia su plannan próximamente. Loke hopi hende ta lamenta ta, cu tur banco, si tur banco cu tabatin nan oficina principal den centro di Oranjestad, a muda pafo di Playa. E único banco comercial cu a keda ta Banco di Caribe na rand di Oranjestad, cu manera ta conocí AIB-Bank a cumpra. Kier men tin hopi plan lo bai tuma lugar, y den nan remodelación y/of reconstrucción di Oficinanann obo di p.e. pa Caribbean Mercantile Bank.

E discusion pa mara salario minimo na bestaansminimum mester tene cuenta cu e realidad di trahadornan cu no ta logra yega fin di luna, pero tambe cu e gastonan cu doñonan di trabou ta enfrenta. Ex-Mediador di Gobierno y ex-lider sindical Anselmo Pontilius a expresa e punto di bista aki durante un entrevista cu Enfoke, den cual el a propone pa combina un aumento salarial cu un reduccion den e contribucion di ganashi, conoci como Winstbelasting.

P’esey, e debate riba si e salario minimo ta suficiente mester tene cuenta cu e diferencianan entre funcion y sectornan. Un entrada adicional cu algun trahador ta ricibi no ta refleha automaticamente e realidad di tur esnan cu ta gana e salario minimo. Ora di reacciona riba e posibilidad di un aumento di Afl. 200 desde dia 1 di januari 2027, Pontilius a propone pa revisa alabes e carga cu tin riba doño di trabou. Concretamente, el a menciona un reduccion di entre un y un punto y mey porcentual den Winstbelasting pa 2027. Su idea ta pa duna empresa un alivio cu por contribui na absorbe e aumento den gasto salarial. Pontilius a indica cu e debate ta bay mas leu cu solamente aumenta un suma riba papel. E pregunta central ta cuanto un trahador por cumpra cu su salario y si su entrada ta suficiente pa cubri su necesidadnan basico. Segun e, cada biaha mas famia ta enfrenta dificultad pa paga nan gastonan mensual. E realidad aki, particularmente entre personanan cu ta gana salario minimo, ta exigi atencion di Gobierno y di e instancianan cu ta atende asuntonan social. Anselmo Pontilius a splica cu e aumento den costo di bida a reduci gradualmente e poder di compra di trahadornan. El a menciona cuminda, awa, coriente y transporte como gastonan cu ta absorbe un parti importante di e entrada di un hogar. El a recorda cu den pasado un famia por a cumpra mas producto cu e placa cu e tabatin disponibel. Cu e pasonan di aña, e cantidad cu por hiba cas cu e mesun suma a disminui. Pa Pontilius, esaki ta mustra dicon e discusion no por limita n’e total nominal di salario. Aunke salario subi, e mehoracion por desaparece rapidamente si prijsnan di necesidadnan basico sigui aumenta. El a subraya tambe cu un parti di e presion ta bini di desaroyonan internacional cu Aruba no ta controla. Aumentonan den combustibel y otro producto importa por aumenta e gastonan di empresa y finalmente den e prijs cu consumidor ta paga. Pontilius a sigui e debate actual den un contexto historico, recordando e periodo dificil rond di aña 1985 y 1986 y e sacrificionan cu trahadornan a haci den e epoca ey. Loke ningun hende a spera cu Lago a sera su portanan. Trahadornan cu contrato colectivo a entrega parti di nan salario y condicionnan di trabou. El a menciona un sacrificio salarial di aproximadamente 8,2%, como ilustracion di e contribucion cu trahadornan a haci durante e crisis. Desde e periodo ey, economia di Aruba a cambia considerablemente, cu turismo tumando un papel cada biaha mas grandi despues di seramento di refineria. Pontilius a señala cu den diferente parti di sector priva tabatin mehoracion den salario y condicionnan di trabou, entre otro pa medio di negociacion colectivo. Sinembargo, no tur trahador tin e mesun proteccion of e mesun posibilidad pa negocia. E diferencia aki ta importante ora di evalua e posicion di personanan cu ta depende di salario minimo. Anselmo Pontilius a toca tambe e argumento cu algun trahador den sector hotelero ta ricibi tip adicionalmente na nan salario. El a indica cu, aunke esaki ta conta pa un parti di e personal, no tur trahador ta ricibi tip. Den su vision, e dos medidanan por complementa otro: Un salario mas halto pa trahador y un reduccion den contribucion pa doño di trabou. E proposicion ta su punto di bista den e debate. Claro cu ainda Gobierno no a adopta e reduccion aki. Pa Pontilius, acerca salario minimo na bestaansminimum ta relaciona directamente cu e capacidad di famianan pa sostene nan mes. E reto ta pa converti e aumento den un mehoracion real den poder di compra, mientras cu tambe ta crea espacio pa empresa por carga cu e adaptacion. Anselmo Pontilius no ta kere cu e discusion ta dje leu ey cu por tuma un decision fiho pa mara e salario minimo n’e bestaansminimum ainda. E ta kere cu mester tin un bon investigacion y sigur dialogo cu tur partido envolvi. E ta haya cu comercio a comete un eror grave ora a exclui KVK, SNBA y OPPA for di e dialogo, pasobra ta hendenan cu tabatey semper y cu ta spiel di nos comunidad. Pa no mara e dialogo na un aumento di 600 florin mesora, el a conseha pa subi salario minimo cu 200 florin na januari 2027 y djey sigui dialoga y negocia pa mira kico lo haci na januari 2028 y na januari 2029. Kisas e por ta un aumento, pero kisas e por ta otro beneficionan secundario tambe cu e doño di trabou ta duna su trahador cu ta biba solamente di salario minimo pa yud’e den su poder di compra.

Prome Minister Mike Eman ta explora e posibilidad di uni experencia y conocemento di e empresanan di maneho di sushi na Aruba, Corsou, Boneiro y Hulanda, cu e meta di desaroya un solucion regional p’e problematica di sushi. E vision aki a sali dilanti durante su bishita na empresa HVC na Alkmaar, Hulanda. E Prome Minister, acompaña pa su delegacion, a ricibi un recorido den e instalacionnan di HVC, caminda el a sera conoci di cerca e sistema moderno cu e empresa ta uza pa procesa sushi, recupera material y produci energia electrico y calor. Eman a expresa su impresion positivo di e nivel di organisacion, tecnologia y eficiencia cu el a observa durante e recorido. E tipo di instalacion aki ta representa e nivel di modernisacion cu Aruba y e otro islanan den region mester aspira na dje, asina por atende e problematica di sushi na un manera mas eficiente y responsabel cu medio ambiente. Durante e encuentro, Eman a haci referencia na su bishita reciente na Corsou y Bonaire, caminda e posibilidad di un acercamento regional den maneho di sushi a wordo discuti. Un di e aspectonan cu e Prome Minister ta considera importante t’e volumen di sushi cu ta necesario pa haci un instalacion industrial moderno economicamente factibel. P’e motibo aki, Eman ta explora si Aruba, Corsou y Boneiro por uni nan esfuerso y crea suficiente capacidad regional pa un proyecto di e magnitud aki. Den e contexto aki, el a menciona e posibilidad di un asociacion entre Serlimar di Aruba, Selikor di Corsou, Selibon di Boneiro, EcoTech na Aruba y HVC. E idea ta pa combina e conocemento cu e empresanan local tin di e realidad y necesidadnan di cada isla, cu e experiencia tecnico y industrial cu HVC a acumula durante 35 aña. Un otro punto importante cu Prome Minister Eman a presenta t’e posibilidad di considera e area di refineria na Aruba pa desaroyo di un instalacion moderno di procesamento di sushi. E mandatario a haci referencia n’e tecnologia sofistica cu el a observa na HVC, caminda diferente proceso industrial ta wordo organisa den un sistema integra. E tipo di instalacion aki por ofrece oportunidad pa procesa y separa diferente clase di sushi, recupera materia prima y transforma sushi cu no por recicla den energia. Durante su recorido, Eman a presta atencion special n‘e manera cu HVC ta procesa sushi den un ambiente industrial controla, incluyendo e medidanan pa limita molestia di holor y otro efecto relaciona cu procesamento di sushi. E Prome Minister a considera impresionante e manera cu e diferente instalacion ta funciona den un sistema organisa, caminda sushi ta wordo trata como un material cu ainda por genera placa.

Ministerio Publico ta sigui lucha duro contra posecion di arma di candela. Arma di candela ta forma un peliger grandi pa seguridad publico. Pesey ta consecuentemente exigi castigonan halto di prison pa posecion di arma di candela. Asina a keda demostra tambe den casonan ultimamente.

Siman pasa Corte den Prome Instancia a condena un sospechoso den asina yama snelrecht pa un castigo di prison di 24 luna, di cual 12 ta condicional, y un tempo di prueba di tres aña. E homber aki tabatin un mitrayador den su poder pa añanan largo y tabata warda esaki bao su cama. E otro sospechoso den e mes caso aki tambe lo mester presenta pronto dilanti Huez. A haya foto y video di e mesun mitrayador den su poder.

Sa pasa regularmente cu casonan relaciona cu arma di candela ta sali na cla dor cu hende ta warda foto y video riba nan celular. E siman aki Corte den Prome Instancia lo bolbe trata un caso di arma di candela den cual e sospechoso tabatin foto di diferente arma di candela riba su celular, entre nan un pistool, un revolver y un mitrayador. Den e caso aki tambe lo aplica snelrecht.

Mas of menos tres siman pasa atrobe un otro sospechoso a wordo condena pa posecion di un revolver carga den su tas. El a haya un castigo di prison di 21 luna, di cual 6 ta condicional, y un tempo di prueba di tres aña.

Ora di determina e exigencia di castigo pa posesion di arma di candela, fiscal ta sigui e Richtlijn vuurwapens en munitie, cu a ser ancra pa Procurador-General na februari 2021. Punto di salida di e richtlijn aki ta cu posecion di arma di candela, municion y magazijnnan di bala ta forma un gran peliger pa orden publico y seguridad.

E haltura di e exigencia ta wordo determina, entre otro, pa e tipo di arma di candela, e circunstancianan bao di cual e arma a wordo haya y eventual condenan anterior di e sospechoso. E richtlijn ta haci diferencia entre locual ta yama “posecion pasivo” (rustig bezit) y tin un arma di candela den e dominio publico, manera riba caya of, por ehempel, den un auto of un boto. Pa armanan di candela mas pisa of automatico tin criteronan di referencia mas severo pa loke t’e demanda di castigo. Tambe recidivismo, caminda un persona a yega di wordo condena caba pa posecion di arma di candela, ta wordo considera un circunstancia agravante.

Den casonan unda ley ta permiti, Ministerio Publico por haci uso di snelrecht. Snelrecht ta encera cu e sospechoso ta wordo presenta dilanti Hues den un tempo hopi cortico, pa por tuma accion rapido y visibel contra posecion prohibi di arma di candela. Pa loke ta bay 2026, diez (10) sospechoso a wordo condena via snelrecht pa motibo di posecion di arma di candela.

Posecion di arma di candela no ta wordo tolera. Ken cu dicidi di tin un arma di candela den su poder mester conta cu e chens di castigo di prison. Pesey, Ministerio Publico lo sigui actua cu firmeza contra tur persona cu haci su mes culpabel na posecion di arma.

E lista positivo di remedi na Aruba lo wordo actualisa cu un total di 64 remedi, incluyendo diferente forma farmaceutico y forsa (farmaceutische vormen en sterktes). E remedinan inclui den e actualisacion lo wordo cubri pa AZV desde 1 di november 2026. E actualisacion ta amplia e opcionnan di tratamento cu ta disponibel bao cobertura di AZV den diferente area di cuido. Dia 20 di october ultimo, Minister di Salubridad, Asunto Social, Cuido di Adulto Mayor y Maneho di Adiccion, sra. drs. Melvin Wyatt-Ras, a reuni cu Adviescommissie Geneesmiddelenlijst Aruba (AGA) pa trata e recomendacion y e siguiente pasonan pa implementacion. E recomendacion oficial di AGA, fecha 13 di oktober 2026, ta resultado di evaluacion di diferente remedi y necesidadnan den cuido. E ta inclui remedi pa indicacionnan medico specifico. E remedinan cu lo wordo inclui ta forma parti di diferente categoria, e.o., sistema cardiovascular, sistema respiratorio, metabolismo, oncologia y immunologia, tratamento hormonal, sistema nervioso y cuido di wowo. Algun ehempel ta inclui remedi pa asma, infeccion, epilepsia, ADHD, dolor cronico y diferente afeccion di wowo. E cambionan lo wordo formalisa conforme e procedemento vigente. Pa Minister Wyatt-Ras, revision regular di e lista positivo ta importante p’e sistema di salud por sigui responde na necesidadnan actual di pashentnan y na desaroyonan den tratamento medico. Minister Wyatt-Ras a expresa su aprecio p’e trabou tecnico di AGA y p’e colaboracion entre e diferente actornan envolvi den e proceso, cu ta contribui na acceso na tratamento adecuado, sigur y responsabel pa pashentnan na Aruba.

Recientemente, Minister di Husticia, mr. drs. Arthur Dowers, a anuncia un maneho temporal pa brinda oportunidad di legalisa estadia di muchanan menor di edad cu ya ta na Aruba, cu a drenta via Aeropuerto prome cu 21 di october 2026 y cu tin por lo menos un mayor cu ta biba legalmente na Aruba. E maneho aki ta destina exclusivamente pa muchanan menor di edad cu ya tin un tempo caba na Aruba prome cu e fecha menciona. Esaki NO ta un oportunidad pa trece yiunan menor di edad for di exterior pa despues legalisa nan estadia. E maneho temporal ta termina 31 di december 2026 y ta mara na condicionnan y rekisitonan estableci pa DIMAS. E maneho aki no ta representa un legalisacion automatico, ya cu lo evalua cada solicitud individualmente conforme e condicion y rekisitonan aplicabel. Esaki ta inclui e.o. acta di nacemento apostilla, potret, passport valido, entrada anual di mayor (garante) etc. Pa mas informacion tocante e proceso di solicitud di permiso di estadia y trabao, empresa y personanan interesa por bishita www.dimasaruba.aw of comunica cu DIMAS via WhatsApp na +297 5698173 of acudi na servicio di recepcion di DIMAS. Minister Dowers a enfatisa cu e iniciativa aki ta dirigi riba un grupo vulnerabel cu, durante e trayectonan anterior di Hunto pa Progreso, no tabatin e posibilidad pa regularisa nan situacion di estadia mirando cu Hunto pa Progreso tabata dirigi riba migrantenan cu ya tabata na Aruba di forma indocumenta pa yena e demanda laboral den diferente sector. E maneho temporal aki ta brinda e oportunidad pa regla e status di e muchanan menor di edad, cu a drenta Aruba prome cu 21 di october 2026 y cu ainda ta indocumenta, y ta termina 31 di december 2026. Ta importante cu, den e marco di un maneho di admision responsabel y structura, tin atencion pa situacion di muchanan menor di edad, teniendo cuenta cu nan bienestar y e responsabilidad di mayornan pa garantisa cu nan yiunan ta cumpli cu e leynan di Aruba. Na mes momento, Minister Dowers ta enfatisa cu e oportunidad aki ta limita n’e grupo specifico menciona y no ta implica un ampliacion general di e programa Hunto pa Progreso. DIMAS lo ta encarga cu evaluacion di e solicitudnan y aplicacion di e condicionnan determina.

Prome Minister Mike Eman, hunto cu Minister di Turismo, Transporte y Labor, Wendrick Cicilia, tabata presente na FRED Expo na Rotterdam, Hulanda, caminda nan a conecta cu e hoben profesionalnan Arubiano y a destaca e oportunidadnan laboral cu Aruba tin pa ofrece na esnan cu ta considera bolbe nan pais. Durante e evento, Prome Minister Eman a haci un apelacion special na e profesionalnan Arubiano cu ta biba na Hulanda pa, ora nan ta considera nan futuro, no wak solamente e oportunidadnan di trabou, sino tambe e lasonan familiar, amistad y e posibilidad di contribui na desaroyo di Aruba. E Prome Minister a indica cu Aruba tin varios oportunidad interesante den diferente sector, entre otro economia, Gobierno y area social. Sinembargo, el a reconoce cu Aruba, siendo un isla chikito, no semper por competi cu un pais grandi manera Hulanda den tur facilidad, oportunidad profesional y actividad recreativo. Segun Eman, precisamente p’e motibo aki ta importante ‘e profesionalnan Arubiano biba den exterior considera otro aspecto di bida ora nan ta evalua e posibilidad di bolbe Aruba. E lasonan cu famia, amistad, cultura y e sentimento di pertenencia na nos isla tin un balor cu ta bay mas leu cu un funcion of salario. E Prome Minister a menciona e celebracionnan tradicional manera Carnaval y Pasco, e reunionnan familiar y e calor humano caracteristico di Aruba como e aspectonan cu ta forma parti di nos identidad y cu ta dificil pa reproduci den exterior. Eman a enfatisa cu bolbe Aruba no ta solamente un decision profesional, sino tambe un oportunidad pa reconecta cu nos comunidad y contribui cu conocemento y experencia adkiri den exterior na e futuro di nos pais. Cu su presencia na FRED Expo, Prome Minister Mike Eman y Minister Wendrick Cicilia a destaca e importancia di mantene contacto cu e profesionalnan Arubiano na Hulanda y di informa nan tocante e oportunidadnan cu Aruba tin pa ofrece.

Minister di Husticia, mr. drs. Arthur Dowers, a comparti un situacion preocupante relaciona cu personanan cu ta biba legalmente na Aruba y cu ta facilita entrada di nan miembronan di nan famia cu e intencion p’e personanan aki keda na Aruba mas largo cu e periodo di estadia ta permiti. Minister Dowers a splica cu DIMAS ta otorga permiso bao di condicionnan specifico, cual cada persona cu tin esaki, tin cu tene su mes na dje. E hecho cu un persona tin un permiso valido pa ta na Aruba no ta nifica cu e persona automaticamente tin derecho di trece miembronan di su famia pa establece nan mes na Aruba sin cumpli cu e proceduranan legal di admision. Segun Minister Dowers, ta importante haci un distincion entre un bishita temporal di un familiar y un situacion den cual un persona ta facilita entrada di un miembro di famia, sabiendo di antemano cu e intencion ta p’e famia keda na Aruba sin e permiso di estadia necesario. E mandatario a adverti cu esnan cu permiso di estadia/trabao cu conscientemente ta facilita of contribui na un estadia ilegal di un familiar, ta core riesgo cu DIMAS por revoca e permiso, mirando cu e comportacion aki ta un violacion di e condicionnan bao di cual a duna e permiso. Minister Dowers a enfatisa cu cada persona cu desea establece su residencia na Aruba mester sigui e procedura regular di admision y cumpli cu e rekisitonan legal aplicabel. E existencia di un relacion familiar cu un residente legal no ta kita e obligacion aki. E mandatario a subraya cu e responsabilidad pa cumpli cu e leynan di admision no ta limita solamente n’e persona cu ta drenta Aruba, pero ta inclui tambe esnan cu ta facilita of deliberadamente contribui na un situacion di estadia ilegal. Ademas tin cu tene cuenta cu mester haci peticion pa permiso den exterior y te ora ricibi e VTA, por biaha pa Aruba pa sigui e proceso pa permiso. Minister Dowers ta haci un yamada na tur persona cu permiso di DIMAS pa actua cu responsabilidad y informa nan mes debidamente tocante e condicion y proceduranan aplicabel prome cu invita of facilita entrada di un familiar cu intencion di establece residencia na Aruba. Pa cualkier pregunta of informacion adicional tocante e proceduranan di admision y reunificacion familiar, por comunica cu DIMAS via WhatsApp na +297 5698173 of pasa na servicio di recepcion di DIMAS.